Ita laran monu ba ema ruma, no imi naʼin-rua deside atu namora hodi haree se imi sei sai pár neʼebé diʼak nuʼudar kaben-naʼin ka lae. Saida mak buat balu neʼebé Ita tenke hatene nuʼudar Ita no Ita-nia doben koñese malu diʼak liután?

Iha informasaun neʼe

•  Koʼalia onestu ba malu

•  Hanoin neʼebé la hanesan

•  Namora sei lori estrese

 Ita no ema neʼebé Ita namora sei koñese malu didiʼak liután kuandu imi gasta tempu hamutuk. Ita sei aprende kona-ba ema ida nia hahalok liuhusi situasaun oioin.

 Maski nuneʼe, iha buat balu neʼebé imi presiza koʼalia nakloke ba malu. Nuʼudar Ita halo nuneʼe, koko la husik Ita-nia emosaun atu afeta Ita-nia hanoin.

 Tópiku neʼebé imi rua presiza koʼalia inklui:

•   Osan. Ita iha debe ruma ka lae? Susar ba Ita atu kontrola osan hira mak Ita gasta ka lae? Se imi kaben, oinsá mak imi sei halo desizaun kona-ba uza imi-nia osan?

•   Saúde. Ita iha saúde diʼak ka lae? Uluk Ita iha problema sériu ho saúde ka lae?

•   Planu. Saida mak Ita hakarak halo ho Ita-nia moris? Imi rua nia planu hanesan ka lae? Depois imi kaben, imi sei kontente nafatin maski imi labele kumpre imi-nia planu sira ka lae?

•   Família. Agora daudaun Ita iha responsabilidade atu tau matan ba Ita-nia família ruma ka lae? Ita hanoin katak iha futuru Ita sei tau matan ba família ruma ka lae? Ita hakarak atu iha oan ka lae? Se sin, oan naʼin-hira?

 Kuandu imi koʼalia kona-ba tópiku hanesan neʼe diʼak atu koʼalia nakloke no onestu. Labele subar ka troka informasaun ruma tan deʼit hakarak Ita-nia doben hanoin diʼak kona-ba Ita.—Ebreu 13:18.

 Hanoin toʼok: Ita presiza hatene saida kona-ba ema neʼebé Ita namora? Nia presiza hatene saida kona-ba Ita? Se Ita koʼalia nakloke agora oinsá mak ida-neʼe sei halo fasil liu atu koʼalia ba malu se aban bainrua imi deside atu kaben?

 Bíblia nia prinsípiu: “Koʼalia lia-loos ba malu.”—Éfeso 4:25.

 “Karik feto bele hanoin, ‘Iha fulan neen tan ami sei prenda”, maibé mane neʼe hanoin tinan ida tan mak prenda. Iha situasaun hanesan neʼe, karik feto sei sente laran-kanek no konfuzaun tanba nia hanoin neʼe sei akontese lalais liu. Tan neʼe, importante atu naʼin-rua iha hanoin neʼebé hanesan.”—Ariana, kaben tinan ida ona.

 La iha ema rua neʼebé hanesan deʼit. Entaun keta hanoin katak Ita no ema neʼebé Ita namora sei konkorda ka sente hanesan kona-ba buat hotu. Porezemplu, Ita-nia kultura no dalan neʼebé Ita sai boot bele afeta Ita-nia hanoin.

 Hanoin toʼok: Kuandu imi la konkorda kona-ba buat kiʼik ruma, imi ida-idak prontu ka lae atu troka imi-nia hanoin hodi halo dame se neʼe la kontra Bíblia nia matadalan?

 Bíblia nia prinsípiu: “Halo ema hotu haree katak imi la ulun-toos.”—Filipe 4:5.

 Maski imi hanoin katak imi mak pár neʼebé perfeitu, maibé imi sei iha hanoin neʼebé la hanesan. Hahalok neʼebé Ita hatudu bainhira la konkorda malu mak importante tebes.”—Matthew, kaben tinan lima ona.

 Namora bele uza Ita-nia tempu barak no neʼe karik bele halo Ita sente estrese. Saida mak bele ajuda?

 Tau limite. Keta okupadu demais ho namora toʼo la halo Ita-nia responsabilidade sira ka la iha tempu ho Ita-nia belun sira. Alana neʼebé kaben ona ba tinan lima, hatete: “Ita sei nafatin presiza Ita-nia belun sira depois Ita kaben, no sira mós nafatin presiza Ita. Keta dook husi sira tan deʼit agora Ita komesa namora.”

 Hanoin-hetan, kuandu Ita kaben tiha, Ita presiza fó tempu ba buat ida-idak iha Ita-nia moris. Diʼak atu koko no halo balansu ba buat sira-neʼe maski namora hela.

 Hanoin toʼok: Ita obriga demais Ita-nia doben atu gasta tempu no fó atensaun ba Ita ka lae? Ita sente katak Ita-nia doben hakarak buat barak liu husi Ita? Oinsá mak imi naʼin-rua bele halo balansu atu imi la sente katak tempu namora halo todan liu ba imi?

 Bíblia nia prinsípiu: “Iha tempu neʼebé loos ba buat hotu, tempu ba atividade hotu.”—Eclesiastes 3:1.

 “Se pasiar mak dalan ida deʼit atu ema gasta tempu hamutuk, moris kaben nian sei halo sira hakfodak tebes tanba neʼe la tuir buat neʼebé sira hanoin. Diʼak se sira bele halo atividade oioin hamutuk hanesan kompras, halo serbisu uma laran nian, no halo adorasaun hamutuk. Ida-neʼe bele ajuda sira hahú atu apoia malu iha moris kaben nian.”—Daniel, kaben tinan rua ona.

 Hanoin-hetan, namora mak períodu neʼebé temporáriu deʼit atu halo desizaun kona-ba kaben ka atu hapara relasaun romántiku neʼe. Parte 3 ba série neʼe sei koʼalia kona-ba buat neʼebé Ita presiza hanoin didiʼak kuandu halo desizaun neʼe.