Je, Biblia Inaweza Kukusaidia Kushinda Uraibu wa Dawa za Kulevya?

CHEZA

Kila mwaka, mamilioni ya watu hufa kutokana na matumizi ya moja kwa moja au yasiyo ya moja kwa moja ya dawa mbalimbali kutia ndani za kulevya. Wakati wa janga la COVID-19, tatizo hilo limeongezeka. Hekima ya Biblia imewasaidia wengi kushinda uraibu wa dawa za kulevya. Ikiwa unapambana na tatizo hilo, hekima hiyo inaweza kukusaidia pia. a

Katika makala hii

Kwa nini tunapaswa kutafuta ushauri wa Biblia ili kushinda uraibu?

Watafiti wamegundua kwamba mara nyingi uraibu unahusiana na matatizo kama vile upweke, mkazo, mfadhaiko, na kushuka moyo. Biblia inaweza kukusaidia kusitawisha imani inayohitajika ili kukabiliana kwa njia inayofaa na changamoto zinazoweza kuongoza kwenye uraibu. Inaonyesha jinsi unavyoweza kuwa na urafiki wa karibu na Mungu. (Zaburi 25:14) Kwa msaada wake, unaweza kushinda matatizo ambayo huenda usiweze kutatua ukiwa peke yako.—Marko 11:22-24.

Hatua nne zinazotajwa katika Biblia zinazoweza kukusaidia kushinda uraibu

1. Jifunze kumhusu Yehova Mungu. b (Yohana 17:3) Yeye ndiye Muumba na Chanzo cha nguvu zisizo na mwisho. Mbali na hilo, yeye ni Baba yako wa mbinguni mwenye upendo. Anataka kuwa na uhusiano wa karibu pamoja nawe na angependa kutumia nguvu zake kukusaidia. (Isaya 40:29-31; Yakobo 4:8) Anaahidi kukupa wakati ujao mzuri ikiwa utakubali kunufaishwa na upendo wake.—Yeremia 29:11; Yohana 3:16.
2. Mwombe Yehova msaada. Sali kwa Mungu na umwombe akusaidie kukabiliana na uraibu ili uwe ‘mtakatifu, na mwenye kukubalika kwake.’ (Waroma 12:1) Kupitia roho yake takatifu, au kani ya utendaji, atakupa “nguvu zinazopita zile za kawaida.” (2 Wakorintho 4:7; Luka 11:13) Nguvu hiyo itakusaidia kuacha matumizi mabaya ya dawa na kusitawisha “utu mpya” unaopatana na mapenzi yake.—Wakolosai 3:9, 10.
3. Jaza akili yako mawazo ya Mungu. (Isaya 55:9) Atakusaidia “kufanywa upya katika nguvu zinazoongoza akili” yako, yaani, kubadili njia yako ya kufikiri, na hilo litakusaidia kushinda uraibu. (Waefeso 4:23) Mawazo ya Mungu yanapatikana katika Biblia, kwa hiyo ni muhimu kuisoma kwa ukawaida. (Zaburi 1:1-3) Watu wengi wamenufaika kwa kupata msaada wa kuelewa kile ambacho Biblia inafundisha. (Matendo 8:30, 31) Mashahidi wa Yehova wanajifunza na watu Biblia bila malipo. Pia tunakualika uhudhurie mikutano yetu, ambapo tunachunguza kile ambacho Biblia inasema na jinsi tunavyoweza kutumia mafundisho hayo maishani.
4. Chagua mashirika mazuri. Unapopambana na uraibu, marafiki wako wanaweza kuwa na uvutano mkubwa juu yako, kwa njia nzuri au mbaya. (Methali 13:20) Mungu anaandaa marafiki wazuri miongoni mwa wale wanaomwabudu, naye angependa unufaike kutokana na urafiki wao. (Zaburi 119:63; Waroma 1:12) Uwe mteuzi kuhusu burudani yako pia, kwa sababu ni kana kwamba unashirikiana na watu unaowatazama, kuwasikiliza, au kusoma kuwahusu. Epuka kitu chochote kitakachofanya iwe vigumu zaidi kwako kufanya kilicho sawa.—Zaburi 101:3; Amosi 5:14.

Mistari ya Biblia inayoweza kukusaidia kushinda uraibu

Zaburi 27:10: “Hata baba yangu na mama yangu wakiniacha, Yehova mwenyewe atanichukua.”

“Sikumjua baba yangu mzazi, na jambo hilo lilinifanya nijihisi ni kama nimepotea. Lakini nilipojua kwamba Yehova Mungu ni Mtu halisi ambaye ananipenda sana, nilipata kusudi maishani na nilifaulu kushinda uraibu wangu.”—Wilby, kutoka Haiti.

Zaburi 50:15: “Nililie wakati wa taabu. Nitakuokoa.”

“Mara nyingi sana mstari huu ulinichochea kupambana na uraibu wangu hata katika pindi ambazo nilishindwa na kishawishi. Yehova alitimiza ahadi yake.”—Serhiy, kutoka Ukrainia.

Methali 3:5, 6: “Mtumaini Yehova kwa moyo wako wote, wala usitegemee uelewaji wako mwenyewe. Katika njia zako zote mtambue yeye, naye atavinyoosha vijia vyako.”

“Mistari hii ilinisaidia kumtegemea Yehova, niache kujitegemea. Kwa nguvu zake, nilifaulu kubadili maisha yangu kabisa.”—Michele, kutoka Italia.

Isaya 41:10: “Usiogope, kwa maana mimi niko pamoja nawe. Usihangaike, kwa maana mimi ni Mungu wako. Nitakutia nguvu, naam, nitakusaidia, nitakushika kwelikweli kwa mkono wangu wa kuume wa uadilifu.”

“Nilipatwa na mfadhaiko sana nilipokosa kupata dawa za kulevya. Andiko hilo lilinisadikisha kwamba Mungu angenisaidia kukabiliana na mfadhaiko wangu, naye alifanya hivyo.”—Andy, kutoka Afrika Kusini.

1 Wakorintho 15:33, maelezo ya chini: “Msipotoshwe. Kushirikiana na watu wabaya huharibu tabia nzuri.”

“Mashirika mabaya yalinifanya nianze kutumia dawa za kulevya. Nilifaulu kushinda uraibu baada tu ya kuacha kushirikiana nao na kuanzisha urafiki na watu safi ambao maisha yao yalinivutia.”—Isaac, kutoka Kenya.

2 Wakorintho 7:1: “Acheni tujisafishe kila unajisi wa mwili na roho.”

“Maneno hayo yalinichochea niendelee kupambana kusafisha mwili wangu na kuacha uraibu niliokuwa nao na kuacha mambo yaliyokuwa yakinidhuru.”—Rosa, kutoka Kolombia.

Wafilipi 4:13: “Kwa mambo yote nina nguvu kupitia yule anayenipa nguvu.”

“Nilijua kwamba sikuwa na nguvu za kutosha kuacha kutumia dawa za kulevya bila msaada, kwa hiyo nilisali Mungu anisaidie. Alinipa nguvu nilizohitaji.”—Patrizia, kutoka Italia.

Masimulizi mengine halisi: Kushinda uraibu kwa msaada wa Biblia

Joseph Ehrenbogen alilelewa katika eneo lenye jeuri na akawa mraibu wa kileo, tumbaku, bangi, na heroini. Pindi kadhaa karibu afe kwa sababu ya kuzidisha dawa hizo. Andiko moja la Biblia lilimhakikishia kwamba angeweza kufanya mabadiliko. Soma simulizi lake katika makala yenye kichwa “Nilijifunza Kujiheshimu na Kuwaheshimu Wanawake.”

Dmitry Korshunov alijaribu mara nyingi kushinda uraibu wake wa kunywa kileo. Tazama video yenye kichwa ‘Nilichoshwa na Maisha Yangu’ uone ni nini kilichomsaidia kufanikiwa.

Samahani, programu ya kupakia faili hiyo imeshindwa kupakia.Pakua Video Hii

Je, Biblia inakataza matibabu ya uraibu?

Hapana. Biblia inasema hivi: “Watu wenye afya hawahitaji daktari, lakini wagonjwa wanamhitaji.” (Mathayo 9:12) Vivyo hivyo, Taasisi ya Kitaifa ya Dawa za Kulevya ya Marekani ilisema hivi: “Uraibu wa dawa za kulevya ni ugonjwa tata, na ili kuacha kuzitumia mtu anahitaji kufanya mengi zaidi ya kuwa na nia nzuri tu au kuazimia kuacha.” Bila shaka, msaada ambao Mungu anaandaa ni wenye nguvu kuliko uwezo wa kujidhibiti au azimio la mtu. Hata hivyo, watu wengi ambao walishinda tatizo la uraibu wa dawa za kulevya kwa kufuata ushauri wa Biblia walihitaji pia kupata matibabu. c Kwa mfano, mwanamume anayeitwa Allen anakumbuka hivi: “Nilipokuwa nikiacha kutumia kileo, maumivu niliyopata mwilini kwa sababu ya kuacha yalikuwa makubwa. Hapo ndipo nilipotambua kwamba nilihitaji matibabu mbali na msaada wa kiroho niliokuwa nikipata.”

Je, Biblia inakataza dawa zisitumiwe kwa ajili ya matibabu?

Hapana. Kwa kweli, Biblia inafafanua matumizi ya kileo kutibu ugonjwa au kupunguza maumivu ya mtu anayekaribia kufa. (Methali 31:6; 1 Timotheo 5:23) Hata hivyo, kama tu ilivyo na kileo, dawa zinazotumiwa kudhibiti maumivu zinaweza kumfanya mtu awe mraibu. Hivyo, ni jambo la hekima kuona hatari na kutenda kwa busara unapotumia dawa za kuzuia maumivu.—Methali 22:3.

a Ingawa makala hii inakazia fikira kushinda uraibu wa dawa za kulevya, kanuni za Biblia zilizotajwa zinaweza pia kuwasaidia wale wanaokabiliana na matatizo mengine, kama vile kileo, tumbaku, chakula, kucheza kamari, ponografia, au mitandao ya kijamii.

b Yehova ni jina la kibinafsi la Mungu. (Zaburi 83:18) Ona makala yenye kichwa “Yehova Ni Nani?”

c Vituo vingi vya matibabu, hospitali, na programu za kurekebisha hali zinaweza kuandaa msaada. Kila mtu anapaswa kuchunguza kwa uangalifu mapendekezo na kuamua ni aina gani ya matibabu inayomfaa zaidi.—Methali 14:15.