Bíblia uza liafuan “lalehan” atu refere ba buat tolu: (1) Lalehan fíziku neʼebé bele haree ho matan; (2) Lalehan espíritu nian; no (3) símbolu ba pozisaun neʼebé aas. Atu komprende liafuan “lalehan” refere ba saida, ita presiza komprende kontestu. a

1.   Lalehan fíziku nian. “Lalehan” neʼe refere ba mundu nia atmosfera, neʼebé anin huu, manu sira semo, kalohan prodús udan no jelu-rahun, no halo rai lakan. (Salmo 78:26; Provérbios 30:19; Isaias 55:10; Lucas 17:24) Lalehan neʼe mós bele signifika universu, fatin neʼebé iha “loro-matan, fulan no fitun sira”.​—Deuteronómio 4:​19; Génesis 1:1.

2.   Lalehan espíritu nian. Liafuan “lalehan” mós refere ba lalehan espíritu nian, neʼebé aas liu fali universu fíziku nian. (1 Reis 8:​27; João 6:​38) Iha lalehan espirituál neʼe iha Maromak Jeová, neʼebé mak “Espíritu”, no mós anju sira neʼebé Jeová kria. (João 4:​24; Mateus 24:36) Dala ruma Bíblia uza liafuan “lalehan” nuʼudar símbolu ba anju sira neʼebé laran-metin, ka “santu sira nuʼudar kongregasaun”.​—Salmo 89:​5-7.

    Bíblia mós uza “lalehan” atu refere ba área espesífiku iha lalehan, neʼe mak Jeová nia “hela-fatin”. (1 Reis 8:​43, 49; Ebreu 9:​24; Apokalipse 13:6) Porezemplu, Bíblia fó sai katak Satanás no anju aat sira sei soe tun husi lalehan, no labele tama fali ba lalehan atu hasoru Jeová. Maibé sira nafatin iha kriatura espíritu nia fatin.​—Apokalipse 12:​7-9, 12.

3.   Símbolu ba pozisaun neʼebé aas. Bíblia uza liafuan “lalehan” atu reprezenta pozisaun neʼebé aas, liuliu atu liga ho autoridade atu ukun. Haree toʼok ezemplu balu:

   •   Maromak Jeová rasik nuʼudar Maromak neʼebé Aas Liu Hotu no Kbiit Boot Liu Hotu.​—2 Krónikas 32:20; Lucas 15:21.

   •   Maromak nia Ukun, ka governu neʼebé sei troka fali ho ema nia ukun. Bíblia refere ba Ukun neʼe nuʼudar “lalehan foun”.​—Isaias 65:17; 66:22; 2 Pedro 3:​13. b

   •   Ema Kristaun neʼebé iha esperansa atu bá lalehan.​—Éfeso 2:6.

   •   Ema nia governu neʼebé iha podér atu ukun sira-nia povu.​—Isaias 14:12-​14; Daniel 4:​20-​22; 2 Pedro 3:7.

   •   Anju aat sira neʼebé agora daudaun domina mundu.​—Éfeso 6:​12; 1 João 5:​19.

Lalehan mak fatin hanesan saida?

 Lalehan espíritu nian mak nakonu ho atividade oioin. Lalehan neʼe iha kriatura espíritu millaun ba millaun neʼebé “kumpre [Jeová nia] liafuan”.​—Salmo 103:20, 21; Daniel 7:​10.

 Bíblia fó sai lalehan nuʼudar fatin neʼebé naroman nabilan. (1 Timóteo 6:​15, 16) Bainhira profeta Ezequiel haree vizaun kona-ba lalehan, nia haree “naroman nabilan”, no vizaun neʼebé profeta Daniel haree kona-ba lalehan inklui “ahi lakan”. (Ezequiel 1:​26-​28; Daniel 7:​9, 10) Lalehan mak fatin neʼebé santu, moos, no furak.​—Salmo 96:6; Isaias 63:15; Apokalipse 4:​2, 3.

 Buat neʼebé Bíblia esplika kona-ba lalehan book ita atu hamtaʼuk Maromak. (Ezequiel 43:​2, 3) Maibé, ita ema labele komprende buat hotu kona-ba lalehan, tanba neʼe liu fali ita-nia kumpriensaun.