Apóstolu 11:1-30
11 Apóstolu sira no mós maun-alin sira iha Judeia rona katak ema husi nasaun seluk mós simu ona Maromak nia liafuan.
2 Entaun, kuandu Pedro toʼo iha Jeruzalein, ema sira neʼebé apoia sirkunsizaun*+ hahú haksesuk malu ho nia,*
3 hodi dehan: “Ó tama ona iha ema neʼebé la hetan sirkunsizaun nia uma no han hamutuk ho sira.”
4 Ho ida-neʼe, Pedro hahú esplika ba sira kona-ba buat neʼebé akontese ona, hodi dehan:
5 “Bainhira haʼu iha sidade Jope no halo hela orasaun, haʼu hetan vizaun ida, haʼu haree buat ida tun mai husi lalehan hanesan hena-liñu neʼebé boot, no hena neʼe tun mai hanesan ema kaer metin hela ninia lidun haat, no neʼe tun mai toʼo haʼu.+
6 Kuandu haʼu hateke didiʼak ba laran, haʼu haree iha animál ain haat husi rai, iha animál fuik, iha animál neʼebé dolar,* no iha manu sira neʼebé semo iha lalehan.
7 Haʼu mós rona lian ida dehan mai haʼu: ‘Pedro, hamriik bá, oho no han!’
8 Maibé haʼu hatete: ‘Lae duni, Naʼi, tanba haʼu nunka han buat neʼebé foʼer no la moos.’
9 Ba dala segundu lian husi lalehan hatán: ‘Ó keta bolu buat neʼebé Maromak hamoos tiha ona nuʼudar buat foʼer.’
10 Neʼe akontese ba dala terseiru, tuirmai buat hotu neʼe foti saʼe fali ba lalehan.
11 Iha momentu neʼe duni mak mane naʼin-tolu hamriik iha uma neʼebé ami hela bá, tanba ema ida mak haruka mane sira-neʼe mai husi Sezareia atu buka haʼu.+
12 Tuirmai Maromak nia espíritu fó-hatene mai haʼu atu bá tuir sira hodi la laran-rua. Maibé maun-alin naʼin-neen sira-neʼe mós bá hamutuk ho haʼu, no ami tama ba mane neʼe nia uma.
13 “Nia konta ba ami oinsá anju ida hamriik iha nia uma no dehan: ‘Haruka ema ba Jope no bolu Simão, neʼebé ema bolu Pedro,+
14 no nia sei fó-hatene ó oinsá mak ó no ó-nia família tomak bele hetan salvasaun.’
15 Maibé bainhira haʼu hahú koʼalia ba sira, espíritu santu tun ba sira hanesan tempu neʼebé espíritu neʼe tun ba ita dala primeiru.+
16 Ho ida-neʼe, haʼu hanoin fali Naʼi nia liafuan, neʼebé dala ruma nia dehan: ‘João fó batizmu ba imi ho bee,+ maibé imi sei hetan batizmu ho espíritu santu.’+
17 Tan neʼe, se Maromak fó ba sira prezente neʼebé la presiza selu hanesan nia fó ona ba ita neʼebé fiar ona Naʼi Jesus Kristu, entaun haʼu sé atu bele hanetik Maromak?”*+
18 Kuandu sira rona buat sira-neʼe, sira la haksesuk malu tan ho Pedro,* no sira hahiʼi Maromak, hodi dehan: “Loos duni, Maromak loke ona dalan ba ema husi nasaun seluk atu arrepende sira-nia sala hodi bele hetan moris.”+
19 Iha tempu neʼebá, ema sira neʼebé laʼo namkari+ tanba terus neʼebé mosu depois Estevão mate, sira laʼo toʼo Fenísia, Xipre no Antiokia, maibé sira haklaken deʼit ba ema Judeu sira.+
20 Maibé mane balu husi sira-nia leet neʼebé mai husi Xipre no Sirene, sira laʼo ba Antiokia no hahú haklaken ba ema neʼebé koʼalia lian Gregu, no fó sai liafuan diʼak kona-ba Naʼi Jesus.
21 Jeová* nia liman hamutuk ho sira, no ema barak sai fiar-naʼin no tau fiar ba Naʼi.+
22 Kongregasaun iha Jeruzalein rona kona-ba ema sira-neʼe, no sira haruka Barnabé+ bá Antiokia.
23 Kuandu nia toʼo no haree Maromak nia laran-diʼak neʼebé boot, nia haksolok no hahú fó aten-brani ba sira hotu atu kontinua laran-metin ba Naʼi,+
24 tanba nia mak ema neʼebé diʼak no nakonu ho espíritu santu no fiar. Ema-lubun tau fiar ba Naʼi.+
25 Entaun, nia bá Tarsu atu buka Saul.+
26 Bainhira hetan tiha nia, Barnabé lori nia ba Antiokia. Ba tinan ida tomak sira halibur hamutuk ho kongregasaun no hanorin ema-lubun boot. No iha Antiokia mak dixípulu sira simu naran Kristaun+ ba dala primeiru tuir Maromak nia hakarak.
27 Iha tempu neʼebá, profeta sira+ tun husi Jeruzalein hodi bá Antiokia.
28 Profeta ida naran Ágabo+ hamriik hodi fó-hatene nanis liuhusi espíritu santu katak hamlaha boot besik ona atu mosu iha mundu tomak.+ No ida-neʼe mosu duni iha Cláudio nia tempu.
29 Entaun dixípulu sira-neʼe deside katak sira ida-idak sei fó ajuda tuir sira-nia kbiit,+ no haruka ajuda neʼe+ ba maun-alin sira neʼebé hela iha Judeia.
30 No sira halo nuneʼe duni hodi haruka ajuda neʼe ba katuas sira liuhusi Barnabé no Saul.+
Nota-rodapé
^ Ka “hahú kritika nia”.
^ Ka “reptil”.
^ Ka “atu hamriik hodi taka dalan ba Maromak”.
^ Orj., “sira nonook deʼit”.
