Saida mak Bíblia nia hanorin kona-ba jejún?
Bíblia nia resposta
Iha Bíblia nia tempu, Maromak simu ema nia jejún, se nia halo ida-neʼe ho razaun neʼebé loos. Maibé bainhira ema halo jejún ho razaun neʼebé la loos, Maromak la kontente ho ida-neʼe. Maski nuneʼe, Bíblia la haruka ka bandu ema atu halo jejún ohin loron.
Iha Bíblia nia tempu, bainhira mak ema balu halo jejún?
Kuandu buka matadalan no ajuda husi Maromak. Ema sira neʼebé halo viajen ba Jeruzalein, halo jejún atu hatudu katak sira ho laran husu ajuda husi Maromak. (Ezras 8:21-23) Dala ruma Paulo no Barnabé halo jejún bainhira sira hili katuas kongregasaun sira.—Apóstolu 14:23.
Kuandu tau fokus hodi halo Maromak nia hakarak. Depois hetan batizmu, Jesus halo jejún durante loron 40 atu sai prontu halo serbisu neʼebé Maromak fó ba nia.—Lucas 4:1, 2.
Kuandu hatudu katak arrepende an husi sala. Liuhusi profeta Joel, Maromak fó sai ba povu neʼebé la laran-metin: “Fila fali mai haʼu ho imi-nia laran tomak, halo jejún, tanis no halerik bá.”—Joel 2:12-15.
Kuandu selebra Loron Hamoos Sala nian. Ukun-Fuan neʼebé Maromak fó ba ema Izraél inklui mandamentu atu halo jejún iha Loron Hamoos Sala nian neʼebé selebra tinan-tinan. a (Levítico 16:29-31) Hodi halo jejún, neʼe ajuda sira hanoin-hetan katak sira la perfeitu no sira presiza hetan perdua husi Maromak.
Razaun neʼebé sala atu halo jejún?
Atu dada ema nia atensaun. Jesus hanorin katak jejún neʼebé liga ho adorasaun mak buat neʼebé privadu, entre ema neʼe no Maromak.—Mateus 6:16-18.
Atu hatudu katak Ita mak ema laran-loos. Jejún la halo ema laran-loos liu iha dalan morál ka diʼak liu iha dalan espirituál.—Lucas 18:9-14.
Atu taka sala sira neʼebé ita halo ho neon. (Isaias 58:3, 4) Maromak sei simu ema nia jejún, se ema neʼe halo tuir Maromak no arrepende an ho laran kona-ba ninia sala.
Atu halo tuir deʼit kostume relijiaun nian. (Isaias 58:5-7) Maromak mak hanesan ho aman ida neʼebé la sente kontente bainhira ninia oan hatudu domin ba aman tan deʼit obriga an, laʼós husi laran.
Ema Kristaun tenke halo jejún ka lae?
Lae. Maromak haruka ema Izraél atu halo jejún iha Loron Hamoos Sala nian, maibé Maromak hapara selebrasaun neʼe kuandu Jesus hamoos ema nia sala ba nafatin. (Ebreu 9:24-26; 1 Pedro 3:18) Ema Kristaun la moris tan iha Moisés nia Ukun-Fuan okos, neʼe inklui Loron Hamoos Sala nian. (Roma 10:4; Koloso 2:13, 14) Maski nuneʼe, ema Kristaun ida-idak bele deside rasik se nia hakarak atu halo jejún ka lae.—Roma 14:1-4.
Ema Kristaun rekoñese katak jejún laʼós parte importante iha sira-nia adorasaun. Bíblia nunka liga jejún ho sentimentu kontente. Maibé ema Kristaun loos bele sente ksolok hodi haleno Jeová nia hahalok, “Maromak neʼebé kontente”.—1 Timóteo 1:11; Eclesiastes 3:12, 13; Galásia 5:22.
Hanoin neʼebé sala kona-ba Bíblia nia hanorin kona-ba jejún
Hanoin neʼebé sala: Ema Kristaun tenke halo jejún atu komemora loron 40 Jesus halo jejún iha rai-fuik maran.
Hanoin neʼebé loos: Jesus nunka fó mandamentu atu halo jejún hanesan neʼe, no la iha eskritura neʼebé hatudu katak ema Kristaun iha apóstolu sira-nia tempu halo ida-neʼe. b
Hanoin neʼebé sala: Ema Kristaun tenke halo jejún bainhira komemora Jesus nia mate.
Hanoin neʼebé loos: Jesus la haruka ninia dixípulu sira atu halo jejún hodi komemora ninia mate. (Lucas 22:14-18) Maski Jesus hatete katak ninia dixípulu sira sei halo jejún bainhira nia mate, maibé nia la fó mandamentu kona-ba neʼe, nia fó sai deʼit kona-ba saida mak sei akontese. (Mateus 9:15) Bíblia haruka ema Kristaun neʼebé hamlaha, atu fila ba uma no han uluk antes atu tuir komemorasaun ba Jesus nia mate.—1 Korinto 11:33, 34.
a Maromak hatete ba ema Izraél: “Imi tenke hatudu katak imi triste” iha Loron Hamoos Sala nian. (Levítico 16:29, 31) Fraze neʼe signifika atu halo jejún. (Isaias 58:3) Tan neʼe Bíblia ida (Contemporary English Version) tradús eskritura neʼe nuʼudar “imi hatudu katak imi arrepende imi-nia sala hodi la han”.
b Livru New Catholic Encyclopedia esplika istória kona-ba halo jejún durante loron 40 naran Quaresma, hodi hatete: “Husi tinan 1 toʼo tinan 300 EC, bainhira selebrasaun Páskua, ema halo jejún la liu semana ida, baibain sira jejún ba loron ida ka rua deʼit. . . . Primeiravés ema temi kona-ba halo jejún ba loron 40 mak iha livru lima kona-ba enkontru boot iha sidade Nicaea, maibé matenek-naʼin sira la konkorda malu katak neʼe refere duni ba Quaresma ka lae.”—Edisaun Segundu, Volume 8, pájina 468.
Karik Ita sei gosta
PERGUNTA KONA-BA BÍBLIA
Maromak sei perdua haʼu ka lae?
Haree toʼok saida mak Bíblia hanorin kona-ba hakat sira atu Maromak perdua ita.
KONA-BA AMI
Husu atu hetan vizita
Halo diskusaun kona-ba Ita-nia pergunta ruma neʼebé liga ho Bíblia, ka aprende liután kona-ba Testemuña ba Jeová.