Primeiru Samuel 25:1-44
25 Liutiha tempu balu, Samuel+ mate, no ema Izraél hotu halibur hamutuk hodi tanis ba nia no hakoi nia besik ninia uma iha Ramá.+ Tuirmai David hamriik hodi laʼo ba rai-fuik Paran.
2 Iha tempu neʼebá iha mane ida neʼebé hela iha Maon+ no nia serbisu iha Karmel.*+ Mane neʼe riku tebes. Nia iha bibi-malae 3.000 no bibi-timur 1.000, no iha tempu neʼebá nia tesi hela ninia bibi-malae nia fulun iha Karmel.
3 Mane neʼe naran Nabal,+ no ninia feen naran Abigail.+ Ninia feen matenek no bonita, maibé ninia laʼen mak ema Caleb,+ nia siʼak-teen no iha hahalok aat.+
4 Iha rai-fuik David rona katak Nabal tesi daudaun ninia bibi-malae nia fulun.
5 Entaun David haruka mane joven naʼin-sanulu ba nia, no dehan: “Saʼe ba Karmel, no bainhira imi hasoru Nabal, husu nia hodi haʼu-nia naran atu hatene nia diʼak ka lae.
6 Tuirmai dehan: ‘Haʼu hein katak Ita-Boot moris naruk no moris diʼak,* no mós Ita-nia umakain no buat hotu neʼebé Ita-nian bele moris diʼak.
7 Haʼu rona katak Ita tesi daudaun bibi-malae nia fulun. Bainhira Ita-nia bibi-atan sira hamutuk ho ami, ami la halo aat ba sira,+ no sira la lakon buat ida durante tempu hotu neʼebé sira iha Karmel.
8 Husu toʼok ba Ita-nia mane joven sira, no sira sei konta ba Ita. Haʼu hein katak Ita sei hatudu laran-diʼak ba haʼu-nia mane joven sira, tanba ami mai iha tempu ksolok nian.* Favór ida, fó ba Ita-nia atan sira no ba Ita-nia oan-mane David buat neʼebé Ita bele fó.’”+
9 Entaun David nia ema sira bá fó sai liafuan hotu neʼe ba Nabal hodi David nia naran. Bainhira sira koʼalia hotu ona,
10 Nabal hatán ba David nia atan sira, hodi dehan: “Sé mak David? Sé mak Jessé nia oan-mane? Ohin loron atan barak halai husi sira-nia naʼi.+
11 Haʼu-nia paun, bee, no naʼan neʼebé haʼu koʼa ona ba haʼu-nia atan sira neʼebé tesi bibi-fulun, haʼu tenke fó fali ba mane sira neʼebé mai husi fatin neʼebé haʼu la hatene ka?”
12 Ho ida-neʼe, David nia mane joven sira-neʼe fila fali no konta liafuan hotu neʼe ba nia.
13 David hatete kedas ba ninia ema sira: “Imi hotu kesi imi-nia surik bá!”+ Entaun sira hotu kesi sira-nia surik, David mós kesi ninia surik. Maizumenus mane naʼin-400 bá hamutuk ho David, no mane naʼin-200 mak hela hodi hein sasán sira.
14 Iha tempu neʼebá, atan ida fó-hatene ba Nabal nia feen Abigail, hodi dehan: “David haruka ema lori lia-menon mai husi rai-fuik atu husu ami-nia naʼi diʼak ka lae, maibé nia hakilar hodi tarata aat sira.+
15 Mane sira-neʼe diʼak tebes ba ami. Sira nunka halo aat ba ami, no ami la lakon buat ida durante tempu neʼebé ami hamutuk ho sira iha rai-luan.+
16 Sira hanesan moru neʼebé haleʼu ami hodi proteje ami kalan no loron durante tempu neʼebé ami hamutuk ho sira hodi hein bibi.
17 Agora deside bá saida mak Ita atu halo, tanba ami-nia naʼi no ninia umakain tomak sei kona duni susar,+ no ami-nia naʼi mak mane neʼebé folin-laek+ no la iha ema ida mak brani atu koʼalia ho nia.”
18 Entaun Abigail+ foti kedas paun fuan 200, tua-uvas buli boot rua, bibi-malae lima neʼebé koʼa tiha ona, trigu sea isin lima* neʼebé sona ona, dose 100 husi uvas-maran, no dose 200 husi figeira-maran* no tula buat hotu neʼe iha kuda-burru sira-nia leten.+
19 Tuirmai nia hatete ba ninia atan sira: “Laʼo uluk iha haʼu-nia oin. Haʼu sei tuir imi.” Maibé nia la hatete buat ida ba nia laʼen Nabal.
20 Bainhira Abigail saʼe hela kuda-burru no tun daudaun, foho helik nia, David no ninia ema sira mós laʼo tun daudaun, no Abigail hasoru sira.
21 Antes neʼe, David hatete: “Haʼu proteje ona buat hotu neʼebé mane neʼe nian, maibé neʼe saugati deʼit. Ninia rikusoin ida mós la lakon,+ maibé nia selu fali haʼu-nia hahalok diʼak ho hahalok aat.+
22 Haʼu hein katak Maromak sei fó kastigu hanesan neʼe ba David nia inimigu* no aumenta liután kastigu neʼe se haʼu husik ninia mane* ida moris toʼo dadeer.”
23 Bainhira Abigail haree David, nia tun lalais husi kuda-burru. Nia hakneʼak kedas no hakruʼuk ho oin ba rai.
24 Tuirmai nia monu ba David nia ain no dehan: “Haʼu-nia naʼi, husik haʼu mak simu todan neʼe. Fó tempu ba Ita-nia atan-feto atu koʼalia, no rona ba Ita-nia atan-feto nia liafuan.
25 Favór ida, haʼu-nia naʼi lalika hanoin kona-ba Nabal,+ ema folin-laek neʼe, tanba ninia hahalok tuir duni ninia naran. Ninia naran mak Nabal,* no nia beik-teen. Maibé Ita-nia atan-feto la haree mane joven sira neʼebé Ita haruka.
26 Agora, haʼu-nia naʼi, haʼu jura hodi Jeová, Maromak neʼebé moris no hodi Ita-nia moris, katak Jeová mak hanetik Ita+ atu nuneʼe Ita labele halo sala hodi oho ema*+ no hanetik Ita atu labele selu fali hahalok aat* ho Ita-nia liman rasik. Haʼu hein katak Ita-nia inimigu sira no mós ema hotu neʼebé buka atu hakanek Ita sei sai hanesan Nabal.
27 Kona-ba prezente*+ neʼebé Ita-nia atan-feto lori ba haʼu-nia naʼi, fó ida-neʼe ba Ita-nia mane joven sira neʼebé laʼo tuir Ita.+
28 Favór ida, perdua Ita-nia atan-feto nia sala, tanba Jeová mak sei harii duni umakain ida ba haʼu-nia naʼi no neʼe sei metin ba nafatin,+ tanba haʼu-nia naʼi halo daudaun Jeová nia funu,+ no haʼu-nia naʼi la halo sala ida iha Ita-nia moris tomak.+
29 Bainhira ema ida hamriik atu duni tuir Ita no buka atu halakon Ita-nia moris, Jeová, Ita-nia Maromak, sei falun metin haʼu-nia naʼi nia moris iha bornál moris nian, maibé Nia sei tuda lakon tiha Ita-nia inimigu sira-nia moris hanesan fatuk neʼebé tuda ho tali-baku.*
30 Bainhira Jeová halo ona buat diʼak hotu ba haʼu-nia naʼi tuir ninia promesa no foti ona Ita nuʼudar ulun-naʼin ba Izraél,+
31 Ita sei nunka sente triste ka arrepende an* tanba Ita la oho ema la ho razaun no la foti liman atu selu fali hahalok aat.*+ Bainhira Jeová fó buat diʼak ba haʼu-nia naʼi, hanoin-hetan Ita-nia atan-feto bá.”
32 Ho ida-neʼe, David dehan ba Abigail: “Fó hahiʼi ba Jeová, Izraél nia Maromak, neʼebé haruka ó mai hasoru haʼu ohin!
33 Maromak sei haraik bensaun ba ó tanba ó-nia ulun-mamar! Haʼu hein katak Maromak sei haraik bensaun ba ó tanba ohin ó hanetik haʼu atu la oho ema*+ no atu la selu fali hahalok aat* ho haʼu-nia liman rasik.
34 Haʼu jura hodi Jeová, Izraél nia Maromak neʼebé moris, neʼebé hanetik haʼu atu halo aat ba ó,+ se karik ó la mai lalais atu hasoru haʼu,+ toʼo dadeer-saan sei la iha mane ida* iha Nabal nia umakain neʼebé moris hela.”+
35 Ho ida-neʼe, David simu buat neʼebé feto neʼe lori ba nia no David dehan ba feto neʼe: “Laʼo ba ó-nia uma ho dame. Haʼu rona ona ba ó, no haʼu sei kumpre buat neʼebé ó husu.”
36 Depois neʼe, Abigail fila fali ba Nabal, neʼebé han daudaun hanesan liurai ida iha ninia uma. Nabal sente laran-kontente no lanu todan loos. Abigail la konta buat ida ba nia toʼo rai naroman.
37 Iha dadeer-saan, bainhira Nabal oin-moos ona, ninia feen konta buat sira-neʼe ba nia. No ninia fuan sai hanesan ema neʼebé mate ona, no nia toba la book an hanesan fatuk ida.
38 Liutiha loron sanulu, Jeová hakotu nia moris, no nia mate.
39 Bainhira David rona katak Nabal mate ona, nia dehan: “Fó hahiʼi ba Jeová, neʼebé defende haʼu-nia kazu+ kona-ba Nabal neʼebé hamoe haʼu.+ Nia mós hanetik Ninia atan atu la halo buat neʼebé aat.+ Jeová tau fali ona Nabal nia hahalok aat ba nia ulun leten!” Tuirmai David haruka ema husu Abigail atu sai ninia feen.
40 Entaun David nia atan sira bá hasoru Abigail iha Karmel no dehan ba nia: “David haruka ami atu husu Ita hodi sai ninia feen.”
41 Nia hamriik kedas no hakruʼuk ho oin ba rai, hodi dehan: “Ita-nia atan mak neʼe, haʼu prontu atu sai atan hodi fase haʼu-nia naʼi nia atan sira-nia ain.”+
42 Tuirmai Abigail+ saʼe kedas kuda-burru, no ninia atan-feto naʼin-lima laʼo iha ninia kotuk. Nia laʼo tuir David nia ema sira no sai David nia feen.
43 David mós kaben ho Ahinoam+ husi Jezreel,+ nuneʼe feto naʼin-rua neʼe sai ninia feen.+
44 Maibé Saul entrega ona ninia oan-feto Mical,+ David nia feen, ba Palti.+ Palti mak Laís husi Galim nia oan-mane.
Nota-rodapé
^ Neʼe mak sidade ida iha Judá no laʼós Foho Karmel.
^ Ka “no dame hela ho Ita”.
^ Orj., “loron neʼebé diʼak”.
^ Ka “husi figeira-maran neʼebé buti hamutuk”.
^ Ka karik “ba David”.
^ Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
^ Naran neʼe katak “Kakutak mamuk; Beik”.
^ Ka “lori salvasaun”.
^ Ka “atu la hetan sala tanba ema nia raan”.
^ Orj., “bensaun”.
^ Orj., “laʼo la metin ka sidi”.
^ Ka “atu lori salvasaun”.
^ Ka “atu lori salvasaun”.
^ Ka “la hetan sala tanba ema nia raan”.
^ Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
