Jesus esplika oinsá mak ita sei hatene katak “Maromak nia Ukun besik ona”. (Lucas 21:31) Nia fó sai buat sira neʼebé sei akontese, hanesan funu, rai-nakdoko makaʼas, rai-hamlaha, no moras. Buat sira-neʼe ita haree akontese daudaun ohin loron.​—Lucas 21:10-17.

Bíblia mós dehan katak ita bele hatene bainhira mak “loron ikus” husi ema nia governu liuhusi ema nia hahalok aat. Ita bele lee kona-ba neʼe iha 2 Timóteo 3:1-5. Bainhira ita haree ema nia atitude no hahalok sira-neʼe, karik Ita mós la duvida katak Bíblia nia profesia sai loos agora daudaun.

Maibé neʼe katak sá? Neʼe katak tempu besik ona ba Maromak atu hadiʼa mundu nia situasaun hodi sai diʼak liután. (Lucas 21:36) Iha Bíblia, Maromak promete buat diʼak kona-ba rai no ema neʼebé hela iha rai. Tuirmai mak ezemplu balu.

“[Jesus] simu kbiit nuʼudar liurai, simu dignidade, no simu ukun ida, atu nuneʼe povu, nasaun no ema neʼebé koʼalia língua oioin, sira hotu tenke serbí nia. Ninia ukun mak rohan-laek no ba nafatin, no ninia ukun sei nunka lakon.”​—DANIEL 7:14.

Neʼe katak sá: Governu neʼebé Maromak harii no Jesus nuʼudar Liurai sei ukun mundu tomak. Sei iha moris neʼebé diʼak iha governu neʼe nia ukun okos.

“La iha ema ida iha rai mak sei dehan: ‘Haʼu moras.’”​—ISAIAS 33:24.

Neʼe katak sá: Ita sei nunka sai moras ka aleijadu. Ita sei la mate tan.

“Nia sei hapara funu sira iha mundu tomak.”​—SALMO 46:9.

Neʼe katak sá: Sei la iha tan funu no terus hotu neʼebé akontese tanba funu.

“Ema aat sei la iha ona . . . Ema laran-maus sei simu rai nuʼudar sira-nian.​—SALMO 37:10, 11.

Neʼe katak sá: Sei la iha tan ema aat sira. Só ema neʼebé hakarak halo tuir Maromak mak sei hela iha mundu.

“Sira sei harii uma no hela iha laran, no sira sei kuda uvas iha toʼos no han ninia fuan.”​—ISAIAS 65:21, 22.

Neʼe katak sá: Mundu tomak sei sai hanesan jardín furak. Maromak sei kumpre buat neʼebé ita harohan kona-ba ninia hakarak “sai loos iha rai”.​—Mateus 6:10.