Lae. Ema barak hatete “osan mak buat aat hotu nia hun”. Maibé Bíblia la hatete katak osan mak aat, no mós la hatudu katak osan mak hun ba buat aat hotu. Tuir loloos Bíblia dehan katak “domin ba osan mak buat aat hotu nia hun”.​—1 Timóteo 6:10, Liafuan diak ba imi, segunda edisaun.

•  Saida mak Bíblia hatete kona-ba osan?

•  Tanbasá mak Bíblia fó avizu kona-ba domin ba osan?

•  Oinsá mak Bíblia nia avizu kona-ba osan bele ajuda ita?

•  Eskritura sira iha Bíblia kona-ba osan

 Bíblia esplika katak se uza osan ho matenek, neʼe bele ajuda ita, no mós bele “fó protesaun” mai ita. (Eclesiastes 7:12) Liután neʼe, Bíblia gaba ema neʼebé hatudu laran-diʼak ba ema seluk, no neʼe bele inklui fó osan.​—Provérbios 11:25.

 Maibé, Bíblia mós fó avizu atu la tau fokus hodi buka osan deʼit. Bíblia dehan: “Iha imi-nia moris, keta hadomi osan, maibé kontente ho buat neʼebé imi iha ona.” (Ebreu 13:5) Versíkulu neʼe hanorin ita atu uza osan ho matenek no la hadomi osan. Entaun ita presiza koko atu kontente ho buat neʼebé ita loloos presiza, hanesan hahán, roupa no hela fatin.​—1 Timóteo 6:8.

 Ema kaan-teen sei la hetan moris rohan-laek. (Éfeso 5:5) Razaun ida mak hahalok kaan-teen hanesan deʼit ho adora estátua, neʼebé mak adorasaun falsu. (Koloso 3:5) Razaun seluk mak bainhira ema kaan-teen buka sira-nia hakarak, dala barak sira la uza morál neʼebé diʼak. Provérbios 28:20 hatete: “Ema neʼebé ansi atu sai riku sei halo sala.” Karik sira hetan tentasaun atu halo krime hanesan ameasa ema atu hetan osan, hamatak ema, naʼok, ka oho ema.

 Maski dala ruma domin ba osan la lori ema ba hahalok aat, neʼe mós bele lori rezultadu aat seluk. Bíblia dehan katak “sira neʼebé hakarak duni atu sai riku monu ba tentasaun, lasu no hakarak beik no aat oioin, neʼebé lori terus no mate ba sira”.​—1 Timóteo 6:9.

 Se ita la kontra Maromak nia morál no ukun-fuan tan domin ba osan, ita sei iha dignidade no Maromak sei simu no apoia ita. Maromak promete ba ema neʼebé hakaʼas an ho laran atu halo nia kontente: “Haʼu sei nunka husik ó, no haʼu sei nunka fila kotuk ba ó.” (Ebreu 13:5, 6) Nia mós dehan katak “ema neʼebé laran-metin sei simu bensaun barak”.​—Provérbios 28:20.