La sala atu hemu tua uitoan. Bíblia temi tua-uvas nuʼudar prezente husi Maromak neʼebé halo ema nia moris kontente. (Salmo 104:14,15; Eclesiastes 3:13; 9:7) Bíblia mós hatete katak dala ruma tua-uvas bele ajuda ema atu iha saúde diʼak.​—1 Timóteo 5:23.

 Jesus hemu tua-uvas kuandu nia iha rai. (Mateus 26:59; Lucas 7:34) Ema barak hatene kona-ba milagre neʼebé Jesus halo hodi troka bee sai fali tua-uvas iha festa kazamentu ida.​—João 2:1-10.

Perigu husi hemu tua barak demais

 Bíblia temi buat pozitivu balu kona-ba tua, maibé Bíblia mós hatete katak hemu demais ka hemu-lanu mak hahalok neʼebé aat. Tan neʼe, bainhira ema Kristaun ida hemu tua, nia sei la hemu barak. (1 Timóteo 3:8; Tito 2:2, 3) Bíblia fó sai razaun balu tanbasá labele hemu tua barak demais.

•   Hemu tua barak bele halo fraku ita-nia kbiit atu hanoin. (Provérbios 23:29-35) Bíblia dehan: “Fó imi-nia isin nuʼudar sakrifísiu neʼebé moris, santu no Maromak simu, katak halo serbisu sagradu ho imi-nia kbiit atu hanoin.” (Roma 12:1) Ema neʼebé lanu labele kumpre Bíblia nia mandamentu neʼe.

•   Hemu tua barak sei halo ema labele kontrola an no halakon ninia “hakarak atu halo buat neʼebé loos”.​—Oseias 4:11; Éfeso 5:18.

•   Hemu tua barak bele halo ema sai kiak no hamosu problema saúde neʼebé sériu.​—Provérbios 23:21, 31, 32.

•   Hemu tua barak ka hemu-lanu halo Maromak la kontente​—Provérbios 23:20; Galásia 5:19-21.

Hemu demais katak hemu toʼo hira?

 Se Ita rasik ka ema seluk hetan perigu ruma tanba Ita hemu tua, neʼe katak Ita hemu demais. Tuir Bíblia, ema neʼebé lanu laʼós deʼit katak ema neʼe hemu toʼo labele hadeer. Maibé se ema neʼebé hemu tua komesa hanoin la loos, labele laʼo loos, gosta istori malu, ka labele koʼalia moos, neʼe hatudu katak nia hemu demais ka lanu ona. (Job 12:25; Salmo 107:27; Provérbios 23:29, 30, 33) Maski ema balu la hemu tua toʼo lanu, maibé nia bele sai ‘laran todan tanba hemu barak’, no neʼe bele lori konsekuénsia neʼebé sériu.​—Lucas 21:34, 35.

Tempu neʼebé labele hemu tua

 Bíblia mós fó sai kona-ba tempu neʼebé ema Kristaun labele hemu tua:

•   Se halo ema seluk sidi.​—Roma 14:21.

•   Se governu nia lei bandu.​—Roma 13:1.

•   Se labele kontrola an kona-ba hemu tua. Ema neʼebé sai ona atan ba tua ka toman hemu-lanu tenkesér prontu atu halo mudansa boot hodi bele sai livre husi ninia toman neʼe.​—Mateus 5:29, 30.