Ohin loron, ita haree beibeik notísias no reportajen neʼebé fó sai akontesimentu aat oioin liuhusi televizaun, telefone, tablet, no komputadór.

 No labarik sira mós haree notísias sira-neʼe.

 Notísias neʼebé la diʼak bele halo oan sira sente laran-susar no taʼuk. Oinsá mak Ita bele proteje Ita-nia oan husi buat sira-neʼe?

•  Oinsá mak notísias fó impaktu ba labarik sira?

•  Oinsá Ita bele ajuda Ita-nia oan la laran-susar?

•  Oinsá se ita-nia oan haree rasik dezastre ruma?

•   Labarik barak sai laran-susar no taʼuk. Bainhira sira haree notísias neʼebé la diʼak, karik sira sente laran-kanek no triste tebes maski sira balu la fó sai ida-neʼe. a No kuandu sira haree sira-nia inan-aman sai laran-susar demais, neʼe bele halo sira hanoin barak liután.

•   Labarik sira bele hanoin sala kona-ba buat neʼebé sira haree iha notísias. Porezemplu, labarik balu bele hanoin katak buat neʼebé sira haree sei akontese mós ba sira rasik nia família. No kuandu sira haree beibeik vídeo neʼebé fó sai akontesimentu ida, karik sira bele hanoin katak buat neʼe akontese beibeik.

•   Susar ba labarik sira atu iha hanoin neʼebé loos kona-ba notísias. Karik sira seidauk hatene katak kompañia sira neʼebé fó sai notísias bele manán osan barak kuandu ema barak haree sira-nia reportajen. Tan neʼe, karik informasaun balu fó sai iha dalan neʼebé dada ema nia atensaun.

•   Keta husik sira haree beibeik notísias neʼebé la diʼak. Neʼe la dehan katak Ita-nia oan labele hatene buat neʼebé akontese iha mundu. Maibé la diʼak se sira haree ka rona beibeik reportajen neʼebé halo sira laran-susar.

   “Dala ruma haʼu ho haʼu-nia laʼen koʼalia demais kona-ba notísias ida, no la rekoñese katak neʼe afeta ami-nia oan sira.”—Maria.

   Bíblia nia prinsípiu: “Hanoin resin mak halo ema sente laran-todan.”—Provérbios 12:25.

•   Rona ho pasiénsia, no responde ho laran-diʼak. Se susar ba Ita-nia oan atu koʼalia kona-ba akontesimentu neʼe, anima nia atu halo dezeñu. Koʼalia hamutuk kona-ba buat neʼebé halo Ita-nia oan hanoin barak hodi uza liafuan neʼebé simples, maibé keta fó sai buat oioin neʼebé loloos nia la presiza hatene.

   “Ami-nia oan-feto sente kalma bainhira ami tuur hamutuk no rona ba nia. Nia sei la sente diʼak se ami hatete: ‘Moris mak neʼe. Ita tenke toman ho ida-neʼe.’”—Sarahi.

   Bíblia nia prinsípiu: “Ema hotu tenke lalais atu rona, la ansi atu koʼalia.”—Tiago 1:19.

•   Ajuda Ita-nia oan atu iha hanoin neʼebé loos kona-ba notísias. Porezemplu, notísias kona-ba ema naʼok labarik karik haree hanesan krime neʼe akontese beibeik, maibé tuir loloos lae. Esplika ba Ita-nia oan kona-ba buat neʼebé Ita halo atu proteje sira. Diʼak mós atu fó-hanoin sira katak notísias neʼe fó sai tanba baibain neʼe la akontese.

   “Ajuda Ita-nia oan atu iha sentimentu hakmatek. Baibain buat neʼebé nia sente mai husi ninia hanoin, tan neʼe se ita ajuda ita-nia oan atu tau fokus ba buat neʼebé pozitivu, sira bele sente hakmatek.”—Lourdes.

   Bíblia nia prinsípiu: “Ema matenek nia laran book nia atu koʼalia liafuan neʼebé matenek no ninia liafuan sira halo ema fiar.”—Provérbios 16:23.