Bíblia dehan saida kona-ba Natál?

LOKE

Bíblia nia resposta

Bíblia la fó sai Jesus nia loron-moris, no mós la dehan katak ita presiza selebra Jesus nia loron-moris. McClintock and Strong’s Cyclopedia dehan: “Maromak la haruka ita atu selebra Natál, no livru Testamentu Foun la koʼalia kona-ba Natál.”

Loloos, kuandu ita buka-hatene kona-ba oinsá mak selebrasaun Natál hahú, ita bele hatene katak selebrasaun neʼe mai husi ema jentiu nia kostume. Bíblia hanorin katak ita bele halo Maromak la kontente se ita adora nia iha dalan neʼebé nia la simu.—Éxodo 32:5-7.

Natál nia hun mai husi neʼebé

Selebra Jesus nia loron-moris: “Ema Kristaun iha tempu antigu la selebra [Jesus nia] loron-moris tanba sira hanoin katak selebra ema ida nia loron-moris mak ema jentiu nia kostume.”—The World Book Encyclopedia.
Loron 25 Dezembru: La iha evidénsia neʼebé hatudu katak Jesus moris iha loron neʼe. Parese ulun-naʼin igreja sira mak hili data neʼe hodi tuir ema jentiu sira-nia selebrasaun neʼebé halaʼo iha tempu malirin.
Fó prezente ba malu, prepara hahán espesiál, halo festa: Livru The Encyclopedia Americana dehan: “Saturnais mak festa neʼebé ema Roma selebra iha fulan-Dezembru nia klaran, no ida-neʼe mak hun ba kostume oioin iha loron Natál. Porezemplu kostume hanesan halo festa boot, fó prezente ba malu, no sunu lilin sira.” Encyclopædia Britannica dehan katak “serbisu no negósiu hotu para” durante Saturnais.
Lampu Natál: Tuir livru The Encyclopedia of Religion, ema Europa enfeita sira-nia uma “ho lampu no ai neʼebé nafatin buras iha tempu malirin” atu halaʼo selebrasaun iha tempu malirin neʼebé kalan mak sai naruk liu durante fulan-Dezembru, no atu kontra hasoru espíritu aat.
Ai-visku, ai-azeviñu: Ai rua neʼe baibain uza atu enfeita iha tempu Natál. “Grupu Druid fiar katak ai-visku iha forsa espesiál. Ema adora ai-azeviñu neʼebé sempre iha tahan buras nuʼudar buat neʼebé fó garantia katak loro-matan sei mosu fali.”—The Encyclopedia Americana.
Ai Natál: “Adorasaun ba ai mak buat neʼebé baibain ba jentiu sira iha Europa, no sira kontinua halo ida-neʼe depois sira sai ema Kristaun.” Porezemplu, ema kontinua halaʼo adorasaun ba ai hodi “tau ai Natál iha odamatan oin ka uma laran durante tempu malirin” nuʼudar sira-nia kostume.—Encyclopædia Britannica.