Imajina toʼok, mane ida tuur iha rai, ninia isin nakonu ho fisur aat, husi ulun toʼo ain. Nia tuur mesamesak, hateke tun ba rai no la iha forsa atu duni lalar sira neʼebé semo haleʼu nia. Nia tuur iha ahi-kadesan laran neʼebé hatudu katak nia laran-triste daudaun, no nia koi ninia isin hodi uza sanan-rai nia rohan. Nia lakon ona buat barak. Uluk ema respeitu tebes nia, maibé agora sira hakribi nia. Ninia kolega, viziñu, no família mós husik hela nia. Ema oioin inklui labarik sira goza nia. Nia hanoin katak ninia Maromak Jeová mós kontra hasoru nia, maibé loloos ninia hanoin neʼe sala.—Job 2:8; 19:18, 22.

 Mane neʼe naran Job. Kona-ba nia, Maromak dehan: “Iha mundu, la iha ema ida hanesan nia.” (Job 1:8) Tinan atus ba atus liutiha, Jeová nafatin hanoin Job nuʼudar ema diʼak tebes neʼebé hatudu hahalok loos.—Ezequiel 14:14, 20.

 Ita hasoru terus no susar ka lae? Ita bele hetan kmaan husi Job nia istória. Neʼe mós bele ajuda ita hatene didiʼak kona-ba hahalok ida neʼebé Maromak nia atan hotu presiza haburas, neʼe mak integridade ka laran-metin. Ema bele hatudu integridade hodi hatudu laran-metin ba Maromak, serbí nia ho laran tomak no iha morál neʼebé moos maski hasoru susar no terus. Mai ita aprende liután husi Job nia ezemplu.

 Ita bele fiar katak Maromak nia atan Moisés mak hakerek istória kona-ba Job tempu balu depois Job mate. Maromak nia espíritu santu dirije Moisés atu hakerek laʼós deʼit kona-ba buat neʼebé akontese ba Job iha rai, maibé mós hakerek kona-ba buat neʼebé akontese iha lalehan.

 Parte primeiru husi livru Job fó sai katak foufoun Job moris ho kontente. Nia riku tebes, koñesidu, no ema barak respeitu nia iha rai-Uz, karik rai-Arábia nia parte norte. Job hatudu laran-luak ba ema kiak sira no nia mós apoia no proteje ema sira neʼebé la iha kbiit atu proteje sira-nia an rasik. Job no ninia feen iha oan hamutuk naʼin-10. Buat neʼebé importante liu mak Job hafolin ninia relasaun diʼak ho Jeová. Nia hakaʼas an atu halo Jeová kontente, hanesan buat neʼebé Abraão, Isaac, Jacob no José halo. Hanesan mane sira-neʼe, Job mak hanesan amlulik ba ninia família no oferese beibeik sakrifísiu atu ninia oan sira bele iha relasaun diʼak ho Maromak.—Job 1:1-5; 31:16-22.

 Maibé derrepente deʼit istória iha livru Job fó sai kona-ba lalehan. Ita bele lee kona-ba buat neʼebé akontese iha lalehan, no ita bele hatene kona-ba buat neʼebé Job rasik la hatene. Maromak Jeová nia anju sira neʼebé laran-metin halibur hamutuk iha Maromak nia oin, no anju kontradór neʼebé bolu nuʼudar Satanás tama iha sira-nia leet. Jeová hatene katak Satanás hakribi Job, entaun Maromak koʼalia ba Satanás kona-ba Job nia integridade neʼebé kapás. Satanás hatán hodi dehan: “Se Job la hetan buat ida, nia sei hamtaʼuk nafatin Maromak ka lae? Ita mak tau lutu haleʼu nia, ninia uma no buat hotu neʼebé nia iha hodi proteje nia, loos ka lae?” Satanás odi ema neʼebé hatudu integridade. Bainhira ema hatudu laran-metin ba Maromak Jeová, sira hatudu katak Satanás mak traidór neʼebé la iha domin. Tan neʼe, Satanás dehan katak Job serbí Maromak tan deʼit buka buat diʼak ba ninia an, no se nia lakon buat hotu nia sei hatete aat Maromak.—Job 1:6-11.

 Job la hatene, maibé Jeová fó oportunidade ba Job atu prova katak Satanás sala. Jeová fó lisensa ba Satanás atu halakon buat hotu neʼebé Job iha, maibé Jeová la fó lisensa ba Satanás atu halo aat ba Job. Satanás hahú kedas atu hamosu buat aat oioin. Iha loron ida deʼit, Satanás hamosu akontesimentu boot oioin ba Job. Job nia animál hakiak sira derrepente deʼit mate, foufoun karau no kuda-burru, tuirmai bibi-malae, tuirmai tan mak kuda-kamelu. Aat liután mak ninia atan sira neʼebé tau matan animál sira-neʼe mós mate. Ema ida fó-hatene ba Job katak “ahi husi Maromak tun husi lalehan”, karik rai-lakan mak oho Job nia atan sira no bibi-malae. Antes Job iha tempu atu bele komprende kona-ba buat aat neʼebé akontese, katak ninia atan sira-neʼe mate hotu no agora nia sai kiak tebes, buat neʼebé aat liután akontese. Job nia oan naʼin-10 halibur hamutuk iha Job nia oan-mane boot nia uma, no anin-boot sobu uma neʼe no ninia oan sira mate hotu.—Job 1:12-19.

 Karik susar ba ita atu komprende saida mak Job sente iha tempu neʼebá. Job lees ninia roupa, tesi hotu ninia fuuk, no hakneʼak ho oin ba rai. Job hanoin katak tanba Maromak mak fó buat diʼak hotu ba nia, entaun Maromak mós foti fali buat sira-neʼe. Satanás halo dezastre sira-neʼe akontese iha dalan neʼebé book ema atu hanoin katak dezastre sira-neʼe mai husi Maromak. Maski nuneʼe, Job la hatete aat Maromak no neʼe la hanesan duni ho Satanás nia planu. Job dehan: “Haʼu hein katak Jeová nia naran sei hetan hahiʼi nafatin.”—Job 1:20-22.

 Satanás hirus tebes no lakohi rende an. Dala ida tan, nia bá hasoru Jeová bainhira anju sira halibur hamutuk. Jeová gaba Job dala ida tan tanba maski hetan susar boot oioin husi Satanás, nia nafatin hatudu integridade. Satanás hatán hodi dehan: “Se ema ida besik ona atu mate, nia sei fó buat hotu neʼebé nia iha atu salva nia moris. Maibé agora, lolo Ita-nia liman bá no kona ninia ruin no isin, no nia sei hatete aat duni ba Ita.” Satanás fiar metin katak se Job rasik mak kona moras boot, nia sei koʼalia aat Maromak. Jeová fiar metin katak Job sei kontinua laran-metin, entaun nia husik Satanás atu halo Job moras, maibé Jeová la husik Satanás atu oho Job.—Job 2:1-6.

 Lakleur deʼit, Job hetan moras neʼebé aat hanesan temi ona iha leten. Imajina toʼok kona-ba Job nia feen neʼebé kasian loos. Nia laran-kanek tebes tanba ninia oan naʼin-10 mate hotu, no agora ninia laʼen sente moras tebes, no la iha buat ida mak bele ajuda ninia laʼen. Nia sente estrese tebes toʼo hakilar: “Ó sei laran-metin nafatin toʼo agora ka? Hatete aat Maromak no mate deʼit bá!” Baibain Job nia feen la koʼalia hanesan neʼe. Job rekoñese katak ninia feen koʼalia hanesan neʼe tanba estrese demais. Maski nuneʼe, Job lakohi hatete aat ninia Maromak, no la halo sala ho ninia liafuan.—Job 2:7-10.

 Ita hatene ka lae katak istória kona-ba Job mak istória tebes, no neʼe mós kona ita? Bainhira Satanás duun Job, nia mós duun ema hotu. Satanás dehan: “Se ema ida besik ona atu mate, nia sei fó buat hotu neʼebé nia iha atu salva nia moris.” Satanás fiar katak ema sei nunka bele hatudu laran-metin neʼebé loos ba Maromak. Nia fiar katak ita ida-idak la iha domin neʼebé loos ba Maromak, no Ita sei husik tiha Maromak hodi bele salva Ita-nia moris bainhira iha perigu laran. Neʼe hanesan Satanás dehan katak Ita mak hanoin an deʼit hanesan nia. Ita hakarak atu hatudu katak nia mak sala ka lae? Ita ida-idak iha oportunidade atu prova ida-neʼe. (Provérbios 27:11) Agora, mai ita haree susar saida tan mak Job hasoru.

 Mane naʼin-tolu neʼebé Bíblia temi nuʼudar Job nia kolega halo viajen atu vizita Job hodi fó kmaan ba nia tanba sira rona kona-ba susar oioin neʼebé Job hasoru. Bainhira sira haree Job husi dook, sira labele rekoñese katak neʼe mak Job. Moras neʼe halo Job sente terus tebes no mós halo ninia kulit sai metan, tan neʼe ninia isin la hanesan duni ho uluk. Elifaz, Bildad, no Zofar tanis ho lian makaʼas no kari rai-rahun ba sira-nia ulun hodi hatudu katak sira triste tebes. Tuirmai sira tuur iha rai hamutuk ho Job no la koʼalia buat ida. Sira tuur nonook deʼit iha neʼebá loron no kalan toʼo semana ida. Sira nonook hanesan neʼe laʼós atu fó kmaan ba Job. Sira la interese ba Job no sira la koko atu husu pergunta atu buka-hatene Job nia situasaun. Sira hatene deʼit katak Job moras tanba sira bele haree ida-neʼe ho sira-nia matan rasik.—Job 2:11-13; 30:30.

 Ikusmai, Job mak hahú koʼalia. Nia fó sai katak nia terus tebetebes no nia koʼalia aat kona-ba ninia loron-moris. No nia fó sai razaun boot ida tanbasá nia sente laran-susar tebes. Nia hanoin katak Maromak mak hamosu susar sira-neʼe. (Job 3:1, 2, 23) Maski Job nia fiar mak metin, nia presiza tebes atu hetan kmaan. Maibé bainhira ninia kolega naʼin-tolu hahú koʼalia, Job hatene katak diʼak liu sira nonook deʼit.—Job 13:5.

 Elifaz neʼebé karik idade boot liu fali sira hotu hahú koʼalia. Depois mak kolega naʼin-rua seluk mós koʼalia. Kolega naʼin-rua neʼe maizumenus koʼalia tuir deʼit Elifaz nia liafuan. Sira koʼalia deʼit buat neʼebé baibain ema dehan kona-ba Maromak no neʼe rona hanesan buat neʼebé loos, porezemplu Maromak mak aas liu, nia fó-kastigu ba ema aat sira no nia fó kolen ba ema diʼak sira. Maibé, husi primeiru kedas sira-nia liafuan la hatudu laran-diʼak ba Job. Elifaz esplika iha dalan neʼebé lójiku, maibé la tuir lia-loos. Nia esplika katak se Maromak mak iha hahalok neʼebé diʼak no nia fó-kastigu deʼit ba ema aat sira, entaun klaru katak Job halo buat ruma neʼebé aat, tan neʼe mak nia hasoru susar sira.—Job 4:1, 7, 8; 5:3-6.

 Ita la hakfodak bainhira Job la gosta Elifaz nia hanoin no konsellu. Job hatudu ho klaru katak nia la simu ida-neʼe. (Job 6:25) Maibé kolega naʼin-tolu neʼe fiar liután katak Job halo ona sala no subar ida-neʼe no nia mós merese simu buat aat hotu neʼebé akontese ba nia. Elifaz duun katak Job mak ema neʼebé foti an, ema laran-aat, no la hamtaʼuk Maromak. (Job 15:4, 7-9, 20-24; 22:6-11) Zofar fó konsellu ba Job atu para halo hahalok aat no labele haksolok ho hahalok sala. (Job 11:2, 3, 14; 20:5, 12, 13) No Bildad hatete buat neʼebé mak aat loos. Nia dehan katak Job nia oan-mane sira halo sala ruma, tan neʼe sira merese mate hanesan neʼe.—Job 8:4, 13.

 Mane naʼin-tolu neʼe halo buat neʼebé mak aat liután. Sira dehan katak Job la hatudu integridade ba Maromak, no mós dehan katak saugati deʼit atu hakaʼas an hatudu integridade ba Maromak. Elifaz konta katak nia hasoru ona kriatura espíritu ida toʼo nia sente taʼuk no isin-fulun hamriik. Depois nia hasoru tiha anju aat neʼe, Elifaz halo konkluzaun katak Maromak “la fiar ninia atan sira, no nia fó-sala ba ninia anju sira”. Se ideia neʼe mak loos, neʼe katak ema sei nunka bele halo Maromak kontente. Ideia neʼe mak perigu hanesan ho venenu tanba se ema ruma fiar ida-neʼe, neʼe bele estraga ninia fiar ba Maromak. Tuirmai Bildad dehan katak Maromak la interese ba Job nia integridade, hanesan nia la interese ba ular-oan nia integridade.—Job 4:12-18; 15:15; 22:2, 3; 25:4-6.

 Ita koko ona ka lae atu fó kmaan ba ema neʼebé hasoru daudaun terus? La fasil atu halo ida-neʼe. Maibé ita bele aprende buat barak husi Job nia “kolega” naʼin-tolu neʼe, liuliu kona-ba buat neʼebé ita labele hatete. Sira naʼin-tolu koʼalia buat oioin neʼebé rona hanesan matenek no lójiku, maibé sira la hatudu laran-diʼak ba Job no sira mós la temi Job nia naran bainhira koʼalia ho nia. Sira la hanoin kona-ba laran-kanek neʼebé Job sente no sira mós la hanoin katak sira presiza koʼalia ho laran-diʼak ba Job. a Bainhira ema ruma neʼebé ita hadomi sente triste, ita presiza koʼalia ho laran-diʼak, hatudu katak ita hanoin sira no mós hatudu laran-diʼak. Koko atu ajuda hametin sira-nia fiar no anima sira liuhusi ajuda sira atu tau konfiansa ba Maromak no tau fiar ba Maromak nia laran-diʼak, laran-sadiʼa no justisa. Neʼe mak buat neʼebé Job sei halo ba kolega naʼin-tolu neʼe atu fó kmaan ba sira se sira mak hasoru susar. (Job 16:4, 5) Saida mak Job halo bainhira kolega sira-neʼe koko Job nia integridade ho liafuan barak?

 Job kasian tebes, nia sente laran-triste ona ho susar neʼebé nia hasoru antes sira hahú koʼalia hamutuk. Husi primeiru kedas Job dehan katak dala ruma nia “koʼalia liafuan arbiru deʼit” no koʼalia hanesan “mane neʼebé laran-taridu”. (Job 6:3, 26) Ita bele komprende tanbasá nia koʼalia hanesan neʼe. Job nia liafuan hatudu sai katak nia laran-triste duni. Ninia liafuan mós hatudu katak nia ladún komprende saida mak akontese. Derrepente deʼit dezastre boot akontese ba nia no mós ba ninia família. No buat sira-neʼe haree hanesan Maromak mak hamosu, tan neʼe Job hanoin katak Jeová mak fó susar ba nia. Job halo konkluzaun bazeia deʼit ba ideia sira neʼebé sala.

 Maski nuneʼe, Job iha fiar neʼebé boot no metin. Job hatudu sai ninia fiar liuhusi ninia liafuan sira neʼebé nia koʼalia ba ninia kolega naʼin-tolu. Job nia liafuan mak loos, furak, no bele anima ita ohin loron. Bainhira Job koʼalia kona-ba Jeová nia kriasaun neʼebé furak, nia fó glória ba Maromak kona-ba buat neʼebé ema sei nunka bele hatene se Maromak la fó-hatene ba nia. Porezemplu, Job dehan katak “mundu la tara ba buat ida”. Tinan atus ba atus liutiha husi Job nia tempu mak sientista sira foin deskobre kona-ba neʼe. b (Job 26:7) No Job koʼalia kona-ba ninia esperansa ba futuru, neʼebé fiar-naʼin sira seluk mós iha. Job fiar katak se nia mate, Maromak sei hanoin-hetan nia, hanoin nia, no ikusmai sei fó moris hiʼas ba nia.—Job 14:13-15; Ebreu 11:17-19, 35.

 Oinsá ho ema nia integridade? Elifaz no ninia kolega naʼin-rua koʼalia beibeik katak Maromak la interese ho ema nia integridade. Job simu ideia aat neʼe ka lae? Lae duni. Job dehan katak Maromak hafolin ema nia integridade. Ho fiar metin nia dehan katak Jeová “sei hatene haʼu-nia laran-metin”. (Job 31:6) Laʼós neʼe deʼit, Job mós hatene katak kolega naʼin-tolu neʼe nia ideia koko ninia integridade. Ida-neʼe book Job atu koʼalia naruk no esplika didiʼak toʼo kolega naʼin-tolu neʼe labele hatán fali nia.

 Job komprende katak nia presiza hatudu sai ninia integridade liuhusi dalan neʼebé nia halaʼo ninia moris. Tan neʼe, nia esplika oinsá nia nafatin hatudu integridade iha buat hotu neʼebé nia halo. Porezemplu, Job hasees an husi adorasaun ba estátua, nia trata ema ho laran-diʼak no ho dignidade, nia mantein morál neʼebé moos, hafolin moris kaben nian no importante liu mak nia kontinua serbí Jeová ho laran-metin nuʼudar Maromak loos mesak ida deʼit. Tan neʼe mak Job ho fiar metin hatete: “Toʼo haʼu mate, haʼu sei nunka husik haʼu-nia laran-metin!”—Job 27:5; 31:1, 2, 9-11, 16-18, 26-28.

 Ita hafolin integridade hanesan Job ka lae? Fasil deʼit atu temi kona-ba neʼe, maibé Job komprende katak la toʼo atu hatete katak ita nafatin kaer metin ita-nia integridade, maibé ita presiza hatudu sai ita-nia integridade liuhusi ita-nia hahalok. Ita bele hatudu sai ita-nia integridade liuhusi halo tuir Maromak no hatudu hahalok diʼak iha ita-nia moris loroloron, maski ita hasoru susar oioin. Bainhira ita halo hanesan neʼe, ita bele halo Jeová kontente no halo Satanás estrese hanesan buat neʼebé Job halo iha tempu uluk. Neʼe mak dalan diʼak liu atu banati-tuir Job nia fiar.

 Maibé, Job nia istória seidauk remata. Job fokus demais atu prova katak nia mak ema neʼebé laran-loos toʼo haluha atu defende Maromak nia naran diʼak. Nia presiza hetan korrije no simu ajuda hodi bele haree situasaun tuir Maromak nia haree. Job mós nafatin terus tanba moras no mós laran-triste, tan neʼe nia presiza tebes atu hetan kmaan. Saida mak Jeová halo atu ajuda Job neʼebé hatudu fiar no integridade? Informasaun seluk husi série neʼe sei koʼalia kona-ba neʼe.