ESPLIKASAUN KONA-BA ESKRITURA

João 3:16—“Maromak hadomi tebes mundu”

LOKE

“Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”—João 3:16, Tradusaun Mundu Foun.

“Basa Maromak hadomi tebes mundu toʼo fo Nia Oan-Mane mesak, atu ema hotu nebe fiar iha Nia la bele lakon, maibe hetan moris rohan laek.”—João 3:16, Liafuan diak ba imi, segunda edisaun.

Signifikadu husi João 3:16

Maromak hadomi ita no hakarak ita atu moris ba nafatin. Tan neʼe, nia haruka ninia Oan-Mane Jesus Kristu mai toʼo mundu. Bainhira Jesus moris iha rai, nia kumpre serbisu importante. Porezemplu, nia hanorin ninia dixípulu sira kona-ba ninia Aman Maromak. (1 Pedro 1:3) Nia mós entrega ninia moris atu salva ema. Atu hetan moris rohan-laek, ita tenke fiar ba Jesus.

Liafuan ‘Maromak fó nia Oan-Mane mesak’ a hatudu sai Maromak nia domin neʼebé boot tebes. Jesus mak Maromak nia Oan neʼebé espesiál. Oinsá? Jesus mesak deʼit mak ida neʼebé Maromak kria rasik. (Koloso 1:17) “Nia mak oan primeiru husi kriasaun hotu.” (Koloso 1:15) Liuhusi Jesus mak Maromak kria buat seluk hotu, inklui anju sira. Maski nuneʼe, Maromak Jeová b haruka ninia Oan doben “atu serbí no atu fó ninia moris hodi sosa fali ema barak”. (Mateus 20:28) Jesus hetan terus no mate atu nuneʼe ita bele sai livre husi sala no mate neʼebé ita simu husi Adão.—Roma 5:8, 12.

Hatudu fiar ba Jesus, neʼe laʼós deʼit fiar Jesus ka hatene saida mak nia halo mai ita. Ita presiza prova ita-nia fiar ba Maromak nia Oan-Mane hodi halo tuir ninia liafuan no moris tuir ninia ezemplu. (Mateus 7:24-27; 1 Pedro 2:21) Bíblia hatete: “Ema neʼebé hatudu fiar ba Oan-Mane hetan moris rohan-laek, no ema neʼebé lakohi halo tuir Oan-Mane sei la haree moris.”—João 3:36.

Kontestu husi João 3:16

Jesus koʼalia liafuan neʼe bainhira nia koʼalia ho ulun-naʼin relijiaun Judeu ida naran Nicodemos. (João 3:1, 2) Nuʼudar sira koʼalia hamutuk, Jesus esplika ho klaru kona-ba Maromak nia Ukun c no “moris dala ida tan”. (João 3:3) Jesus mós fó-hatene nanis kona-ba oinsá mak nia sei mate, hodi dehan: “Ema sei hiʼit saʼe Oan-Mane husi Ema [iha ai-riin], atu nuneʼe ema hotu neʼebé fiar nia bele hetan moris rohan-laek.” (João 3:14, 15) Tuirmai Jesus esplika katak oportunidade neʼe loke ba ema tanba Maromak hadomi tebes ema. Ikusliu, Jesus mós esplika katak atu hetan moris rohan-laek, ita presiza hatudu fiar no hahalok neʼebé halo Maromak kontente.—João 3:17-21.

a Liafuan neʼebé tradús nuʼudar oan-mane “mesak” iha lian Gregu mak monogenes, liafuan neʼe signifika ‘mesak no ida deʼit, mesak ida deʼit neʼebé úniku’.—A Greek-English Lexicon of the New Testament and Other Early Christian Literature, p. 658.

b Jeová mak Maromak nia naran rasik.—Salmo 83:18.

c Maromak nia Ukun, neʼebé Bíblia mós bolu nuʼudar “Ukun lalehan nian”, mak governu ida iha lalehan. (Mateus 10:7; Apokalipse 11:15) Maromak hili Kristu nuʼudar Liurai ba governu neʼe. Ukun neʼe sei kumpre Maromak nia hakarak ba mundu. (Daniel 2:44; Mateus 6:10) Atu hetan informasaun liután, haree “Saida mak Maromak nia Ukun?”