Maski Bíblia la fó sai informasaun barak kona-ba neʼe, maibé Bíblia la bandu feto sira atu hafurak an hodi uza makeup no joias. Maski nuneʼe, Bíblia anima feto sira atu hafurak sira-nia laran ho “buat neʼebé labele mohu, hanesan hahalok kalma no laran-maus” duké fokus demais kona-ba buat neʼebé bele haree husi liʼur.​—1 Pedro 3:3, 4.

•   Feto fiar-naʼin sira neʼebé temi iha Bíblia mós hafurak an. Rebeca, neʼebé kaben ho Abraão nia oan-mane Isaac, nia uza brinkus iha inus, kelu osan-mean, no buat murak folin-boot neʼebé nia simu nuʼudar prezente husi ninia banin-mane. (Génesis 24:22, 30, 53) Hanesan neʼe mós ho Ester, nia hetan tratamentu kumu isin atu prepara sai liurai-feto ida iha Pérsia. (Ester 2:7, 9, 12) Tratamentu neʼe inklui mós uza kozmétiku ka makeup oioin.

•   Baibain Bíblia temi sasán murak sira atu fó ezemplu kona-ba buat neʼebé diʼak. Porezemplu, ema ida neʼebé fó konsellu matenek mak hanesan “brinkus osan-mean neʼebé hafurak ema nia tilun”. (Provérbios 25:12) No mós, bainhira Maromak esplika oinsá nia trata nasaun Izraél, nia kompara ninia an hanesan laʼen neʼebé hafurak ninia noiva ho pulseira, korrente no brinkus. Buat murak sira-neʼe halo nasaun Izraél “bonita tebes”.​—Ezequiel 16:11-13.

 Hanoin neʼebé sala: Liurai-Feto Jezabel neʼebé aat pinta matan, ka uza eye shadow. Neʼe hatudu katak atu hafurak an iha dalan hanesan neʼe mak sala.​—2 Reis 9:30.

 Faktu: Liurai-Feto Jezabel hetan kastigu laʼós tanba nia hafurak ninia an, maibé tanba ninia hahalok aat, neʼe mak uza espiritizmu no oho ema.​—2 Reis 9:7, 22, 36, 37.