1, 2. Husi Noé nia tempu, oinsá mak ema troka sira-nia adorasaun? Oinsá mak Abraão sente kona-ba neʼe?

 NUʼUDAR Abraão hateke ba leten, nia haree templu ida iha ninia hela-fatin iha sidade Ur. * Suar sai husi templu neʼe nuʼudar amlulik sira halo sakrifísiu ba maromak fulan nian iha ema barak nia leet. Ida-neʼe akontese beibeik. Abraão sente oinsá haree ida-neʼe? Karik nia hirus uitoan nuʼudar nia laʼo fali ba ninia uma. Tuir loloos, adorasaun ba maromak falsu sira aumenta ba beibeik iha sidade Ur. Husi Noé nia tempu, ida-neʼe sai hanesan moras boot neʼebé hadaʼet iha mundu tomak.

² Noé mate tinan rua antes Abraão moris mai. Depois Rai-Nabeen, Noé hasaʼe sakrifísiu ba ninia Maromak Jeová. Depois neʼe, Jeová halo arkiris mosu. (Gênesis [Kejadian] 8:20; 9:12-14) Iha tempu neʼebá, ema hotu adora Jeová deʼit. Maibé, iha Abraão nia tempu, ema neʼebé adora Jeová mak uitoan deʼit. Barak liu mak adora maromak falsu sira. Abraão nia aman rasik naran Tera mós adora maromak falsu sira, no karik nia mós halo lulik.—Josué (Yosua) 24:2.

3. Abraão haburas hahalok saida? Oinsá mak ninia istória bele ajuda ita?

 ³ Maibé Abraão nia hahalok la hanesan ho ema sira-neʼe, no nuʼudar tempu liu daudaun Abraão nia fiar sai buras liután. Ikusmai, apóstolu Paulo bolu nia nuʼudar “aman ba sira hotu neʼebé iha fiar”. (Lee Roma 4:11.) Agora, mai ita hanoin didiʼak kona-ba Abraão nia istória, no nuʼudar ita halo ida-neʼe ita bele aprende buat barak hodi haburas ita-nia fiar rasik.

4, 5. Karik Abraão aprende kona-ba Maromak Jeová husi sé? Oinsá mak ita hatene ida-neʼe?

⁴ Oinsá mak Abraão aprende kona-ba Maromak Jeová? Maski ema barak lakohi halo tuir Jeová, maibé horiuluk kedas iha ona ema fiar-naʼin sira iha mundu. Hanesan mane ida naran Sem. Maski Sem laʼós Noé nia oan primeiru, maibé dala barak Bíblia temi uluk Sem nia naran. Tanbasá? Tanba Sem mak iha fiar neʼebé boot. * Lakleur depois Rai-Nabeen, Noé rasik hatete katak Jeová mak “Sem nia Maromak”. (Gênesis [Kejadian] 9:26) Tuir loloos, Sem sempre tau uluk Jeová no adorasaun neʼebé loos iha ninia moris.

⁵ Abraão koñese Sem ka lae? Karik nia koñese. Hanoin toʼok kuandu Abraão sei labarik, nia kontente atu hatene katak nia iha beiʼala ida neʼebé iha esperiénsia barak. Sem moris ba tinan 400 liu no nia haree buat barak iha ninia moris, hanesan situasaun aat iha mundu antes Rai-Nabeen, oinsá Rai-Nabeen halakon ema aat hotu, oinsá ema komesa sai barak fali iha mundu, no nia mós haree oinsá Nimrod, ukun-naʼin ida iha tempu neʼebá, kontra hasoru Maromak hodi harii sidade Babel. Maibé Sem laran-metin nafatin ba Maromak. Tan neʼe, kuandu Maromak halo ema koʼalia  língua oioin, Sem no ninia família, inklui mós Abraão, koʼalia nafatin língua orijinál neʼebé Noé mós koʼalia. Klaru katak Abraão haree Sem nuʼudar ezemplu neʼebé diʼak. Liután neʼe, durante tinan barak iha Abraão nia moris, Sem mós sei moris hela. Tan neʼe, karik Abraão aprende kona-ba Maromak Jeová liuhusi Sem.

6. (a) Saida mak Abraão aprende husi Rai-Nabeen? (b) Abraão no Sara nia moris oinsá?

⁶ Abraão aprende buat barak husi Rai-Nabeen. Nia hakarak atu laʼo ho Maromak, hanesan Noé mós halo. Tan neʼe mak Abraão la adora maromak falsu sira no ema haree katak ninia fiar la hanesan ho ema seluk. Maibé ikusmai, nia hetan ema ida neʼebé apoia nia. Nia kaben ho Sara, feto ida neʼebé bonita tebes no iha fiar metin ba Jeová. * Maski sira la iha oan, maibé ita bele fiar katak sira kontente atu serbí Jeová hamutuk. Sira mós hakiak Abraão nia sobriñu naran Lot.

7. Oinsá mak Jesus nia dixípulu sira bele banati-tuir Abraão?

⁷ Abraão nunka husik Jeová hodi adora fali maromak falsu sira iha Ur. Nia no Sara la taʼuk atu hatudu ba ema neʼebé adora maromak falsu sira katak sira-nia fiar la hanesan. Hodi ita bele haburas fiar neʼebé loos, ita mós tenke brani atu hatudu sai ita-nia fiar ba ema seluk. Jesus hatete katak ninia dixípulu sira “laʼós mundu neʼe nian” no katak ema sei odi sira tanba ida-neʼe. (Lee João 15:19.) Karik ita sente laran-tun kuandu ita-nia família ka kolega sira kontra ita tanba ita hili atu serbí Maromak Jeová. Maibé la haluha katak laʼós ita deʼit mak foti desizaun neʼe. Ita halo tuir Abraão no Sara nia ezemplu, neʼebé serbí Maromak ho laran-metin.

8, 9. (a) Saida mak akontese ba Abraão neʼebé halo nia hakfodak tebes? (b) Jeová hatete saida ba Abraão?

⁸ Loron ida, buat ida akontese ba Abraão neʼebé halo nia hakfodak tebes. Saida mak neʼe? Maromak Jeová koʼalia ba nia. Bíblia la esplika buat hotu kona-ba neʼe, maibé Bíblia hatete katak “Maromak glória nian” mosu ba nia. (Lee Apóstolu 7:2, 3.) Karik liuhusi anju ida neʼebé reprezenta Maromak, Abraão haree Maromak nia glória neʼebé boot tebes. Ita bele fiar katak Abraão sente kontente tebes atu haree katak ninia Maromak neʼebé moris, la hanesan duni ho estátua sira neʼebé ema seluk adora.

⁹ Maromak Jeová hatete saida ba Abraão? Nia dehan: “Sai husi ó-nia rai no husi ó-nia família sira no laʼo ba rai neʼebé haʼu sei hatudu ba ó.” Jeová la hatete rai ida-neʼebé mak nia hakarak Abraão atu bá. Nia hatete deʼit katak nia sei hatudu ba Abraão. Atu halo ida-neʼe, Abraão tenke husik ninia rai no ninia família. Tuir sira-nia kultura, família mak buat neʼebé importante tebes. Se mane ida husik ninia família no hela dook husi sira, ema balu hanoin katak ida-neʼe aat liu fali mate.

10. Tanbasá mak Abraão no Sara presiza halo sakrifísiu boot atu husik sidade Ur?

¹⁰ Abraão presiza halo sakrifísiu boot atu husik ninia rai rasik. Tanbasá? Tanba Ur mak sidade ida neʼebé riku tebetebes no modernu liu. (Haree kaixa “ Sidade neʼebé Abraão no Sara husik hela”.) Sidade neʼe iha uma barak neʼebé kapás no kuartu barak atu família no atan sira bele hela. Iha sidade neʼe iha bee-matan barak, hariis-fatin sira no baleta atu foʼer bele suli sai. Liután neʼe, Abraão no Sara mak ferik-katuas ona. Karik Abraão tinan 70 liu no Sara tinan 60 liu. Hanesan laʼen seluk, Abraão mós hakarak buat neʼebé diʼak ba ninia feen. Hanoin toʼok oinsá sira koʼalia ba malu kona-ba sira-nia knaar foun neʼe. Karik sira hanoin barak no iha pergunta sira kona-ba buat neʼebé Maromak husu sira atu halo. Hanoin toʼok, Abraão sente kontente tebes kuandu Sara dehan katak nia mós prontu atu bá. Sin, hanesan ho Abraão, Sara prontu  atu husik ninia moris diʼak iha Ur hodi muda ba fatin seluk.

11, 12. (a) Abraão no Sara presiza prepara saida deʼit? (b) Konta toʼok saida deʼit mak sira halo iha loron neʼebé sira atu sai husi Ur.

¹¹ Abraão no Sara iha buat barak atu prepara hodi muda ba rai seluk. Sasán saida deʼit mak sira sei lori no saida mak sira sei husik hela? No importante liu, oinsá ho sira-nia família, atan sira, no liuliu Abraão nia aman Tera neʼebé katuas liu ona? Sira deside atu lori nia no tau matan ba nia toʼo nia mate. Bíblia hatete katak Tera mak lori ninia família sai husi Ur. Neʼe hatudu katak Tera mós kontente atu bá no katak nia la adora ona maromak falsu sira. Abraão nia sobriñu Lot mós tuir sira.—Gênesis (Kejadian) 11:31.

¹² Ikusmai, loron toʼo ona ba sira atu bá. Ita bele imajina Abraão, Sara no sira-nia atan barak halibur iha sidade nia liʼur. Sira halibur ona bibi sira, kuda-kamelu no kuda-burru hotu mós prontu ona ho sasán neʼebé hulan iha sira-nia kotuk. * Karik ema hotu hateke ba Abraão no hein ba nia atu fó sinál atu sira bele arranka. Ikusmai, tempu toʼo ona. Sira hotu komesa laʼo no husik sidade Ur ba nafatin.

13. Oinsá mak irmaun-irmán barak ohin loron hatudu fiar hanesan Abraão no Sara?

¹³ Ohin loron, irmaun-irmán barak deside atu husik sira-nia hela-fatin hodi muda ba fatin neʼebé presiza haklaken-naʼin liután. Sira seluk deside atu aprende língua foun atu sira bele halo buat barak tan iha serbisu haklaken. No sira seluk tan hakaʼas an atu haklaken iha dalan neʼebé sira seidauk koko. Ita gaba sira tanba sira halo tuir Abraão no Sara hodi prontu atu husik buat ruma hodi halo desizaun sira-neʼe. Se ita mós hatudu fiar hanesan neʼe, Jeová sei fó bensaun duni ba ita-nia hakaʼas-an. Nia sei la haluha ita-nia fiar, hanesan nia la haluha Abraão nia fiar.—Ebreu 6:10; 11:6.

14, 15. Iha dalan husi Ur toʼo Haran, Abraão no ninia família sira halo saida deʼit? Tanbasá mak Abraão deside atu hela ba tempu uitoan iha Haran?

¹⁴ Lakleur, família neʼe sai toman ona hodi laʼo-rai. Hanoin toʼok, Abraão no Sara laʼo loron tomak, dala ruma sira troka malu, ida saʼe kuda-kamelu no ida seluk laʼo fali. Neineik-neineik família neʼe sai toman atu harii tenda no depois sobu fali. Sira mós presiza ajuda Tera hodi saʼe kuda-kamelu. Nuʼudar sira laʼo tuir Mota Eufrates, sira laʼo loron ba loron, semana ba semana toʼo sira laʼo kilómetru barak tebes.

¹⁵ Depois sira laʼo-rai maizumenus kilómetru 960 ona, sira toʼo iha sidade naran Haran. Sidade neʼe riku loos no iha uma sira neʼebé kapás. Iha fatin neʼe, Abraão nia  família foti desizaun atu hela ba tempu uitoan. Karik Tera fraku loos tanba sira laʼo dook tebes.

16, 17. (a) Jeová halo promete saida ba Abraão? (b) Oinsá mak Jeová fó bensaun ba Abraão iha Haran?

¹⁶ Lakleur, Tera mate kuandu nia tinan 205. (Gênesis [Kejadian] 11:32) Maski Abraão laran-susar tanba ninia aman mate, maibé Abraão hetan kmaan tanba Jeová koʼalia fali ho nia. Jeová repete fali buat neʼebé nia koʼalia ona iha sidade Ur. Maibé laʼós neʼe deʼit, Jeová mós hatete katak Abraão sei “sai nasaun boot”, no katak bensaun boot neʼe sei toʼo ba família hotu iha mundu tomak tanba Abraão. (Lee Gênesis [Kejadian] 12:2, 3. *) Liafuan sira-neʼe monu loos ba Abraão nia laran. Agora, ho laran-haksolok Abraão hatene katak nia presiza husik fatin neʼe hodi tuir Maromak nia hakarak.

¹⁷ Sira-nia sasán todan tebes kuandu sira prepara atu sai. Tanbasá? Tanba Jeová haraik bensaun ba família neʼe kuandu sira hela iha Haran. Bíblia koʼalia kona-ba “sasán hotu neʼebé sira halibur hamutuk no ema no animál sira neʼebé sira hetan iha Haran”. (Gênesis [Kejadian] 12:5) Atu Abraão nia família bele sai nasaun ida, nia presiza rikusoin no atan sira hodi ajuda nia. Tuir loloos, ita la hein hodi Jeová fó ita rikusoin, maibé ita bele fiar katak Jeová sei tau matan ba ita-nia presiza, hodi ita bele kumpre ninia hakarak. Iha tempu neʼe,  Abraão haree Jeová nia bensaun, no nia prontu duni atu halo buat neʼebé Jeová haruka nia atu halo.

18. (a) Loron saida mak espesiál tebes ba Maromak Jeová nia povu? (b) Saida tan mak akontese iha loron 14 fulan-Nisan iha tinan barak liutiha neʼe? (Haree kaixa “ Data neʼebé importante iha Bíblia nia istória”.)

¹⁸ Carquémis mak fatin ida neʼebé dook uitoan husi Haran. Iha fatin neʼe mak ema baibain hakur Mota Eufrates. Iha loron 14 fulan-Nisan iha tinan 1943 molok Kristu, Abraão lori ninia ema sira hakur mota. Loron neʼe mak loron espesiál duni iha Maromak Jeová nia povu nia istória. (Êxodo [Keluaran] 12:40-43) Iha parte súl mak rai neʼebé Jeová promete atu hatudu ba Abraão. Husi loron neʼe ba oin, Maromak nia promete ba Abraão komesa sai loos ona.

19. Kuandu Jeová koʼalia ba Abraão kona-ba ninia promete, nia esplika kona-ba saida? Ida-neʼe fó-hanoin Abraão kona-ba saida?

¹⁹ Abraão kontinua atu laʼo ba parte súl, no ikusmai toʼo fatin naran Moré neʼebé iha ai boboot sira, besik Sikém. Iha fatin neʼe, Jeová fó mensajen ba Abraão dala ida tan, maibé agora Jeová esplika didiʼak kona-ba Abraão nia família ka bei-oan sira neʼebé ikusmai sei hela iha rai neʼebé nia promete. Karik Abraão hanoin filafali kona-ba promete neʼebé Jeová fó sai iha jardín Eden. Tanbasá? Tanba promete neʼe mós koʼalia kona-ba “bei-oan” ida, neʼebé sei fó salvasaun ba ema hotu. (Gênesis [Kejadian] 3:15; 12:7) Karik iha tempu neʼe Abraão komesa atu komprende oinsá nia rasik sei hola parte atu kumpre Jeová nia hakarak hodi haraik bensaun ba mundu neʼe.

20. Oinsá mak Abraão hafolin knaar espesiál neʼebé Maromak fó ba nia?

²⁰ Abraão hafolin duni knaar espesiál neʼebé Maromak Jeová fó ba nia. Oinsá mak ita hatene ida-neʼe? Abraão sempre hanoin Jeová, no durante sira laʼo nia para iha fatin barak hodi harii altár no hasaʼe sakrifísiu. Porezemplu, nia halo ida-neʼe iha fatin besik ai boot sira iha Moré,  no depois iha fatin ida besik Betel. Nia sempre tau fiar ba Jeová no hatudu agradese, tanba nia hatene ninia família nia moris mak iha Jeová nia liman. Karik Abraão mós haklaken ba ema iha Kanaán. (Lee Gênesis [Kejadian] 12:7, 8. *) Hanesan fiar-naʼin sira seluk, Abraão mós tenke hasoru susar iha futuru, maibé nia nunka iha dúvida ka hanoin fali kona-ba ninia rikusoin neʼebé nia husik iha Ur. Nia tau ninia atensaun hotu ba buat neʼebé Maromak promete ba nia. Ebreu 11:10 hatete katak “nia hein hela sidade neʼebé iha hun metin, no ida neʼebé halo planu ba sidade neʼe no harii sidade neʼe mak Maromak”.

21. Saida mak ita hatene kona-ba Maromak nia Governu neʼebé Abraão la hatene? Ita hakarak hakaʼas an atu halo saida?

²¹ Ohin loron, ita hatene buat barak liu fali Abraão kona-ba sidade neʼe. Ita hatene katak sidade neʼe mak Maromak nia Governu. Maromak nia Governu neʼe ukun daudaun no sei halakon mundu aat neʼe. Ita mós hatene katak Abraão nia bei-oan, Jesus Kristu, mak liurai ba Governu neʼe. Ita sei sente kontente tebes atu haree Abraão moris hiʼas fali no aprende kona-ba oinsá Maromak kumpre ninia hakarak. Ita hakarak atu haree Maromak Jeová nia promesa sira sai loos ka lae? Se nuneʼe, hakaʼas an atu halo tuir Abraão nia ezemplu. Sai prontu atu halo sakrifísiu no husik buat ruma hodi serbí Maromak. Halo tuir nia no hatudu agradese ba knaar sira neʼebé Maromak Jeová fó ba ita. Abraão, neʼebé “aman ba sira hotu neʼebé iha fiar” mós sei sai hanesan ita-nia aman se ita banati-tuir ninia fiar.