Bíblia fó sai matadalan kapás neʼebé bele ajuda ita atu foti desizaun. Bíblia bele ajuda ita atu ‘hetan matenek no kbiit atu komprende’. (Provérbios 4:5) Iha situasaun balu, Bíblia fó-hatene ita kona-ba saida mak desizaun neʼebé diʼak liu. Iha situasaun seluk, Bíblia fó ita matadalan sira neʼebé bele ajuda ita atu foti desizaun neʼebé matenek.

Iha informasaun neʼe

•  Sujestaun sira atu ajuda ita foti desizaun diʼak

•  Diʼak atu troka desizaun neʼebé uluk haʼu foti ona ka lae?

•  Oinsá se haʼu foti desizaun neʼebé la diʼak no haʼu labele troka ida-neʼe?

•   Keta ansi atu foti desizaun. Bíblia dehan: “Ema neʼebé matenek hanoin didiʼak kona-ba ninia hakat ida-idak.” (Provérbios 14:15) Se Ita foti desizaun ho ansi, karik Ita la tau atensaun ba informasaun ruma neʼebé importante. Uza tempu atu hanoin didiʼak kona-ba Ita-nia opsaun sira.—1 Tesalónika 5:21.

•   Keta foti desizaun tuir deʼit Ita-nia emosaun ka sentimentu. Bíblia fó avizu ba ita katak ita labele tau fiar demais ba ita-nia laran. (Provérbios 28:26; Jeremias 17:9) Porezemplu, karik ita sei foti desizaun neʼebé la diʼak bainhira ita hirus, laran-kraik, ansi, kole demais, ka sente depresaun.—Provérbios 24:10; 29:22.

•   Halo orasaun hodi husu matenek. (Tiago 1:5) Maromak kontente atu hatán ba orasaun hanesan neʼe. Nia mak Aman diʼak neʼebé hakarak ninia oan sira atu hasees an husi problema oioin. “Jeová rasik mak fó matenek; liafuan sira husi ninia ibun mak lori koñesimentu no kbiit atu tetu didiʼak.” a (Provérbios 2:6) Nia fó matenek neʼe liuhusi ninia Liafuan Bíblia.—2 Timóteo 3:16, 17.

•   Buka riset. Atu bele halo desizaun diʼak, Ita presiza iha informasaun neʼebé Ita bele tau fiar. Bíblia dehan: “Ema neʼebé matenek rona no hakarak atu simu hanorin tan.” (Provérbios 1:5) Iha neʼebé mak Ita bele hetan informasaun neʼebé Ita bele tau fiar?

   Ulukliu, buka-hatene saida mak Bíblia dehan kona-ba desizaun neʼebé ita presiza halo. Tanba ita-nia Kriadór hatene saida mak diʼak liu ba ita, ninia Liafuan Bíblia fó sai konsellu neʼebé ita bele tau fiar. (Salmo 25:12) Iha situasaun balu, Bíblia fó sai ho klaru saida mak ita presiza halo, karik liuhusi ukun-fuan ka mandamentu ruma. (Isaias 48:17, 18) Maibé iha situasaun barak liu, Bíblia la fó sai mandamentu espesífiku, maibé fó sai deʼit matadalan ka prinsípiu sira. Neʼe bele ajuda ita atu foti desizaun neʼebé diʼak, maski dala ruma ita-nia desizaun la hanesan ho ema seluk nian. Atu hetan prinsípiu husi Bíblia neʼebé liga ho ita-nia desizaun, ita presiza buka informasaun husi publikasaun sira neʼebé bazeia ba Bíblia, hanesan informasaun gratuitu oioin neʼebé fó sai iha website neʼe. b

   Atu halo desizaun balu, karik Ita presiza haree informasaun seluk neʼebé ita bele tau fiar. Porezemplu, antes atu sosa sasán ruma, liuliu sasán neʼebé karun, matenek atu halo riset kona-ba sasán neʼe, kompañia neʼebé prodús sasán neʼe, no mós matadalan kona-ba oinsá se sasán neʼe aat ka se Ita hakarak fó fila sasán. Ita mós presiza haree didiʼak se sasán neʼe tuir duni buat neʼebé Ita hakarak.

   Bíblia dehan: “Planu sira sei la sai loos kuandu ema la koʼalia ba malu.” (Provérbios 15:22) Entaun antes Ita halo desizaun, koʼalia ho ema oioin neʼebé ita bele tau fiar. Porezemplu, matenek atu konsulta ba doutór antes foti desizaun kona-ba buat médiku. (Mateus 9:12) Iha situasaun balu, Ita bele koʼalia ho ema neʼebé hasoru ona situasaun neʼebé atu hanesan ho Ita-nian. Maibé hanoin-hetan bá katak Ita rasik mak iha responsabilidade atu foti desizaun no mós hetan rezultadu husi Ita-nia desizaun, laʼós ema neʼebé fó sujestaun ba Ita.—Galásia 6:4, 5.

•   Tetu didiʼak faktu hotu. Halo lista kona-ba Ita-nia opsaun sira hodi bazeia ba informasaun neʼebé Ita halibur ona, no hakerek mós buat diʼak no la diʼak husi opsaun ida-idak. Ita mós presiza hanoin didiʼak konsekuénsia husi Ita-nia desizaun. (Deuteronómio 32:29) Porezemplu, Ita-nia desizaun sei fó impaktu saida ba Ita-nia an, Ita-nia família, ka ema seluk? (Provérbios 22:3; Roma 14:19) Se Ita hanoin didiʼak ida-neʼe no mós prinsípiu sira husi Bíblia, neʼe sei ajuda Ita atu halo desizaun neʼebé matenek no domin.

•   Halo desizaun. Dala ruma, karik ita dada an atu halo desizaun tanba ita duvida. Maibé se ita demora atu foti desizaun, ita bele lakon oportunidade neʼebé diʼak ka hasoru situasaun neʼebé la diʼak. Tuir loloos, demora atu halo desizaun bele lori rezultadu la diʼak hanesan deʼit ho halo desizaun neʼebé la diʼak. Bíblia ajuda ita komprende kona-ba neʼe hodi kompara situasaun neʼe ho toʼos-naʼin hodi dehan: “Ema neʼebé hateke deʼit ba anin sei la kari fini, no ema neʼebé hateke deʼit ba kalohan sei la koʼa buat ida.”—Eclesiastes 11:4.

 Hanoin-hetan katak maski ita foti desizaun neʼebé diʼak liu, desizaun neʼe la perfeitu. Baibain bainhira ita hili buat ida, dala barak ita presiza husik buat seluk. No mós buat ruma neʼebé ita la imajina bele akontese derrepente deʼit. (Eclesiastes 9:11) Tan neʼe, uza informasaun diʼak liu neʼebé ita hetan, no hili opsaun ida neʼebé iha posibilidade boot atu susesu.

 Bainhira ita deside ona buat ruma, la dehan katak ita nunka bele troka desizaun neʼe. Karik Ita-nia situasaun troka, ka karik Ita rekoñese katak Ita-nia desizaun neʼebé uluk Ita foti lori konsekuénsia neʼebé Ita nunka imajina. Tan neʼe, karik matenek atu hanoin fila fali Ita-nia situasaun no hili opsaun seluk neʼebé bele lori rezultadu diʼak.

 Maibé, iha duni desizaun balu neʼebé ita labele troka. (Salmo 15:4) Porezemplu, Maromak hakarak kaben-naʼin sira atu moris tuir sira-nia juramentu kaben nian. c (Malaquias 2:16; Mateus 19:6) Bainhira problema mosu iha moris kaben nian, feen-laʼen tenke hakaʼas an atu rezolve ida-neʼe no labele hakotu sira-nia moris kaben nian.

 Dala ruma, ita hotu halo desizaun neʼebé la diʼak ka la matenek. (Tiago 3:2) Karik ita arrepende ita-nia desizaun ka fó-sala ba ita-nia an, no normál atu sente hanesan neʼe. (Salmo 69:5) Se dala ruma ita mós sente nuneʼe, ida-neʼe bele lori buat diʼak ba ita tanba bele ajuda ita atu la halo fali sala neʼebé hanesan. (Provérbios 14:9) Maibé, Bíblia mós fó konsellu mai ita atu labele fó-sala demais ba ita-nia an, tanba neʼe bele estraga ita-nia mentál no emosaun. (2 Korinto 2:7) d Bíblia dehan: “Jeová laran-sadiʼa no laran-diʼak.” (Salmo 103:8-13) Tan neʼe, koko atu aprende husi desizaun la diʼak neʼebé ita labele troka ona, no halo buat neʼebé ita bele halo atu hadiʼa situasaun.