Rai ida-idak nia lei la hanesan kona-ba saida mak “hahalok asalta seksuál”, neʼe bele refere ba hahalok seksuál nian neʼebé ema ida halo ba ema seluk maski ema neʼe lakohi, dala ruma envolve obriga ho forsa. Neʼe inklui abuzu seksuál ba labarik ka joven, relasaun seksuál ho família neʼebé besik, estraga feto ka mane. Dala ruma neʼe mós bele inklui doutór, mestre, ka ulun-naʼin relijiaun neʼebé aproveita ema iha dalan seksuál. Ema balu mak vítima ba asalta seksuál liuhusi liafuan ka hahalok, no ema neʼebé asalta sira ameasa atu labele kesar.

 Tuir peskiza ida, tinan-tinan iha Estadus Unidus, maizumenus besik ema naʼin-250.000 dehan katak ema asalta sira iha dalan seksuál. No maizumenus porsentu 50 husi sira mak idade 12 toʼo 18.

•   Bíblia bandu hahalok asalta seksuál. Bíblia konta kona-ba grupu ida neʼebé koko atu estraga mane naʼin-rua neʼebé vizita sidade Sodoma maizumenus tinan 4.000 liubá, akontesimentu neʼe hatudu sai razaun ida tansá Jeová halakon sidade neʼe. (Génesis 19:4-13) Liután neʼe, Ukun-Fuan neʼebé Maromak fó ba Moisés maizumenus tinan 3.500 liubá bandu ema atu labele halo relasaun seksuál ho família rasik, inklui asalta família iha dalan seksuál.​—Levítico 18:6.

•   Dala barak vítima koñese ema neʼebé asalta sira. Livru ida (Talking Sex With Your Kids) dehan: “Ema naʼin-rua husi naʼin-tolu neʼebé hetan estragu seksuál, koñese ema neʼebé ataka sira. Neʼe laʼós ema oin-foun neʼebé mai subasubar.”

•   Mane no feto sai vítima ba asalta seksuál. Iha Estadus Unidus, porsentu sanulu husi vítima sira mak mane. Tuir ajénsia ida naran RAINN (Rape, Abuse & Incest National Network), dehan katak baibain vítima mane sira sente taʼuk tanba sira hanoin barak se “asalta seksuál neʼe sei halo sira sai omoseksuál”, ka “ladún sente hanesan mane ida”.

•   Ita la hakfodak tanba asalta seksuál akontese beibeik. Bíblia fó-hatene nanis katak iha “loron ikus sira” ema barak sei “la hadomi malu”, “siʼak” no “la kontrola an”. (2 Timóteo 3:1-3) Ema neʼebé aproveita ema seluk hodi asalta sira iha dalan seksuál, hatudu duni hahalok sira-neʼe.

•   Hahalok asalta seksuál laʼós vítima nia sala. La iha ema ida neʼebé merese atu sai vítima ba asalta seksuál. Ema neʼebé abuza ema seluk mak tenke hatán ba ninia sala. Maibé, ita bele halo buat ruma hodi proteje an husi asalta seksuál.

•   Prepara an. Prepara nanis saida mak Ita sei halo se ema koko obriga Ita atu halo relasaun seksuál maski neʼe mak Ita-nia namora ka família. Feto joven ida naran Erin dehan katak Ita tenke prepara an ba situasaun naran deʼit neʼebé ema bele koko obriga Ita. Ita bele treinu kona-ba situasaun neʼebé bele mosu no prepara saida mak Ita sei halo. Erin dehan: “Maski neʼe finje deʼit, maibé karik neʼe bele proteje ita atu la sai vítima bainhira situasaun mosu duni.”

   Bíblia hatete: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek, . . . tanba loron sira-neʼe mak aat.”​—Éfeso 5:15, 16.

   Husu Ita-nia an: ‘Saida mak haʼu sei halo se ema ida kaer haʼu iha dalan neʼebé halo haʼu sente la diʼak?ʼ

•   Iha planu atu halai sees. Ajénsia RAINN rekomenda katak Ita “ho Ita-nia kolega ka família presiza iha fraze úniku ida neʼebé sai nuʼudar sinál atu nuneʼe se Ita sente la diʼak Ita bele telefone sira no fó sai Ita-nia situasaun hodi uza fraze úniku neʼe atu ema seluk la hatene. Tuirmai, Ita-nia belun ka família bele mai tula Ita ka fó razaun ruma atu Ita sai husi fatin neʼe”. Dalan diʼak liu atu bele hadook an husi susar mak hodi la tau Ita-nia an iha perigu laran.

   Bíblia hatete: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”​—Provérbios 22:3.

   Husu Ita-nia an: ‘Haʼu iha planu atu hasees an ka lae?ʼ

•   Deside nanis regra no halo tuir. Porezemplu, se Ita namora daudaun, Ita no Ita-nia namora tenke koʼalia hamutuk kona-ba hahalok saida mak diʼak no la diʼak atu hatudu ba malu. Se Ita-nia namora hanoin katak tau regra mak buat beik, Ita presiza buka namora seluk neʼebé respeitu Ita-nia morál.

   Bíblia dehan: “Domin la hatudu hahalok la respeitu, la buka diʼak ba ninia an rasik.”​—1 Korinto 13:4, 5.

   Husu Ita-nia an: ‘Morál saida mak haʼu hafolin? Hahalok hanesan saida mak hakat liu buat neʼebé loos?ʼ