Ita namora ona ba tempu balu, maibé Ita komesa duvida. Ita presiza kontinua relasaun neʼe ka para? Informasaun neʼe bele ajuda Ita atu halo desizaun.

Iha informasaun neʼe

•  Bainhira iha dúvida

•  Halo desizaun

•  Se Ita deside atu para namora

 Joven mane no feto neʼebé namora ba tempu balu, karik sira rekoñese katak sira naʼin-rua mak la hanesan duni kona-ba buat barak. Porezemplu:

•   Ema ida gosta liu bá tasi no ema seluk gosta liu atu saʼe foho.

•   Ema ida gosta atu ransu ho ema barak no ema seluk gosta ransu ho ema uitoan deʼit.

•   Ema ida bosok beibeik no ema seluk sempre onestu.

 Nota katak situasaun sira-neʼe mak la hanesan. Ida primeiru kona-ba buat neʼebé sira interese mak la hanesan. Segundu kona-ba toman neʼebé la hanesan. No terseiru kona-ba prinsípiu neʼebé la hanesan.

 Hanoin toʼok: Situasaun tolu neʼe, ida-neʼebé mak difisil liu atu rezolve se imi kaben? Ida-neʼebé mak imi bele rezolve hamutuk?

 Feen no laʼen bele iha interese ka toman neʼebé la hanesan, maibé sira nafatin halaʼo moris kaben nian neʼebé kontente. Tuir loloos, atu sira naʼin-rua moris kontente hamutuk, la dehan katak sira presiza hanesan deʼit kona-ba buat hotu. Iha situasaun balu, feen no laʼen aprende atu hatudu interese ba buat neʼebé sira-nia kaben gosta ka hetan benefísiu husi sira ida-idak nia toman. a

 Importante katak Ita no ema neʼebé sei sai Ita-nia kaben iha prinsípiu neʼebé hanesan kona-ba fiar, morál, no buat neʼebé loos ka sala. Se resposta mak lae, Ita presiza haree ida-neʼe nuʼudar sinál neʼebé hatudu katak karik presiza hapara relasaun neʼe.

 Porezemplu, hanoin kona-ba pár neʼebé iha relijiaun la hanesan. Livru Fighting for Your Marriage hatete: “Peskiza sira sempre hatudu katak feen-laʼen neʼebé relijiaun la hanesan fasil liu atu halo divórsiu.”

 Bíblia nia prinsípiu: “Keta sai ida deʼit ho ema neʼebé laʼós fiar-naʼin.”—2 Korinto 6:14.

 Bíblia hatete katak sira neʼebé kaben “sei hetan susar iha sira-nia moris”. (1 Korinto 7:28) Entaun keta hakfodak se imi hasoru ona susar balu durante imi namora.

 Problema kiʼik la hatudu katak imi-nia relasaun sei la hetan susesu. Husu ba Ita-nia an rasik: Ami bele rezolve problema neʼe ho dame ka lae? Imi naʼin-rua presiza duni iha abilidade neʼe se imi hakarak kaben.

 Bíblia nia prinsípiu: “Hatudu laran-diʼak ba malu, hanoin malu, perdua malu ho laran.”—Éfeso 4:32.

 Se imi naʼin-rua haksesuk malu beibeik ka haksesuk malu makaʼas, karik neʼe hatudu katak imi laʼós pár neʼebé diʼak. Se neʼe mak akontese, diʼak atu hatene ida-neʼe antes imi kaben.

 Buat neʼebé importante: Se Ita iha dúvida boot kona-ba ema neʼebé namora ho Ita ka Ita prontu atu kaben ka lae, keta taka matan deʼit ba dúvida sira-neʼe!

 Bíblia nia prinsípiu: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”—Provérbios 22:3.

 Para namora bele halo Ita sente laran-kanek tebes. Maski nuneʼe, se imi ida ka imi naʼin-rua kontinua iha dúvida boot kona-ba relasaun neʼe, karik diʼak liu hapara relasaun neʼe.

 Oinsá mak Ita bele halo nuneʼe? Diʼak liu atu la hapara relasaun neʼe liuhusi mensajen ka telefone deʼit. Buka tempu no fatin neʼebé loos atu koʼalia hamutuk kona-ba neʼe.

 Bíblia nia prinsípiu: “Koʼalia loloos ba malu.”—Zacarias 8:16.

 Bainhira para namora, neʼe la dehan katak Ita falla. Hanoin-hetan, namora mak tempu neʼebé ajuda Ita hodi halo desizaun atu kaben ho ema neʼe ka lae. Maski imi-nia relasaun para, maibé Ita bele aprende lisaun importante husi esperiénsia neʼe.

 Husu ba Ita-nia an: ‘Saida mak haʼu aprende kona-ba haʼu-nia an husi esperiénsia neʼe? Parte saida mak haʼu presiza hadiʼa antes kaben? Se haʼu namora fali ho ema seluk, saida mak haʼu sei halo neʼebé la hanesan ho uluk?’