1. (a) Yehova ametupatia tumaini gani? (b) Inamaanisha nini ‘kumtumaini Yehova’? (Tazama “Ufafanuzi wa Maneno.”)

 YEHOVA amewapatia tumaini zuri wale wote wanaompenda. Hivi karibuni, atakomesha magonjwa, huzuni, na kifo. (Ufu. 21:3, 4) Atawasaidia “wapole” wanaomtumaini waibadili dunia kuwa paradiso. (Zab. 37:9-11) Naye atafanya iwezekane kwa kila mmoja wetu kuwa na uhusiano mzuri sana wa kibinafsi pamoja naye, ambao utakuwa bora zaidi kuliko tunaofurahia sasa. Hilo ni tumaini zuri sana! Lakini tuna msingi gani wa kuamini kwamba ahadi za Mungu zitatimia? Sikuzote Yehova hutimiza ahadi zake. Hivyo, tuna sababu nzuri ya ‘kumtumaini Yehova.’ b (Zab. 27:14) Tunaonyesha hilo kwa kumngojea kwa subira na shangwe Mungu wetu atimize kusudi lake.​—Isa. 55:10, 11.

2. Tayari Yehova amefanya nini?

² Tayari Yehova amethibitisha kwamba anatimiza ahadi zake. Fikiria mfano mmoja wa pekee. Katika kitabu cha Ufunuo, Yehova aliahidi kwamba katika siku zetu atawakusanya watu kutoka katika kila taifa, kabila, na lugha, na kuwaunganisha katika ibada safi. Leo, kikundi hicho cha pekee cha watu kinaitwa “umati mkubwa.” (Ufu. 7:9, 10) Ingawa kikundi hicho kinafanyizwa na wanaume, wanawake, na watoto kutoka katika jamii, lugha, na malezi tofauti-tofauti, wote wanatokeza undugu wa ulimwenguni pote wenye amani na umoja. (Zab. 133:1; Yoh. 10:16) Pia, wale wanaofanyiza umati mkubwa ni wahubiri wenye bidii. Sikuzote wako tayari kushiriki tumaini lao kuhusu ulimwengu  bora na yeyote anayewasikiliza. (Mt. 28:19, 20; Ufu. 14:6, 7; 22:17) Ikiwa wewe ni sehemu ya umati mkubwa, bila shaka unathamini sana tumaini la mambo mazuri ya wakati ujao.

3. Lengo la Shetani ni nini?

³ Ibilisi anataka kukunyang’anya tumaini lako. Lengo lake ni kukufanya uamini kwamba Yehova hakujali na kwamba hatatimiza ahadi zake. Ikiwa Shetani atafaulu kutunyang’anya tumaini letu, tutakosa ujasiri, na huenda tukaacha kumtumikia Yehova. Kama tutakavyoona, Ibilisi alijaribu kumnyang’anya Ayubu tumaini lake ili kumfanya aache kumtumikia Yehova.

4. Tutazungumzia nini katika makala hii? (Ayubu 1:9-12)

⁴ Katika makala hii, tutazungumzia mbinu ambazo Shetani alitumia ili kujaribu kumfanya Ayubu avunje utimilifu wake. (Soma Ayubu 1:9-12.) Pia, tutazungumzia mambo tunayoweza kujifunza kutokana na mfano wa Ayubu na kwa nini tunahitaji kukumbuka kwamba Mungu anatupenda naye atatimiza ahadi zake.

5-6. Ni nini kilichompata Ayubu katika kipindi kifupi?

⁵ Ayubu aliishi maisha mazuri sana. Alifurahia uhusiano wa karibu pamoja na Yehova. Alikuwa na familia kubwa yenye umoja na alikuwa tajiri sana. (Ayu. 1:1-5) Lakini katika siku moja tu, Ayubu alipoteza karibu kila kitu. Kwanza, alipoteza utajiri wake. (Ayu. 1:13-17) Kisha, watoto wake wote wapendwa wakafa. Hebu wazia msiba huo. Wazazi wanahuzunika sana mmoja kati ya watoto wao anapokufa. Basi wazia jinsi Ayubu na mke wake walivyopatwa na mshtuko, majonzi, na kukata tamaa walipotambua kwamba watoto wao wote kumi walikuwa wamekufa. Ndiyo sababu Ayubu aliomboleza kwa kurarua mavazi yake na kuanguka chini!​—Ayu. 1:18-20.

⁶ Kisha, Shetani alimsababishia Ayubu ugonjwa mbaya uliomfedhehesha. (Ayu. 2:6-8; 7:5) Pindi moja, Ayubu aliheshimiwa sana katika jamii yake. Watu walikuwa wakienda kwake ili kupata ushauri. (Ayu. 31:18) Lakini sasa walimkwepa. Alitengwa na jamii, ndugu zake, marafiki wake wa karibu, na hata watumishi wa nyumba yake mwenyewe!​—Ayu. 19:13, 14, 16.

7. (a) Ayubu aliamini mateso yake yalitokana na nani, lakini alikataa kufanya nini? (b) Huenda Mkristo akakabili jaribu gani linalofanana na lile lililo kwenye picha inayoambatana na fungu hili?

⁷ Shetani alitaka Ayubu aamini kwamba aliteseka kwa sababu alikuwa amepoteza kibali cha Yehova. Kwa mfano, Shetani alitumia upepo mkali kubomoa nyumba ambayo watoto wote kumi wa Ayubu walikuwa wakifurahia mlo pamoja. (Ayu. 1:18, 19) Pia, alisababisha moto uanguke kutoka mbinguni na kuteketeza mifugo ya Ayubu na watumishi ambao walikuwa wakiwatunza. (Ayu. 1:16) Ni wazi kwamba upepo na moto ulitokana na chanzo kinachozidi nguvu za wanadamu; basi, Ayubu alifikia mkataa kwamba Yehova Mungu ndiye aliyesababisha hali hizo. Hilo lilimfanya Ayubu aamini kwamba alikuwa amemkasirisha Yehova. Ingawa hivyo, Ayubu alikataa kumlaani Baba yake wa mbinguni. Ayubu alitambua kwamba kwa miaka mingi alikuwa amepata vitu vingi vizuri kutoka kwa Yehova. Basi aliwaza kwamba ikiwa alifurahia kupata vitu vizuri, alipaswa pia kuwa tayari kukubali mambo mabaya. Hivyo alisema hivi: “Jina la Yehova na liendelee kusifiwa.”  (Ayu. 1:20, 21; 2:10) Kufikia wakati huo, Ayubu alikuwa amefaulu kukabiliana na hali ngumu ya kiuchumi, kihisia, na kimwili. Lakini Shetani alijaribu mbinu nyingine.

8. Shetani alitumia mbinu gani nyingine kwa Ayubu?

⁸ Shetani alitumia mbinu nyingine dhidi ya Ayubu; aliwachochea rafiki zake watatu wa uwongo wamfanye Ayubu ahisi kwamba hana thamani. Wanaume hao walidai kwamba mateso ya Ayubu yalithibitisha alikuwa na hatia ya makosa fulani. (Ayu. 22:5-9) Pia, walijaribu kumsadikisha kwamba hata ikiwa hakuwa mwovu, jitihada zote alizofanya ili kumfurahisha Mungu zilikuwa za bure kabisa. (Ayu. 4:18; 22:2, 3; 25:4) Hivyo, walikuwa wakijaribu kumfanya Ayubu afikiri kwamba Mungu hampendi, hamjali, na hathamini utumishi wake. Maneno yao yangeweza kumfanya Ayubu ahisi hana tumaini.

9. Ni nini kilichomsaidia Ayubu kuwa jasiri na imara?

⁹ Wazia hali hii. Ayubu ameketi kwenye majivu akiwa na maumivu makali. (Ayu. 2:8) Marafiki wake wanaendelea kumshambulia na kujaribu kumharibia sifa. Majaribu yake yanamlemea kama mawe mazito, ana maumivu moyoni kwa sababu ya majonzi ya kufiwa na wanawe. Mwanzoni, Ayubu anakaa kimya. (Ayu. 2:13–3:1) Ikiwa marafiki wa Ayubu walifikiri kimya cha Ayubu ni ishara kwamba angemkana Muumba wake, kwa kweli walikuwa wamekosea sana. Pindi moja huenda Ayubu aliinua kichwa chake na kuwatazama moja kwa moja marafiki wake wa uwongo, kisha akasema: “Mpaka nitakapokufa, sitaukana utimilifu wangu!” (Ayu. 27:5) Ni nini kilichomsaidia Ayubu kuwa jasiri na imara licha ya mateso yake yote? Hata Ayubu alipokuwa amevunjika sana moyo, hakupoteza  tumaini kwamba mwishowe Mungu wake mwenye upendo angemletea kitulizo. Alijua kwamba hata akifa, Yehova angemfufua.​—Ayu. 14:13-15.

10. Simulizi la Ayubu linatufundisha nini?

¹⁰ Simulizi la Ayubu linatufundisha kwamba Shetani hawezi kutulazimisha tumwache Yehova na kwamba Yehova anajua kila hali tunayopitia. Pia, kisa cha Ayubu kinatusaidia kuelewa vizuri zaidi masuala yanayohusika. Fikiria baadhi ya masomo hususa tunayoweza kujifunza kutoka kwa Ayubu.

11. Ikiwa tutaendelea kumtumaini Yehova, tutakuwa na uhakika gani? (Yakobo 4:7)

¹¹ Ayubu alithibitisha kwamba ikiwa tutaendelea kumtumaini Yehova, tunaweza kuvumilia jaribu lolote na kufanikiwa kumpinga Shetani. Matokeo yatakuwaje? Maandiko yanatuhakikishia kwamba Ibilisi atatukimbia.​—Soma Yakobo 4:7.

12. Tumaini la ufufuo lilimwimarishaje Ayubu?

¹² Tunahitaji kuwa na imani yenye nguvu katika tumaini la ufufuo. Kama ilivyotajwa katika makala iliyotangulia, mara nyingi Shetani anatumia woga wa kifo ili kutufanya tuvunje utimilifu wetu. Katika kisa cha Ayubu, Shetani alidai kwamba Ayubu angefanya jambo lolote, hata kuvunja utimilifu wake ili kuokoa uhai wake. Shetani alikosea. Hata Ayubu alipofikiri kwamba angekufa, bado hakuvunja utimilifu wake. Aliimarishwa na uhakika wake katika wema wa Yehova na tumaini lake imara kwamba mwishowe Yehova angerekebisha mambo. Ayubu aliamini kwamba ikiwa Yehova hangerekebisha mambo akiwa angali hai, angemfufua wakati ujao. Tumaini la ufufuo lilikuwa halisi kwa Ayubu. Ikiwa tumaini hilo ni halisi kwetu, hatutavunja utimilifu wetu hata tukikabili hatari ya kifo.

13. Kwa nini tunahitaji kuwa waangalifu kuhusu mbinu ambazo Shetani alitumia kwa Ayubu?

¹³ Ni lazima tuwe waangalifu sana kuelekea mbinu ambazo Shetani alitumia kwa Ayubu kwa sababu anatumia mbinu hizohizo dhidi yetu leo. Fikiria shtaka ambalo Shetani alitoa: “Mtu [si Ayubu tu] atatoa kila kitu alicho nacho ili aokoe uhai wake.” (Ayu. 2:4, 5) Hivyo, Shetani alidai kwamba kwa kweli hatumpendi Yehova Mungu na kwamba tunaweza kumkana ikiwa kufanya hivyo kutaokoa uhai wetu. Zaidi ya hilo, Shetani anadai kwamba Mungu hatupendi na kwamba hatambui jitihada zetu za kumfurahisha. Kwa kuwa tunajua mbinu za Shetani, sisi tunaomtumaini Yehova hatudanganywi na mbinu hizo.

14. Majaribu yanaweza kufunua nini kutuhusu? Toa mfano.

¹⁴ Tunapaswa kuyaona majaribu kama fursa ya kuchunguza udhaifu wetu. Majaribu ambayo Ayubu alipitia yalimsaidia kutambua udhaifu aliokuwa nao na kuurekebisha. Kwa mfano, alitambua kwamba alihitaji kusitawisha sifa ya unyenyekevu kwa kiwango kikubwa zaidi. (Ayu. 42:3) Sisi pia tunaweza kujifunza mengi kujihusu tunapokuwa chini ya jaribu. Ndugu anayeitwa Nikolay, c aliyefungwa gerezani licha ya kuwa na tatizo kubwa sana la kiafya, anasema hivi: “Gereza ni kama mashine ya eksirei inayoonyesha sifa za ndani za Mkristo.” Tunapotambua udhaifu wetu, tunaweza kuurekebisha.

15. Tunapaswa kumsikiliza nani, na kwa nini?

 ¹⁵ Tunahitaji kumsikiliza Yehova, si maadui wetu. Ayubu alisikiliza kwa makini Yehova alipozungumza naye. Mungu alipokuwa akimsaidia Ayubu atumie uwezo wake wa kufikiri, ni kana kwamba alikuwa akimwambia hivi: ‘Je, unaona nguvu zangu za uumbaji? Ninajua kuhusu mambo yote ambayo yamekupata. Je, unafikiri sina uwezo wa kukutunza?’ Ayubu alijibu kwa unyenyekevu na kuthamini sana wema wa Yehova. Alisema hivi: “Masikio yangu yamesikia habari zako, lakini sasa ninakuona kwa macho yangu.” (Ayu. 42:5) Inaelekea bado Ayubu alikuwa ameketi kwenye majivu, mwili wake ukiwa umejaa majipu, na watoto wake wakiwa kaburini, aliposema maneno hayo. Hata hivyo, Yehova alimhakikishia Ayubu kwamba anampenda na ana kibali chake.​—Ayu. 42:7, 8.

16. Kulingana na Isaya 49:15, 16, tunapaswa kukumbuka nini tunapokabili majaribu?

¹⁶ Leo pia, huenda watu wakatutukana na kututendea kana kwamba hatuna thamani. Huenda wakajaribu kutuharibia sifa tukiwa mtu mmoja-mmoja au tengenezo na ‘kutusingizia kila aina ya uovu.’ (Mt. 5:11) Kutokana na simulizi la Ayubu, tunajifunza kwamba Yehova ana uhakika tutaendelea kuwa washikamanifu kwake tunapokabili majaribu. Yehova anatupenda na kamwe hatawaacha wale wanaomtumaini yeye. (Soma Isaya 49:15, 16.) Usisikilize uchongezi wowote unaosemwa na maadui wa Mungu! James, ndugu kutoka Uturuki,  ambaye familia yake imekabili majaribu makali, anasema hivi: “Tulitambua kwamba kusikiliza uwongo kuhusu watu wa Mungu kungetuvunja moyo. Hivyo, tulikazia fikira tumaini letu la Ufalme na kuendelea kuwa na bidii katika utumishi wetu kwa Yehova. Matokeo ni kwamba tulidumisha shangwe yetu.” Kama Ayubu, tunamsikiliza Yehova! Maadui wetu hawawezi kutuondolea tumaini letu.

17. Unajifunza nini kutokana na mfano wa wanaume na wanawake waaminifu wanaotajwa katika Waebrania sura ya 11?

¹⁷ Ayubu ni mmoja tu kati ya watumishi wa Yehova ambao waliendelea kuwa jasiri na imara wakati wa majaribu makali. Katika barua yake kwa Waebrania, Paulo anawataja wengine wengi akiwaita ‘wingu kubwa la mashahidi.’ (Ebr. 12:1) Wote walipitia majaribu makali. Hata hivyo, katika maisha yao yote waliendelea kuwa waaminifu kwa Yehova. (Ebr. 11:36-40) Je, uvumilivu na jitihada zao zilikuwa za bure? Bila shaka la! Hata ingawa katika maisha yao hawakuona utimizo wa ahadi zote za Mungu, waliendelea kumtumaini Yehova. Na kwa vile walikuwa na uhakika wamepata kibali cha Yehova, walikuwa na usadikisho kwamba wataziona ahadi hizo zikitimia. (Ebr. 11:4, 5) Mfano wao unaweza kuimarisha azimio letu la kuendelea kumtumaini Yehova.

18. Umeazimia kufanya nini? (Waebrania 11:6)

¹⁸ Leo, tunaishi katika ulimwengu unaozidi kuwa mbaya zaidi na zaidi. (2 Tim. 3:13) Bado Shetani anaendelea kuwajaribu watu wa Mungu. Licha ya changamoto tutakazokabili wakati ujao, acheni tuazimie kumtumikia Yehova kwa bidii, tukiwa na uhakika kwamba “tumemtumaini Mungu aliye hai.” (1 Tim. 4:10) Kumbuka kwamba matokeo ambayo Mungu alimpa Ayubu yanathibitisha kuwa “Yehova ni mwenye upendo mwororo sana na mwenye rehema.” (Yak. 5:11) Acheni tuendelee kuwa washikamanifu kwa Yehova tukiwa na uhakika kwamba atawathawabisha “wale wanaomtafuta kwa bidii.”​—Soma Waebrania 11:6.