Roma 6:1-23
6 Tan neʼe, ita sei dehan saida? Ita bele kontinua halo sala atu nuneʼe Maromak nia laran-diʼak neʼebé boot bele sai barak liután ka?
2 Lae duni! Tanba ita mate ona kona-ba sala,+ entaun ita labele kontinua atu moris iha sala laran, loos ka lae?+
3 Imi hatene ka lae katak ita hotu neʼebé hetan ona batizmu* iha Kristu Jesus,+ ita hetan batizmu iha nia mate?+
4 Entaun, ita hakoi tiha ona hamutuk ho nia liuhusi ita-nia batizmu iha nia mate,+ atu nuneʼe, hanesan Kristu moris fali husi mate liuhusi Aman nia glória, ita mós tenke laʼo iha moris neʼebé foun.+
5 Se ita mate ona hanesan nia, ita sei moris fali duni hanesan nia,+ no iha buat sira-neʼe mak ita sai ida deʼit ho nia.+
6 Tanba ita hatene katak ita-nia hahalok tuan nian prega tiha ona ba ai-riin hamutuk ho nia,+ atu nuneʼe ita-nia isin neʼebé sala la domina tan ita,+ no ita la kontinua tan sai atan ba sala.+
7 Tanba ema neʼebé mate, nia selu ona tusan hotu* ba ninia sala.
8 Liután neʼe, se ita mate ona ho Kristu, ita fiar katak ita mós sei moris ho nia.
9 Tanba ita hatene katak Kristu moris fali ona husi mate,+ no nia sei la mate tan,+ no mate la iha tan kbiit atu ukun nia.
10 Tanba nia mate dala ida deʼit ba nafatin atu halakon sala, no nia sei la mate tan ba nafatin,+ maibé nia moris ona atu bele halo Maromak nia hakarak.
11 Nuneʼe mós ho imi, imi tenke haree imi-nia an hanesan mate ona kona-ba sala maibé imi moris atu halo Maromak nia hakarak liuhusi Kristu Jesus.+
12 Tan neʼe, keta husik sala ukun nafatin imi nuʼudar liurai iha imi-nia isin neʼebé sei mate,+ hodi halo tuir isin nia hakarak sira.
13 No mós keta kontinua entrega imi-nia isin ba sala nuʼudar armas atu halo hahalok la loos. Maibé entrega imi-nia an ba Maromak nuʼudar ema neʼebé moris ona husi mate, no mós entrega imi-nia isin ba Maromak nuʼudar armas atu halo hahalok loos.+
14 Keta husik sala domina imi nuʼudar imi-nia naʼi, tanba imi laʼós iha ukun-fuan nia okos,+ maibé imi simu ona Maromak nia laran-diʼak neʼebé boot.+
15 Neʼe katak sá? Neʼe katak ita bele halo sala tanba ita laʼós tan iha ukun-fuan nia okos maibé simu ona Maromak nia laran-diʼak neʼebé boot ka?+ Lae duni!
16 Imi hatene ka lae? Se imi entrega imi-nia an ba ema ida hodi sempre halo tuir nia, imi mak ninia atan.+ Tan neʼe, se imi atan ba sala,+ ida-neʼe sei lori imi ba mate.+ Maibé se imi atan ba Maromak no halo tuir nia, imi sei sai ema laran-loos.
17 Entaun mai ita fó obrigadu ba Maromak. Uluk imi atan ba sala, maibé agora husi imi-nia laran imi halo tuir hanorin neʼebé Maromak entrega ona ba imi.
18 Neʼe duni, tanba imi sai livre ona husi sala,+ imi sai atan ba Maromak no halo buat neʼebé loos.+
19 Haʼu koʼalia ho liafuan neʼebé simples tanba imi-nia isin fraku. Hanesan uluk imi uza imi-nia liman-ain nuʼudar atan ba hahalok la moos no kontra lei hodi halo hahalok neʼebé la tuir lei, agora fó imi-nia liman-ain nuʼudar atan ba buat loos hodi halo hahalok santu.+
20 Tanba kuandu imi atan ba sala, hahalok loos laʼós nuʼudar imi-nia naʼi.
21 Entaun, saida mak rezultadu husi imi-nia hahalok iha tempu neʼebá? Neʼe mak hahalok neʼebé agora halo imi moe. Tanba buat sira-neʼe lori ba mate.+
22 Maibé agora, tanba imi sai livre ona husi sala no sai atan ba Maromak, rezultadu mak imi-nia moris santu,+ no ikusmai neʼe lori imi ba moris rohan-laek.+
23 Tanba sala nia kolen mak mate,+ maibé prezente neʼebé Maromak fó mak moris rohan-laek+ liuhusi Kristu Jesus ita-nia Naʼi.+
