Tito 2:1-15
2 Maibé kona-ba ó, kontinua koʼalia tuir hanorin neʼebé loos.*+
2 Fó konsellu ba mane sira neʼebé idade ona atu kontrola sira-nia hahalok, sériu,* iha hanoin neʼebé loos, iha fiar neʼebé metin, iha domin no iha kbiit atu tahan susar.
3 Nuneʼe mós, fó konsellu ba feto sira neʼebé idade ona atu hatudu hahalok neʼebé respeitu Maromak, la koʼalia aat hodi hafoʼer ema seluk nia naran, la hemu tua demais, sai mestra ba buat neʼebé diʼak,
4 hodi nuneʼe sira bele hanorin* feto joven sira atu hadomi sira-nia laʼen, hadomi sira-nia oan,
5 iha hanoin neʼebé loos, iha hahalok moos, halo serbisu iha uma laran,* hatudu hahalok diʼak no hakruʼuk ba sira-nia laʼen,+ atu nuneʼe ema labele koʼalia aat Maromak nia liafuan.
6 Nuneʼe mós, kontinua fó konsellu ba mane joven sira atu iha hanoin neʼebé loos,+
7 no ó tenke hatudu ezemplu kona-ba halo hahalok diʼak iha buat hotu. Hanorin buat neʼebé loos* ho sériu,+
8 uza liafuan sira neʼebé loos* atu ema seluk labele kritika ó,+ atu nuneʼe sira neʼebé kontra ita bele sente moe, tanba la iha buat aat ida neʼebé sira bele koʼalia kona-ba ita.+
9 Atan sira tenke hakruʼuk ba sira-nia patraun iha buat hotu,+ hakaʼas an atu halo sira-nia patraun kontente, la hatán fali ba sira-nia patraun,
10 no la naʼok husi sira-nia patraun,+ maibé hatudu hahalok neʼebé halo sira-nia patraun tau fiar tomak ba sira, atu nuneʼe iha buat hotu sira bele fó hahiʼi ba hanorin husi ita-nia Salvadór, Maromak.+
11 Maromak hatudu sai ona ninia laran-diʼak neʼebé boot, no neʼe lori salvasaun ba ema oioin.+
12 Maromak nia laran-diʼak neʼe treinu ita atu labele simu buat hotu neʼebé la tuir ninia hakarak, no la simu mundu nia hakarak,+ no atu moris ho hanoin neʼebé loos, hahalok loos no laran-metin ba Maromak* iha tempu* agora,+
13 no ita sei hein hela ba ita-nia esperansa ksolok nian+ atu sai loos no hein hela tempu neʼebé Maromak boot no ita-nia Salvadór, Jesus Kristu, hatudu sai sira-nia an ho glória boot.
14 Kristu entrega ninia moris ba ita+ atu halo ita livre*+ husi hahalok aat hotu no atu hamoos povu ida neʼebé sai nuʼudar ninia povu espesiál, neʼebé laran-manas atu halo serbisu diʼak sira.+
15 Kontinua koʼalia kona-ba buat sira-neʼe, fó konsellu,* no korrije ho podér tomak.+ Keta husik ema ida haree ó la diʼak.
Nota-rodapé
^ Ka “neʼebé diʼak; neʼebé fó benefísiu”.
^ Ka “tenke hatudu hahalok diʼak”.
^ Ka “fó-hanoin; treinu”.
^ Ka “tau matan ba sira-nia uma”.
^ Ka karik “Hanorin ho laran-moos”.
^ Ka “neʼebé diʼak; neʼebé fó benefísiu”.
^ Ka “no devosaun ba Maromak”. Haree “Devosaun ba Maromak” iha Glosáriu.
^ Orj., “atu sosa fali ita”.
^ Ka “fó aten-brani”.
