SOMO LA 3
Je, Kweli Habari Njema Imetoka kwa Mungu?
1. Ni nani Aliyeitunga Biblia?
Habari njema ya kwamba watu wataishi milele duniani imeandikwa katika Biblia. (Zaburi 37:29) Biblia ina vitabu vidogo 66. Mungu alitumia wanaume waaminifu 40 hivi kuiandika Biblia. Vitabu vitano vya kwanza viliandikwa na Musa miaka 3,500 hivi iliyopita. Kitabu cha mwisho kiliandikwa na mtume Yohana zaidi ya miaka 1,900 iliyopita. Waandikaji wa Biblia waliandika mawazo ya nani? Mungu aliwasiliana na waandikaji wa Biblia kwa kutumia roho yake takatifu. (2 Samweli 23:2) Waliandika mawazo ya Mungu, si yao wenyewe. Kwa hivyo, Yehova ndiye Mtungaji wa Biblia.—Soma 2 Timotheo 3:16; 2 Petro 1:20, 21.
Tazama video Ni Nani Aliyeitunga Biblia?
2. Tunawezaje kuwa na hakika kwamba yale yaliyoandikwa katika Biblia ni ya kweli?
Tunajua kwamba Biblia ilitoka kwa Mungu kwa sababu inatabiri kwa usahihi kabisa mambo ya wakati ujao. Hakuna mwanadamu anayeweza kufanya hivyo. (Yoshua 23:14) Ni Mungu Mweza Yote pekee anayeweza kutabiri kwa usahihi wakati ujao wa mwanadamu.—Soma Isaya 42:9; 46:10.
Bila shaka, tungetarajia kitabu kutoka kwa Mungu kiwe cha pekee, na hivyo ndivyo Biblia ilivyo. Mabilioni ya Biblia yamegawanywa katika mamia ya lugha. Ijapokuwa iliandikwa zamani, Biblia inapatana na sayansi. Pia, waandikaji wake 40 hawapingani. * Zaidi ya hilo, Biblia inadhihirisha waziwazi upendo wa Mungu, na pia ina nguvu za kubadili maisha ya watu. Mambo hayo ya hakika yanawathibitishia mamilioni ya watu kuwa Biblia ni Neno la Mungu.—Soma 1 Wathesalonike 2:13.
Tazama video Tunawezaje Kuwa na Hakika Kwamba Yale Yaliyoandikwa Katika Biblia Ni ya Kweli?
3. Biblia ina ujumbe gani?
Biblia hukazia habari njema ya kwamba Mungu ana kusudi lenye upendo kuelekea wanadamu. Maandiko yanafafanua jinsi pendeleo la mwanadamu la kuishi katika dunia paradiso lilivyopotezwa na jinsi paradiso itakavyorudishwa hatimaye.—Soma Ufunuo 21:4, 5.
Pia, Neno la Mungu lina sheria, kanuni, na mashauri. Zaidi ya hayo, Biblia inafunua utu wa Mungu inaposimulia jinsi alivyoshughulika na wanadamu. Hivyo, Biblia inaweza kukusaidia kumjua Mungu. Inaeleza jinsi unavyoweza kuwa rafiki yake.—Soma Zaburi 19:7, 11; Yakobo 2:23; 4:8.
4. Unaweza kuielewa Biblia jinsi gani?
Broshua hii itakusaidia kuielewa Biblia kwa kutumia njia ileile ambayo Yesu alitumia. Alirejelea Maandiko na kufafanua “maana ya Maandiko.”—Soma Luka 24:27, 45.
Habari njema kutoka kwa Mungu ni yenye kusisimua sana. Hata hivyo, watu fulani hawapendezwi nayo, na wengine hata wanachukizwa nayo. Usivunjike moyo. Tumaini lako la kufurahia uzima wa milele linategemea kumjua Mungu.—Soma Yohana 17:3.
^ fu. 3 Ona broshua Kitabu kwa Ajili ya Watu Wote.
