1-3. (a) Tanbasá mak Abigail nia umakain iha perigu laran? (b) Saida mak ita sei aprende kona-ba Abigail?

 ABIGAIL haree mane joven neʼebé halai mai taʼuk tebetebes. No nia iha razaun duni atu sente hanesan neʼe. Iha tempu neʼebá kedas soldadu maizumenus naʼin-400 mai daudaun, no sira-nia planu mak atu oho mane hotu iha Nabal nia umakain. Tanbasá?

² Susar neʼe nia hun mak Nabal, Abigail nia laʼen. Hanesan baibain nia hatudu fali hahalok siʼak-teen no laran-aat. Maibé iha tempu neʼe, nia atu simu fali ninia masin. Nia hateten aat ba mane ida neʼebé ema barak hatene no hadomi. Mane neʼe mak komandante ba soldadu sira neʼebé forte no laran-metin. Agora, Nabal nia serbisu-naʼin neʼebé bibi-atan joven ida, bá hasoru Abigail. Nia hein katak Abigail bele buka dalan lalais hodi salva sira. Maibé saida mak feto ida bele halo hodi hasoru tropa barak hanesan neʼe?

³ Ulukliu, mai ita aprende kona-ba feto neʼe, neʼebé iha hahalok furak. Sé mak Abigail? Oinsá mak problema boot neʼe hahú? No oinsá mak ita bele banati-tuir ninia fiar?

4. Nabal mak ema oinsá?

⁴ Abigail no Nabal laʼós pár neʼebé diʼak. Abigail mak feen neʼebé diʼak, maibé Nabal mak laʼen neʼebé aat tebes. Nabal ema riku no hanoin katak nia mak ema-boot, maibé ema seluk hanoin oinsá kona-ba nia? Bíblia uza liafuan makaʼas atu  koʼalia kona-ba Nabal. Ninia naran iha arti katak “Beik-teen”. Ninia inan-aman mak fó naran neʼe kuandu nia moris mai ka lae? Ka ema mak hanaran nia hanesan neʼe tanba ninia hahalok? Ita la hatene loos, maibé ita bele dehan katak ninia hahalok tuir duni ninia naran. Nabal mak mane neʼebé “siʼak-teen no ninia hahalok sira aat”. Nia gosta buka problema no lanu-teen. Ema barak taʼuk no odi nia.—1 Samuel 25:2, 3, 17, 21, 25.

5, 6. (a) Abigail iha hahalok diʼak saida deʼit? (b) Karik razaun saida mak Abigail kaben ho mane neʼebé iha hahalok aat?

⁵ Maibé Abigail la hanesan duni ho ninia laʼen. Ninia naran iha arti katak “Haʼu-nia aman halo nia an haksolok”. Aman barak kontente tebes atu iha oan-feto neʼebé bonita, maibé aman neʼebé matenek sei kontente liu se ninia oan mak bonita husi laran. Dala ruma ema neʼebé moris mai ho oin bonita, sira hanoin la presiza atu haburas hahalok hanesan matenek, aten-brani, ka fiar. Maibé Abigail la hanesan neʼe. Bíblia hatete katak nia hatudu matenek no nia bonita loos.—Lee 1 Samuel 25:3. *

⁶ Ohin loron, ema barak karik hanoin tanbasá mak feto joven matenek neʼe kaben ho mane neʼebé iha hahalok aat hanesan neʼe. Hanoin-hetan katak iha tempu Bíblia nian, dala barak inan-aman mak hili kaben ba sira-nia oan. Ka se oan rasik mak hili ema neʼebé nia sei kaben, importante atu inan-aman simu ida-neʼe. Abigail nia inan-aman simu Nabal atu sai Abigail nia kaben ka lae? Karik tanba sira mak ema kiak, sira obriga Abigail atu kaben ho Nabal tanba Nabal mak ema riku no iha naran-boot. Maski ita la hatene razaun saida, maibé osan la halo Nabal sai laʼen neʼebé diʼak.

7. (a) Saida mak inan-aman presiza halo hodi sira-nia oan iha hanoin neʼebé loos kona-ba moris kaben nian? (b) Abigail hakaʼas an atu halo saida?

⁷ Ohin loron, inan-aman neʼebé matenek hanorin sira-nia oan atu iha hanoin neʼebé loos kona-ba moris kaben nian. Sira la obriga sira-nia oan atu kaben tan deʼit osan ka haruka sira namora kuandu idade sei kiʼik no seidauk prontu atu kaer responsabilidade ema boot nian. (1 Korinto 7:36)  Maski nuneʼe, tarde ona ba Abigail atu hanoin kona-ba buat sira-neʼe. Nia sai ona feen ba Nabal, nuneʼe nia simu ninia situasaun susar neʼe no hakaʼas an atu halo buat neʼebé diʼak liu.

8. Nabal koʼalia aat ba sé? Tanbasá mak ita bele dehan katak la matenek duni atu halo ida-neʼe?

⁸ Nabal foin halo Abigail nia situasaun sai aat liután. Mane neʼebé nia koʼalia aat mak David. Nia mak Jeová nia atan ida neʼebé laran-metin no neʼebé profeta Samuel kose mina, hodi hatudu katak David mak liurai neʼebé Maromak hili atu troka Saul. (1 Samuel 16:1, 2, 11-13) Tanba Liurai Saul laran-moras no hakarak atu oho David, David halai sees no hela iha rai-fuik hamutuk ho ninia soldadu naʼin-600 neʼebé laran-metin ba nia.

9, 10. (a) David ho ninia soldadu sira hasoru susar saida? (b) Tanbasá mak Nabal tenke agradese ba buat neʼebé David no ninia soldadu sira halo ba nia? (Haree mós nota-rodapé iha parágrafu 10.)

⁹ Nabal hela iha Maon, maibé nia serbisu besik Carmelo no karik nia mós iha rai iha neʼebá. Iha sidade sira-neʼe, iha foho-oan sira neʼebé iha duʼut barak no diʼak atu hakiak bibi. Nabal iha bibi 3.000. Maibé, ai-laran fuik mak haleʼu área neʼe. Iha parte súl mak rai-fuik boot naran Paran. Iha parte leste, dalan atu bá Tasi Mate, fatin neʼe mak rai-fuik no iha rai-naruk no fatuk-kuak sira. Iha fatin sira-neʼe mak David no ninia soldadu sira hetan susar atu hetan buat neʼebé sira presiza atu moris. Sira kasa atu hetan hahán no tahan terus oioin. Sira sempre hasoru bibi-atan joven sira neʼebé serbisu ba Nabal neʼebé riku.

¹⁰ Oinsá mak David nia soldadu sira haree Nabal nia bibi-atan sira? Maski fasil deʼit ba sira atu naʼok bibi, maibé sira nunka halo ida-neʼe. Sira sai fali fatin protesaun haleʼu Nabal nia bibi-lubun no bibi-atan sira. (Lee 1 Samuel 25:15, 16. *) Baibain, bibi no bibi-atan sira hasoru perigu barak. Iha tempu neʼebá iha animál fuik barak, no tanba Izraél nia  fronteira iha parte súl la dook, ema naʼok-teen husi rai seluk mai beibeik atu asalta no ataka. *

11, 12. (a) Oinsá mak David hatudu matenek no respeitu kuandu nia haruka mensajen ba Nabal? (b) Saida mak sala kona-ba dalan neʼebé Nabal hatán ba David nia mensajen?

¹¹ Klaru katak la fasil atu hetan hahán ba soldadu hotu iha rai-fuik neʼe. Tan neʼe, loron ida David haruka ema naʼin-10 atu bá hasoru Nabal hodi husu ajuda. Ho matenek David hili tempu neʼebé loos, tempu atu tesi bibi fulun. Baibain iha tempu hanesan neʼe, ema halo festa no hatudu laran-diʼak. David mós hili liafuan sira ho matenek no respeitu atu koʼalia. Nia uza liafuan “Ita-nia oan, David”, karik atu hatudu respeitu ho laran tanba Nabal idade boot liu nia. Saida mak Nabal halo?—1 Samuel 25:5-8.

¹² Nia hirus tebes! Mane joven neʼebé temi iha parágrafu primeiru hatete ba Abigail katak Nabal “hakilar ho hirus ba sira”. Ho lian makaʼas Nabal hatete katak nia lakohi fó ninia paun, bee, no naan husi ninia animál. Nia goza David nuʼudar ema kiʼik no dehan David hanesan atan ida neʼebé halai-sees husi ninia naʼin. Nabal nia hanoin karik hanesan deʼit ho Saul nian, neʼebé odi David. Sira naʼin-rua la iha hanoin hanesan Jeová. Maromak hadomi David no haree nia laʼós nuʼudar atan neʼebé kontradór, maibé nuʼudar ema neʼebé sei sai liurai ba ninia povu Izraél.—1 Samuel 25:10, 11, 14.

13. (a) David sente oinsá kona-ba Nabal nia liafuan? (b) Matadalan iha Tiago 1:20 hanorin saida mai ita?

¹³ Kuandu David nia ema fó-hatene ba nia buat neʼebé foin akontese, David sai hirus tebes. Nia haruka ninia soldadu sira: “Ema ida-idak kesi metin ninia surik.” David mós kesi ninia surik no lori ninia soldadu naʼin-400 atu bá ataka. Nia jura katak nia sei halakon mane hotu iha Nabal nia umakain. (1 Samuel 25:12, 13, 21, 22) Ita bele komprende tansá David hirus, maibé dalan neʼebé nia hatudu ida-neʼe laloos. Bíblia hatete: “Ema neʼebé sai hirus nunka halo buat neʼebé loos iha Maromak nia matan.” (Tiago 1:20) Maibé, oinsá mak Abigail bele salva ninia umakain?

14. (a) Iha dalan saida mak Abigail halo ona hakat primeiru atu hadiʼa problema boot neʼebé Nabal halo? (b) Abigail no Nabal nia hahalok la hanesan duni, saida mak ita bele aprende kona-ba neʼe?

¹⁴ Tuir loloos, Abigail halo tiha ona hakat primeiru atu hadiʼa problema boot neʼe. Oinsá? Abigail prontu atu rona. Nia la hanesan duni ho ninia laʼen. Tan neʼe mak atan joven neʼe la fó-hatene problema neʼe ba Nabal. Nia hatete kona-ba Nabal: ‘Nia mak ema neʼebé la serve buat ida, tan neʼe saugati deʼit atu koʼalia ba nia.’ (1 Samuel 25:17) Sin, Nabal nia hahalok foti-an halo nia lakohi atu rona. Ohin loron mós, hahalok hanesan neʼe mak barak tebes. Maibé mane joven neʼe hatene katak Abigail la hanesan ho ninia laʼen, tan neʼe nia fó-hatene problema neʼe ba Abigail.

15, 16. (a) Oinsá mak Abigail hatudu katak nia hanesan ho feen matenek neʼebé livru Provérbios koʼalia? (b) Buat neʼebé Abigail halo kontra ninia laʼen nia pozisaun nuʼudar ulun ka lae? Esplika toʼok.

¹⁵ Abigail hanoin didiʼak no halo kedas buat ruma. Iha istória neʼe, Bíblia temi ba dala haat katak Abigail ansi lalais atu halo buat ruma. Nia prepara buat barak atu fó ba David no ba ninia ema sira. Nia prepara paun, tua-uvas, bibi, fini sira neʼebé tunu, dose neʼebé halo husi uvas-maran no figu. Klaru katak Abigail hatene didiʼak buat neʼebé nia iha no nia rasik mak toma konta iha ninia uma-laran. Neʼe hanesan duni ho feen matenek neʼebé livru Provérbios koʼalia. (Provérbios [Amsal] 31:10-31) Nia haruka ninia atan balu atu lori uluk hahán hirak-neʼe, depois nia mesak bá tuir. Maibé kona-ba ninia laʼen Nabal, Bíblia hatete katak “nia la fó-hatene buat ida”.—1 Samuel 25:18, 19.

¹⁶ Ida-neʼe katak Abigail kontra ninia laʼen nia pozisaun nuʼudar ulun ka lae? Lae duni. La haluha katak Nabal hatudu hahalok aat ba Jeová nia atan ida neʼebé nia hili atu sai liurai, no hahalok neʼe bele halo ema barak iha Nabal nia umakain neʼebé la sala mós mate. Se Abigail la halo buat ruma, karik nia mós bele hola parte iha ninia laʼen nia  hahalok aat neʼe. Nuneʼe, Abigail hili atu hakruʼuk ulukliu ba ninia Maromak, duké ba ninia laʼen.

17, 18. (a) Saida mak Abigail halo kuandu nia hasoru David, no saida mak nia hatete? (b) Oinsá mak Abigail nia liafuan ajuda atu hadiʼa problema?

¹⁷ Lakleur, Abigail hasoru David no ninia ema sira. Iha tempu neʼe nia tun lalais husi ninia kuda-burru no monu ain iha David nia oin. (1 Samuel 25:20, 23) Depois nia fó sai buat hotu iha ninia laran, no husu David atu hatudu laran-sadiʼa ba ninia laʼen no ninia umakain. Oinsá mak ninia liafuan neʼe ajuda atu hadiʼa problema?

¹⁸ Abigail simu responsabilidade ba problema neʼe no nia husu David atu fó perdua ba nia. No nia fó sai katak ninia laʼen la matenek duni, hanesan ninia naran hatudu. Karik nia halo ida-neʼe atu hatudu katak, atu fó kastigu ba ema hanesan neʼe bele hafoʼer deʼit David nia naran. Abigail fó sai katak nia tau fiar ba David nuʼudar reprezentante husi Jeová, no nia rekoñese katak David halaʼo “Jeová nia funu sira”. Nia mós hatudu katak nia hatene Maromak nia promesa ba David no katak nia sei ukun nuʼudar liurai, tanba nia hatete: “Jeová . . . sei fó knaar duni ba Ita-Boot atu sai ukun-naʼin ba Izraél.” Tuirmai, nia husu makaʼas ba David atu la foti desizaun neʼebé bele halo nia hetan sala kona-ba ema nia raan ka ikusmai bele halo “nia laran sidi”, katak halo ninia laran fó-terus ba nia. (Lee 1 Samuel 25:24, 25, 28, 30, 31. *) Abigail nia liafuan neʼe book duni David nia laran!

19. David hatán oinsá ba Abigail nia liafuan? Tanbasá mak nia gaba Abigail?

 ¹⁹ Entaun, David hatán oinsá? Nia simu hahán sira neʼebé Abigail lori no hatete: “Hahiʼi ba Jeová, Maromak Izraél nian, neʼebé haruka ó ohin atu mai hasoru haʼu. No Maromak fó bensaun ba ó-nia matenek, no fó bensaun ba ó neʼebé hanetik haʼu ohin neʼe atu la hetan sala kona-ba ema nia raan.” David gaba Abigail tanba nia brani no lalais atu bá hasoru David, no nia rekoñese katak Abigail hanetik nia atu la hetan sala kona-ba ema nia raan. No nia hatete ba Abigail: “Bá ho dame ba ó-nia uma”, no ho haraik-an nia hatutan tan: “Haʼu rona ba ó-nia liafuan.”—1 Samuel 25:32-35.

20, 21. (a) Abigail prontu atu fila fali ba ninia laʼen, saida mak ita gosta husi ninia hahalok neʼe? (b) Oinsá mak Abigail hatudu aten-brani no matenek hodi hili tempu neʼebé loos atu koʼalia ba Nabal?

²⁰ Kuandu sira fahe malu, Abigail hanoin didiʼak kona-ba buat neʼebé foin akontese. Nia mós bele haree ho klaru katak David neʼebé laran-metin no laran-diʼak, la hanesan duni ho ninia laʼen neʼebé hatudu hahalok aat. Maibé nia la hanoin nafatin kona-ba neʼe. Bíblia hatete: “Lakleur Abigail bá hasoru Nabal.” Sin, nia fila fali ba ninia laʼen no halaʼo didiʼak ninia knaar nuʼudar feen. Nia tenke fó-hatene ba ninia laʼen kona-ba buat neʼebé nia fó ba David no nia ema sira tanba Nabal iha direitu atu hatene kona-ba neʼe. Abigail mós tenke fó-hatene ba Nabal kona-ba buat neʼebé nia halo atu hapara perigu. No nia tenke halo ida-neʼe antes Nabal rona husi ema seluk, tanba karik neʼe bele hamoe Nabal. Maibé Abigail presiza hein uitoan tanba iha tempu neʼe Nabal halaʼo hela festa boot no nia lanu tebes.—1 Samuel 25:36.

²¹ Dala ida tan Abigail hatudu aten-brani no matenek hodi hein toʼo loron tuirmai bainhira Nabal la lanu ona. Kuandu Nabal oin-moos ona nia bele komprende saida mak ninia feen hatete ba nia, maibé neʼe mós tempu neʼebé Nabal bele sai hirus lalais. Maski nuneʼe, Abigail hakbesik ba nia laʼen no konta buat hotu ba nia. Karik Abigail hanoin Nabal sei sai hirus tebes, no halo violénsia.  Maibé Nabal tuur metin deʼit no la book an.—1 Samuel 25:37.

22. Saida mak akontese ba Nabal? Maromak sente oinsá kona-ba kaben neʼebé trata aat ninia família?

²² Saida mak akontese ba mane neʼe? Bíblia hatete: “Ninia fuan mate iha ninia laran no nia sai hanesan fatuk.” Karik Nabal hetan atake-fuan, no liu tiha maizumenus loron sanulu nia mate. Nabal mate laʼós deʼit tanba moras ruma, Bíblia dehan: “Jeová foti liman hasoru Nabal, nuneʼe nia mate.” (1 Samuel 25:38) Tanba Jeová fó kastigu ho justisa ba Nabal, Abigail nia moris kaben nian neʼebé la kontente mós ramata. Maski agora Maromak la halo milagre hodi fó kastigu ba ema, maibé istória neʼe hanorin ita katak Maromak nunka taka matan ba ema neʼebé trata aat sira-nia kaben.  No iha tempu neʼebé loos, Jeová sempre halaʼo justisa.—Lee Lucas 8:17.

23. Abigail hetan bensaun saida tan? Oinsá mak nia hatudu katak ninia oportunidade atu sai feen ba David la troka ninia hahalok?

²³ Abigail livre ona husi moris kaben nian neʼebé la kontente, maibé nia atu hetan bensaun seluk tan. Bainhira David rona katak Nabal mate ona, nia haruka ninia atan sira atu husu Abigail hodi kaben ho nia. Abigail hatán: “Haʼu mak Ita-Boot sira-nia atan-feto neʼebé prontu atu fase haʼu-nia naʼi nia atan sira-nia ain.” Maski nia atu sai David nia feen, maibé Abigail hatudu haraik-an nafatin. Nia mós dehan katak nia prontu atu sai atan ba David nia atan sira! Bíblia hatete katak nia ansi dala ida tan, maibé iha tempu neʼe nia ansi atu prepara ninia an atu bá hamutuk ho David.—1 Samuel 25:39-42.

24. Abigail hasoru susar saida deʼit iha nia moris ho David, maibé ninia laʼen no ninia Maromak haree nia oinsá?

²⁴ Maski Abigail sai David nia feen, ida-neʼe laʼós katak nia sei la hasoru susar tan. David iha feen tiha ona naran Aínoam. Ita bele fiar katak susar tebes ba feto fiar-naʼin sira iha tempu neʼebá kuandu sira-nia laʼen iha feen barak. David mós seidauk sai liurai, tan neʼe nia tenke tahan susar no problema oioin antes nia hetan knaar ida-neʼe. Maski nuneʼe, Abigail nafatin ajuda no apoia David no ikusmai sira iha oan-mane ida. Abigail kontente katak nia iha laʼen neʼebé hafolin no proteje nia. Loron ida, David mós salva Abigail husi ema neʼebé hadau nia. (1 Samuel 30:1-19) Hodi halo ida-neʼe David banati-tuir Maromak Jeová, neʼebé hadomi no hafolin feto fiar-naʼin sira neʼebé hatudu hahalok matenek no aten-brani.