Primeiru Korinto 15:1-58
15 Agora maun-alin sira, haʼu fó-hanoin imi kona-ba liafuan diʼak neʼebé haʼu fó sai ona ba imi,+ neʼebé imi mós simu ona no kontinua halo tuir.
2 Se imi nafatin kaer metin ba imi-nia fiar kona-ba liafuan diʼak neʼebé haʼu fó sai ona ba imi, imi sei hetan salvasaun. Se lae, imi sai fiar-naʼin saugati deʼit.
3 Tanba haʼu hatoʼo ona ba imi buat importante neʼebé haʼu mós simu, neʼe mak Kristu mate ba ita-nia sala hodi tuir Eskritura sira,+
4 no ema hakoi nia,+ no iha loron terseiru+ nia moris hiʼas fali+ hodi tuir Eskritura sira,+
5 no nia mosu ba Cefas,*+ no tuirmai ba sira naʼin Sanulu-Resin-Rua.*+
6 Depois neʼe, nia mosu ba maun-alin naʼin-500 liu iha tempu ida,+ no sira barak sei hamutuk hela ho ita, maibé balu mate* ona.
7 Depois neʼe, nia mosu ba Tiago,+ tuirmai ba apóstolu hotu.+
8 Maibé ikusliu, nia mosu ba haʼu,+ tan neʼe haʼu hanesan bebé neʼebé moris mai sedu liu.
9 Tanba haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba uluk haʼu fó-terus ba Maromak nia kongregasaun.+
10 Maibé haʼu bele sai hanesan agora tanba Maromak nia laran-diʼak neʼebé boot. Ninia laran-diʼak ba haʼu la saugati deʼit tanba haʼu serbisu makaʼas liu sira hotu. Maski nuneʼe, buat hotu neʼe laʼós ho haʼu-nia kbiit rasik, maibé tanba Maromak nia laran-diʼak neʼebé boot mak hamutuk ho haʼu.
11 Entaun, maski sira ka haʼu mak haklaken ba imi, maibé ami hotu koʼalia mensajen ida deʼit no imi fiar ona kona-ba neʼe.
12 Se ita haklaken katak Kristu moris hiʼas ona husi mate,+ oinsá mak imi balu dehan katak la iha moris-hiʼas husi mate?
13 Tuir loloos, se la iha moris-hiʼas husi mate, entaun Kristu mós la hetan moris-hiʼas.
14 Maibé se Kristu la hetan moris-hiʼas, ita-nia haklaken saugati deʼit, no imi-nia fiar mós saugati deʼit.
15 Liután neʼe, se ema mate sira la moris hiʼas, neʼe katak Maromak mós la fó moris-hiʼas ba Kristu, nuneʼe ita-nia sasin kona-ba Maromak mak falsu,+ tanba ita fó sai ona katak nia fó moris-hiʼas ba Kristu.+
16 Tanba se ema mate la hetan moris-hiʼas, Kristu mós la hetan moris-hiʼas.
17 Laʼós neʼe deʼit, se Kristu la hetan moris-hiʼas, imi-nia fiar saugati deʼit, no imi sei hela iha sala laran.+
18 No mós sira neʼebé mate* ona nuʼudar Kristu nia dixípulu mós lakon ba nafatin.+
19 Se ita-nia esperansa iha Kristu mak kona-ba moris neʼe deʼit, ita kuitadu liu fali ema hotu.
20 Maibé tuir loloos, Kristu moris hiʼas ona husi mate, nia mak hanesan ai-fuan primeiru husi ema hotu neʼebé mate* ona.+
21 Tanba mate mai liuhusi ema ida,+ nuneʼe mós moris-hiʼas husi mate mai liuhusi ema ida.+
22 Ema hotu mate tanba Adão,+ nuneʼe mós ema hotu sei hetan moris tanba Kristu.+
23 Maibé, ema ida-idak moris-hiʼas tuituir malu ho loloos: Kristu mak hanesan ai-fuan primeiru,+ depois neʼe mak sira neʼebé Kristu nian durante tempu neʼebé nia toʼo ona mai.*+
24 Ikusliu kuandu nia halakon tiha governu hotu no sira hotu neʼebé iha podér no kbiit, nia sei entrega Ukun* neʼe ba ninia Maromak no Aman.+
25 Tanba nia tenke ukun nuʼudar liurai toʼo Maromak tau ona ninia inimigu hotu iha nia ain okos.+
26 Inimigu ikus neʼebé nia sei halakon mak mate.+
27 Tanba Maromak “tau ona buat hotu iha Kristu nia ain okos”.+ Maibé kuandu nia dehan ‘buat hotu tau ona iha nia ain okos’,+ neʼe la inklui Maromak neʼebé halo buat hotu hakruʼuk ba Kristu.+
28 Maibé bainhira Maromak halo ona buat hotu hakruʼuk ba ninia Oan-Mane, tuirmai Oan-Mane rasik mós sei hakruʼuk ba Maromak neʼebé halo buat hotu hakruʼuk ba nia,+ nuneʼe Maromak sei sai Ukun-Naʼin ba buat hotu.+
29 Se ema mate sira la moris hiʼas fali, saida mak sei akontese ba sira neʼebé hetan batizmu ho objetivu atu mate?+ Tanbasá mak sira hetan batizmu hanesan neʼe?
30 Tanbasá mak ita mós sempre hasoru perigu?+
31 Loroloron haʼu hasoru perigu mate nian. Neʼe realidade duni hanesan haʼu haksolok kona-ba imi, haʼu-nia maun-alin sira, iha Kristu Jesus ita-nia Naʼi.
32 Se haʼu luta hasoru animál fuik iha Éfeso hanesan ema seluk halo,*+ ida-neʼe lori buat diʼak saida mai haʼu? Se ema mate sira la moris hiʼas, “mai ita han no hemu, tanba aban ita sei mate”.+
33 Keta husik ema seluk lohi imi.* Ransu hamutuk ho ema aat sei estraga toman diʼak.*+
34 Imi iha hanoin neʼebé moos bá hodi halo buat neʼebé loos no keta kontinua halo sala, tanba ema balu la iha koñesimentu kona-ba Maromak. Haʼu koʼalia hanesan neʼe atu halo moe imi.
35 Maski nuneʼe, ema balu sei dehan: “Oinsá mak ema mate sira sei moris hiʼas? Sira sei moris hiʼas ho isin saida?”+
36 Imi beik duni! Buat neʼebé ema kuda tenke mate uluk foin mak bele moris.
37 Kona-ba buat neʼebé ema kuda, maski trigu ka buat seluk, ema la kuda nia kain neʼebé moris ona, maibé kuda nia fini.
38 Maibé Maromak mak halo fini neʼe moris hodi tuir Maromak nia hakarak no nia fó sira ida-idak isin neʼebé la hanesan.
39 Isin hotu mak la hanesan. Maibé iha isin ida ba ema, isin seluk ba karau, no isin seluk ba manu, no isin seluk tan ba ikan.
40 Iha isin lalehan nian,+ no iha isin rai nian.+ Maibé glória husi isin lalehan nian mak oin ida, no glória husi isin rai nian mak oin ida seluk.
41 Glória husi loro-matan mak oin ida, glória husi fulan mak oin ida seluk,+ no glória husi fitun mak oin ida seluk tan. Tuir loloos fitun ida-idak iha glória neʼebé la hanesan.
42 Nuneʼe mós ho ema sira neʼebé hetan moris-hiʼas husi mate. Ema hakoi isin neʼebé bele dodok, maibé isin neʼebé moris fali labele dodok.+
43 Ema hakoi isin neʼebé la simu hahiʼi, maibé moris fali ho glória.+ Ema hakoi isin neʼebé fraku, maibé moris fali ho kbiit.+
44 Ema hakoi isin fíziku, maibé moris fali ho isin espíritu nian. Se iha isin fíziku nian, iha mós isin espíritu nian.
45 Hanesan hakerek ona: “Mane primeiru Adão sai ema* neʼebé moris.”+ No Adão neʼebé ikus sai kriatura espíritu* ida ho kbiit atu fó moris.+
46 Maibé, isin espíritu nian laʼós primeiru. Isin fíziku nian mak primeiru, no tuirmai mak espíritu nian.
47 Mane primeiru mai husi rai no halo husi rai-rahun,+ no mane segundu mai husi lalehan.+
48 Hanesan ho ema ida neʼebé halo husi rai-rahun, nuneʼe mós sira seluk halo husi rai-rahun, no hanesan ida neʼebé iha lalehan, nuneʼe mós sira seluk neʼebé mai husi lalehan.+
49 Hanesan ita sai nuʼudar ilas ba ema neʼebé halo husi rai-rahun,+ ita mós sei sai ilas ba ida neʼebé husi lalehan.+
50 Maibé maun-alin sira, haʼu dehan ba imi katak isin no raan labele simu Maromak nia Ukun nuʼudar liman-rohan, nuneʼe mós buat neʼebé dodok labele simu buat neʼebé la dodok nuʼudar liman-rohan.
51 Haʼu dehan ba imi segredu santu ida: Laʼós ita hotu sei mate,* maibé ita hotu sei nakfila an+
52 kedas, no neʼe lalais liu fali piska matan, neʼe sei akontese durante trombeta ikus nia lian.+ Tanba trombeta neʼe sei lian no mate sira sei moris fali ho isin neʼebé labele dodok no ita sei nakfila an.
53 Tanba ida neʼebé dodok tenke tau fali ida neʼebé labele dodok,+ no ida neʼebé bele mate tenke tau fali ida neʼebé labele mate.+
54 Maibé kuandu ida neʼebé dodok tau fali ida neʼebé labele dodok, no ida neʼebé bele mate tau fali ida neʼebé labele mate, iha tempu neʼebá buat neʼebé hakerek ona sei sai loos: “Mate halakon tiha ba nafatin.”+
55 “Mate, ó-nia kbiit iha neʼebé? Mate, ó-nia venenu iha neʼebé?”+
56 Sala mak hanesan venenu neʼebé halo mate,+ no Ukun-Fuan mak fó kbiit ba sala.*+
57 Maibé ita fó agradese ba Maromak, tanba nia halo ita manán liuhusi ita-nia Naʼi Jesus Kristu!+
58 Tan neʼe, maun-alin doben sira, laran-metin bá,+ no hamriik metin bá, no sai badinas nafatin+ iha Naʼi nia serbisu, tanba imi hatene katak serbisu neʼebé imi halo ba Naʼi sei la sai saugati deʼit.+
Nota-rodapé
^ Ninia naran seluk mak Pedro.
^ Neʼe katak apóstolu naʼin-12.
^ Orj., “toba”.
^ Orj., “toba”.
^ Orj., “toba”.
^ Haree “Parousia” iha Glosáriu.
^ Ka “Reinu; Governu”.
^ Ka karik “tuir ema nia hanoin”.
^ Ka karik “Keta lohi imi-nia an”.
^ Ka “estraga morál neʼebé diʼak”.
^ Haree “Pneuma” iha Glosáriu.
^ Haree “Psiké” iha Glosáriu.
^ Orj., “toba”.
^ Ka “sala nia kbiit mak Ukun-Fuan”.
