“Haʼu harohan katak Maromak neʼebé fó esperansa sei halo imi nakonu ho ksolok hotu no dame liuhusi imi-nia fiar ba nia, atu nuneʼe imi bele sai nakonu ho esperansa liuhusi espíritu santu nia kbiit.”—Roma 15:13, Tradusaun Mundu Foun.

 “Maromak esperansa nian halo imi nakonu ho ksolok hotu no dame tamba imi fiar, atu imi hetan esperansa wa’in liu tan housi kbiit Espiritu Santu nian.”—Roma 15:13, Liafuan diak ba imi, segunda edisaun.

 Apóstolu Paulo fó sai ninia hakarak katak Maromak sei halo ninia maluk Kristaun sira nakonu ho ‘ksolok no dame’. Kualidade sira-neʼe iha ligasaun ho esperansa neʼebé Maromak fó no espíritu santu nia kbiit.

 Liuhusi Maromak nia Liafuan Bíblia, ita bele aprende kona-ba esperansa neʼebé Maromak fó mai ita. Tuir Roma 15:4, “buat hotu neʼebé hakerek ona horiuluk kedas, hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita.” Bíblia fó sai Maromak nia promesa atu rezolve problema oioin neʼebé bele halo ema lakon esperansa, hanesan kiak, situasaun la justisa, moras no mate. (Apokalipse 21:4) Maromak sei uza Jesus Kristu atu kumpre Ninia promesa hotu, tan neʼe ita bele tau esperansa ba futuru.—Roma 15:12.

 Ita bele sai “nakonu” ho esperansa neʼebé Maromak fó, ka “iha esperansa waʼin liu tan” só deʼit se ita tau fiar ba Maromak. Kuandu ita aprende liután kona-ba nia, ita bele fiar metin liután ba nia. (Isaias 46:10; Tito 1:2) Esperansa neʼebé Maromak fó halo ita sai nakonu ho ksolok no dame maski ita hasoru susar oioin.—Roma 12:12.

 Dame, ksolok no esperansa mós iha ligasaun ho “espíritu santu”, neʼe mak Maromak nia kbiit, ka forsa neʼebé nia uza atu halaʼo ninia atividade. a Maromak uza espíritu santu atu kumpre ninia promesa, no neʼe lori esperansa. Espíritu neʼe mós bele prodús hahalok furak sira iha ema nia laran, hanesan ksolok no dame.—Galásia 5:22.

 Livru Roma mak karta ida ba ema Kristaun neʼebé hela iha sidade Roma. Ema Kristaun balu mak família Judeu, no iha mós sira neʼebé laʼós ema Judeu. Apóstolu Paulo anima sira hotu atu haburas unidade iha sira-nia hanoin no hahalok maski sira-nia situasaun moris no kultura mak la hanesan.—Roma 15:6.

 Paulo fó-hanoin ema Kristaun iha Roma katak Maromak hatete nanis ona kona-ba tempu neʼebé nasaun hotu sei adora Nia ho unidade. Atu konfirma ida-neʼe, Paulo temi liafuan husi Eskritura Lian Ebraiku b ba dala haat. (Roma 15:9-12) Paulo hakarak hanorin katak ema Judeu no ema husi nasaun seluk hotu bele hetan benefísiu husi Kristu no esperansa neʼebé hanesan husi Maromak. Tan neʼe, maski ida-idak nia situasaun moris la hanesan, ema hotu iha kongregasaun iha Roma tenke “simu malu”. Neʼe katak sira presiza hatudu laran-diʼak no laran-luak ba malu.—Roma 15:7.