Bíblia temi kona-ba tato dala ida deʼit, iha Levítico 19:28, neʼebé dehan: “Imi labele halo tato iha imi-nia isin.” Maromak fó mandamentu neʼe ba nasaun Izraél atu halo sira diferensa ho nasaun seluk neʼebé tau marka iha sira-nia isin-lolon ho símbolu ka naran ba sira-nia maromak oioin. (Deuteronómio 14:2) Maski Ukun-Fuan neʼe laʼós fó ba ema Kristaun sira, maibé ita presiza hanoin kleʼan kona-ba prinsípiu neʼe.

Bele ka lae ema Kristaun ida halo tato?

 Versíkulu sira tuirmai bele ajuda Ita atu hanoin kleʼan kona-ba neʼe:

•   “Nuneʼe mós haʼu hakarak katak feto sira hafurak sira-nia an . . . ho respeitu.” (1 Timóteo 2:9) Prinsípiu neʼe aplika ba feto no mós mane. Ita tenke respeitu ema seluk nia hanoin no la dada liu atensaun ba Ita-nia an.

•   Ema balu halo tato tanba hakarak atu hatudu sai sira-nia identidade ka moris livre, no ema balu tan halo tato atu hatudu katak sira iha direitu ba sira-nia isin. Maski nuneʼe, Bíblia fó laran-manas ba ema Kristaun sira: “Imi fó imi-nia isin nuʼudar sakrifísiu neʼebé moris, santu no Maromak simu, katak halo serbisu sagradu ho imi-nia kbiit atu hanoin.” (Roma 12:1) Uza Ita-nia “kbiit atu hanoin” atu analiza tanbasá Ita hakarak halo tato. Se ida-neʼe mak tanba Ita hakarak tuir deʼit buat neʼebé ema seluk halo ka atu hatudu deʼit katak Ita mak membru husi grupu ruma, hanoin-hetan katak karik Ita-nia hanoin la permanente hanesan tato. Hodi hanoin didiʼak kona-ba saida mak book Ita atu halo tato, bele ajuda Ita atu halo desizaun neʼebé matenek.​—Provérbios 4:7.

•   “Ema badinas nia planu sei hetan duni susesu, maibé ema hotu neʼebé ansi sei sai kiak duni.” (Provérbios 21:5) Dala barak ema foti desizaun ho ansi atu halo tato, maibé neʼe bele lori impaktu ba tempu naruk iha sira-nia relasaun ho ema seluk no bainhira atu buka serbisu. Baibain, atu hamoos tato presiza selu karun no isin moras. Ema barak neʼebé halo tato ikusmai arrepende an ho sira-nia desizaun atu halo tato. Ita hatene ida-neʼe liuhusi peskiza neʼebé ema halo, no mós fatin atu hamoos tato aumenta ba beibeik.