“Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.”—Provérbios 3:5, 6, Tradusaun Mundu Foun.

 “Fiar ba NAI ho o nia fuan laran tomak, no la bele sadere ba o nia kompriensaun rasik. Iha o nia dalan hotu, hanoin ba Nia, no Nia sei diriji o nia dalan sira.”—Provérbiu 3:5, 6, Bíblia Kadi Kapasidade.

 Ita presiza buka matadalan husi Maromak Jeová a duké sadere ba ita rasik nia matenek atu halo desizaun importante.

 “Tau fiar ba Jeová ho ó-nia laran tomak”. Ita hatudu katak ita tau fiar ba Maromak bainhira ita halo buat oioin tuir ninia hakarak. Ita presiza tau fiar ba Maromak ho ita-nia laran tomak. Iha Bíblia, liafuan “laran” baibain refere ba ema nia emosaun, motivu, hanoin no hahalok. Tan neʼe, tau fiar ba Maromak ho ita-nia laran tomak, envolve buat barak liu fali ita-nia sentimentu. Neʼe mak desizaun neʼebé ita foti tanba ita fiar ho laran tomak katak ita-nia Kriadór hatene saida mak diʼak liu ba ita.—Roma 12:1.

 “Labele sadere ba ó-nia matenek rasik”. Ita presiza tau fiar ba Maromak tanba ita labele sadere ba ita rasik nia matenek neʼebé la perfeitu. Se ita sadere deʼit ba ita rasik nia matenek ka foti desizaun tuir ita-nia sentimentu, karik foufoun ita sente katak ita halo desizaun diʼak maibé ikusmai desizaun neʼe lori konsekuénsia neʼebé aat. (Provérbios 14:12; Jeremias 17:9) Maromak nia matenek mak aas liu fali ita-nian. (Isaias 55:8, 9) Kuandu ita hanoin tuir Maromak nia hanoin, ita-nia moris sei hetan susesu.—Salmo 1:1-3; Provérbios 2:6-9; 16:20.

 “Hanoin didiʼak kona-ba nia iha ó-nia dalan hotu”. Ita presiza komprende Maromak nia haree iha situasaun hotu iha ita-nia moris no bainhira ita foti desizaun ruma neʼebé importante. Atu halo ida-neʼe, ita halo orasaun ba Maromak hodi husu ninia matadalan no halo tuir buat neʼebé nia hatete mai ita liuhusi ninia Liafuan Bíblia.—Salmo 25:4; 2 Timóteo 3:16, 17.

 “Nia sei halo loos ó-nia dalan sira”. Maromak sei halo loos ita-nia dalan hodi ajuda ita moris tuir ninia matadalan sira neʼebé loos. (Provérbios 11:5) Neʼe ajuda ita atu sees husi problema oioin no ita bele moris kontente liután.—Salmo 19:7, 8; Isaias 48:17, 18.

 Livru Provérbios husi Bíblia fó sai prinsípiu báziku sira neʼebé ajuda ita atu halaʼo moris kontente no halo Maromak kontente. Kapítulu sia primeiru hakerek nuʼudar konsellu husi aman ba ninia oan-mane doben. Kapítulu 3 hatudu sai kona-ba benefísiu sira neʼebé ita bele hetan bainhira ita hafolin no aplika matadalan husi ita-nia Kriadór.—Provérbios 3:13-26.