Sin, Maromak sei perdua Ita se Ita halo tuir dalan neʼebé loos atu hetan perdua. Bíblia hatete katak Maromak “prontu atu fó perdua” no nia “fó perdua ho laran-luak”. (Neemias 9:17; Salmo 86:5; Isaias 55:7) Bainhira nia perdua ita, nia halo nuneʼe iha dalan neʼebé kompletu. Nia hamoos hotu ita-nia sala sira. (Apóstolu 3:19) Maromak nia perdua mak permanente, tanba nia rasik hatete: “Haʼu sei . . . la hanoin-hetan tan sira-nia sala.” (Jeremias 31:34) Bainhira Maromak perdua ita, nia sei la hanoin fali ita-nia sala sira atu duun ita ka atu fó-kastigu ba ita beibeik.

 Maibé Maromak fó perdua ba ita laʼós tanba nia fraku ka tanba ninia sentimentu. Nia nunka troka ninia matadalan neʼebé perfeitu. Tan neʼe, iha sala balu neʼebé nia lakohi fó perdua.​—Josué 24:19, 20.

Hakat sira neʼebé ita presiza halo atu Maromak perdua ita

1.   Rekoñese katak sala neʼebé Ita halo mak hahalok kontra Maromak nia matadalan. Karik buat neʼebé Ita halo hakanek ema seluk nia laran, maibé ulukliu Ita presiza rekoñese katak bainhira Ita halo sala, loloos Ita hakanek Maromak nia laran.​—Salmo 51:1, 4; Apóstolu 24:16.

2.   Fó sai Ita-nia sala ba Maromak liuhusi orasaun.​—Salmo 32:5; 1 João 1:9.

3.   Ho laran-triste arrepende Ita-nia sala. “Triste tuir Maromak nia hakarak” sei book Ita atu arrepende an ka halo mudansa. (2 Korinto 7:10) Neʼe inklui arrepende an kona-ba hakat sira neʼebé Ita halo neʼebé ikusmai lori Ita ba sala.​—Mateus 5:27, 28.

4.   Troka Ita-nia hahalok, katak “fila fali”. (Apóstolu 3:19) Neʼe katak Ita hakaʼas an atu la repete hahalok sala ka toman neʼebé sala. Ka neʼe mós katak Ita presiza troka Ita-nia dalan atu hanoin no halo buat ruma.​—Éfeso 4:23, 24.

5.   Hakaʼas an atu hadiʼa situasaun ka laran-kanek neʼebé mosu tanba Ita-nia sala. (Mateus 5:23, 24; 2 Korinto 7:11) Husu deskulpa ba ema neʼebé laran-kanek tanba Ita-nia hahalok, no hakaʼas an atu hadiʼa situasaun neʼe.​—Lucas 19:7-10.

6.   Liuhusi orasaun, husu perdua husi Maromak tuir Ita-nia fiar ba Jesus nia sakrifísiu. (Éfeso 1:7) Atu Maromak bele perdua Ita, Ita tenke fó perdua ba ema seluk neʼebé halo ona sala hasoru Ita.​—Mateus 6:14, 15.

7.   Se Ita halo sala sériu, koʼalia ho ema ida neʼebé bele ajuda Ita iha dalan espirituál no bele halo orasaun hodi reprezenta Ita.​—Tiago 5:14-16

Hanoin neʼebé sala kona-ba oinsá Maromak fó perdua ba ema

 “Se haʼu konfesa sala ba amlulik ka ulun-naʼin relijiaun ida, haʼu sei hetan perdua ba haʼu-nia sala.”

 Ohin loron, la iha ema ida mak simu knaar husi Maromak atu fó perdua ba ema seluk neʼebé halo sala kontra Maromak. Karik Ita bele sente kmaan bainhira fó sai Ita-nia sala ba ema seluk, maibé só Maromak deʼit mak bele fó perdua ba Ita-nia sala.​—Éfeso 4:32; 1 João 1:7, 9.

 Se nuneʼe, tanbasá Jesus dehan ba ninia apóstolu sira: “Se imi perdua ema ida nia sala, Maromak perdua ona sira-nia sala. Se imi la perdua ema ida nia sala, nia sala iha nafatin”? (João 20:23) Tuir loloos Jesus nia liafuan sira-neʼe hatudu katak nia sei fó podér espesiál ida ba apóstolu sira bainhira sira simu espíritu santu.​—João 20:22.

 Tuir Jesus nia promesa, apóstolu sira simu duni prezente neʼe bainhira espíritu santu tun ba sira iha tinan 33 Era Comum. (Apóstolu 2:1-4) Apóstolu Pedro uza podér neʼe kuandu nia tesi-lia ba dixípulu Ananias no Safira. Pedro hatene sira-nia planu aat, no ninia desizaun hatudu katak sira-nia sala labele hetan perdua.​—Apóstolu 5:1-11.

 Bainhira apóstolu sira mate, prezente furak husi espíritu santu hanesan neʼe no prezente sira seluk hanesan kura ema no koʼalia língua oioin la iha tan. (1 Korinto 13:8-10) Tan neʼe, ohin loron la iha ema ida mak bele fó perdua ba ema seluk nia sala.