IMAJINA toʼok, Sara hamriik iha uma laran no hateke ba buat hotu ho ninia matan neʼebé furak tebes. Se nia hatudu oin-triste, ita bele komprende tanbasá. Nia ho ninia laʼen Abraão hela kleur iha uma neʼe no sira iha memória barak neʼebé diʼak tebes. *

Sira hela iha Ur, sidade riku neʼebé nakonu ho kontratu-naʼin no badain neʼebé iha matenek oioin. Tan neʼe, ita bele fiar katak Abraão no Sara mós iha rikusoin barak. Maski nuneʼe, ba Sara, ninia uma laʼós deʼit fatin atu rai sasán oioin, maibé mós fatin neʼebé nia ho ninia laʼen halaʼo moris kaben nian hodi sente kontente no triste hamutuk. Iha uma neʼe, sira mós harohan beibeik ba sira-nia Maromak Jeová neʼebé sira hadomi.

Maski nuneʼe, Sara prontu atu husik ninia uma. Karik nia tinan 60 ona, maibé nia sei halo viajen ba fatin dook neʼebé sira la hatene no sei hasoru susar no perigu oioin iha dalan. No nia sei la fila fali ba ninia uma iha Ur. Tanbasá mak Sara nia situasaun troka derrepente hanesan neʼe? Saida mak ita bele aprende husi ninia fiar?

Karik Sara hela iha sidade Ur dezde kiʼik. Ohin loron, sidade antigu neʼe rahun ona. Maibé iha Sara nia tempu, sidade neʼe iha bee-dalan neʼebé liga ho mota Eufrates, no iha ró barak neʼebé lori sasán oioin husi rai seluk. Imajina toʼok, sidade nia dalan sira neʼebé nakonu ho ema barak, ponte-kais neʼebé nakonu ho ró, no merkadu sira neʼebé faʼan sasán oioin. Sara boot nuʼudar sidade oan no iha família boot, no nia koñese ema barak. Ita bele fiar katak sira mós koñese Sara nuʼudar feto neʼebé bonita tebetebes.

Bíblia hatete katak Sara mak fiar-naʼin ida. Ninia fiar la hanesan ho ema seluk iha sidade Ur. Ema barak adora maromak fulan nian iha uma-andár aas ida iha sidade laran. Maibé Sara adora Maromak neʼebé loos, Jeová. Ninia aman adora maromak falsu. Bíblia la esplika oinsá mak Sara komesa fiar ba Jeová. Sara kaben ho Abraão, neʼebé boot liu tinan sanulu, neʼebé ikusmai sai “aman ba sira hotu neʼebé iha fiar”. * (Gênesis [Kejadian] 17:17; Roma 4:11) Abraão ho Sara halaʼo moris kaben nian neʼebé metin, respeitu malu, komprende malu no apoia malu. No importante liu mak, sira naʼin-rua hadomi tebes Jeová.

Sara hadomi tebes ninia laʼen, no sira naʼin-rua moris hakmatek iha sidade Ur. Maibé lakleur, sira hasoru susar ida neʼebé halo sira laran-tun. Bíblia hatete katak Sara “la bele iha oan”. (Gênesis  [Kejadian] 11:30) Iha tempu neʼebá no tuir sira-nia kultura, feto neʼebé la bele iha oan sente laran-susar tebes. Maibé Sara laran-metin ba Maromak no mós ba ninia laʼen. Sira haboot sira-nia sobriñu Lot neʼebé ninia aman mate ona, no Lot sai hanesan sira-nia oan rasik. Maibé loron ida, sira-nia moris troka derrepente deʼit.

Abraão hakbesik ba Sara ho matan nabilan. Nia hakfodak ho buat neʼebé mak foin akontese. Maromak Jeová foin koʼalia ba nia liuhusi anju ida! Imajina toʼok, Sara hateke ba ninia laʼen, hodi husu: “Nia hatete saida ba ó? Hatete mai haʼu!” Karik Abraão tuur no hanoin fali, no tuirmai nia hatete ba Sara kona-ba Jeová nia lia-menon neʼebé dehan: “Sai husi ó-nia rai no husi ó-nia família sira no laʼo ba rai neʼebé haʼu sei hatudu ba ó.” (Apóstolu 7:2, 3) Bainhira sira naʼin-rua sai kalma fali, sira komesa hanoin didiʼak kona-ba knaar neʼebé sira hetan husi Jeová. Sira-nia moris sei iha mudansa boot, tanba sira presiza husik sira-nia moris diʼak no sai fali ema laʼo-rai. Sara sente oinsá? Abraão hateke ba Sara. Sara kontente atu apoia nia ka lae?

Karik susar ba ita atu komprende Sara nia situasaun. Karik ita hanoin: ‘Maromak nunka husu haʼu atu halo buat ruma hanesan neʼe!’ Maski nuneʼe, hanesan ho Sara, ita hotu presiza halo desizaun. Ita moris iha mundu neʼebé ema barak buka osan no moris diʼak. Maibé Bíblia anima ita atu buka uluk Maromak nia hakarak duké buka ita rasik nia haksolok. (Mateus 6:33) Kuandu ita hanoin kona-ba Sara nia ezemplu, ita bele husu ba ita-nia an: ‘Saida mak importante liu ba haʼu-nia moris?’

Bainhira Sara haloot ninia sasán sira, nia presiza foti desizaun oioin: Sasán saida mak nia sei lori, no sasán saida mak nia sei husik? Sasán saida mak nia sei faʼan no sasán saida mak nia sei fó deʼit ba família ka viziñu sira? Klaru katak nia tenke husik hela sasán oioin neʼebé ladún importante ka sasán neʼebé mak boot demais atu tula iha kuda-burru no kuda-kamelu. Laʼós neʼe deʼit, Sara mós presiza husik hela ninia moris iha sidade Ur neʼebé nia toman ona. Iha Ur, fasil ba Sara atu bá merkadu no hola buat naran deʼit, hanesan trigu, naʼan, ai-fuan, roupa no sasán seluseluk.

Maibé karik buat neʼebé susar liu ba Sara mak atu husik ninia uma. Iha Abrão nia tempu, ema barak iha sidade Ur iha moris neʼebé diʼak tebes. Uma balu iha kuartu barak tebes no iha mós torneira. Uma baibain deʼit mós harii ho diʼak no iha odamatan neʼebé bele xave metin. Ema neʼebé hela iha tenda bele sente seguru hanesan neʼe ka lae?  Karik susar ba sira atu proteje sira-nia an husi naʼok-teen, no mós husi animál fuik sira hanesan leaun, leopardu, ursu no asu-fuik.

Sara mós presiza fó adeus ba sé-sé deʼit? Karik Sara sente susar atu halo tuir Maromak nia mandamentu atu “sai husi ó-nia rai” no mós atu husik “ó-nia família sira”. Ita bele fiar katak Sara mak ema neʼebé hadomi tebes ninia maun-alin, sobriñu-sobriña, no tia ho tiu sira. Sara hatene katak karik nia sei nunka hasoru fali sira. Maski nuneʼe, Sara kontinua prepara an ba loron neʼebé nia no ninia laʼen sei komesa sira-nia viajen.

Ikusmai, maski laran-susar, Sara prontu atu sai husi sidade Ur iha loron neʼebé deside nanis ona. Katuas Tera neʼebé maizumenus tinan 200 ona mós bá hamutuk ho sira. (Gênesis [Kejadian] 11:31) Karik Sara presiza halo buat barak atu bele tau matan ba Tera. Sira-nia sobriñu Lot mós bá hamutuk ho sira hodi halo tuir Jeová no “laʼo sai husi ema Kaldeia nia rai”.—Apóstolu 7:4.

Grupu neʼe laʼo saʼe tuir mota Eufrates. Depois laʼo dook maizumenus kilómetru 960 ba norte, sira toʼo sidade Haran. Iha fatin neʼe, sira hela ba tempu kleur uitoan. Karik Tera la iha kbiit atu kontinua laʼo rai. Ikusmai, Tera mate ho tinan 205. Antes sira komesa fali sira-nia viajen, Maromak Jeová koʼalia ba Abraão dala ida tan, hodi haruka nia atu husik rai Haran no bá toʼo rai neʼebé Jeová sei hatudu ba nia. Maibé laʼós neʼe deʼit, Jeová mós promete ba Abraão: “Haʼu sei halo ó sai nasaun boot ida.” (Gênesis [Kejadian] 12:2-4) Promesa neʼe halo Abraão kontente! Maibé bainhira sira sai husi Haran, Abrão tinan 75 no Sara tinan 65, no sira la iha oan. Entaun, oinsá mak Abrão bele sai aman ba nasaun ida? Karik Abraão presiza iha feen seluk. Karik Sara hanoin hanesan neʼe, tanba iha tempu neʼebá, normál ba mane ida atu iha feen barak.

Sira hahú fali sira-nia viajen. Maibé iha tempu neʼe, sira-nia grupu sai boot liután. Bíblia hatete katak sira lori rikusoin barak liután no mós “ema sira neʼebé sira hetan iha Haran”. (Gênesis [Kejadian] 12:5) Sé-sé deʼit mak tuir Abraão no Sara? Karik atan sira. Ita bele fiar katak Abraão no Sara koʼalia sai sira-nia fiar ba sira neʼebé hakarak atu rona. Ema judeu nia livru antigu sira fó sai katak ema balu iha Haran mós komesa adora Jeová no halo viajen hamutuk ho Abraão no Sara. Neʼe hatudu katak Sara fó-hatene ba ema seluk kona-ba Jeová no esperansa ba futuru ho fiar neʼebé metin. Neʼe mak ezemplu diʼak ba ita, tanba ohin loron ema barak nia fiar sai menus ba daudaun. Bainhira ita aprende buat diʼak husi Bíblia, koko toʼok atu fahe ida-neʼe ba ema seluk.

Karik iha loron 14 fulan-Nisan iha tinan 1943 molok Kristu, sira hakur mota Eufrates, no sira kontinua sira-nia viajen atu bá rai neʼebé Jeová promete ona ba sira. (Êxodo [Keluaran] 12:40, 41) Imajina toʼok oinsá mak Sara sente bainhira nia hateke haleʼu rai neʼebé furak ho klima neʼebé fresku tebes. Bainhira sira toʼo tiha ai-hun boot ida iha Moré, besik Sikem, Jeová koʼalia dala ida tan ba Abraão. Nia hatete: “Haʼu sei fó rai neʼe ba ó-nia bei-oan.” Liafuan “bei-oan” book duni Abraão nia laran! Ita fiar katak liafuan neʼe halo nia hanoin fali kona-ba Jeová nia promesa iha jardín Eden, katak sei iha bei-oan ida neʼebé sei halakon Satanás. Jeová hatete ona ba Abraão katak liuhusi nasaun ida neʼebé mai husi Abraão mak ema hotu iha mundu tomak sei hetan bensaun.—Gênesis (Kejadian) 3:15; 12:2, 3, 6, 7.

Maski nuneʼe, Abraão no Sara hetan susar oioin. Rai-hamlaha mosu iha Kanaán, no Abraão deside atu lori ninia família tomak bá rai-Ejitu. Maibé nia hatene katak sei iha perigu boot iha área neʼebá. Tan neʼe, nia hatete ba Sara: “Favór ida, rona haʼu! Ó mak feto neʼebé bonita. No kuandu ema Ejitu haree ó, sira sei dehan: ‘Neʼe mak ninia feen.’ No sira sei oho haʼu maibé husik ó moris. Favór ida, dehan katak ó mak haʼu-nia feton, hodi nuneʼe buat aat la bele mosu ba haʼu, no haʼu sei la lakon haʼu-nia moris.” (Gênesis [Kejadian] 12:10-13) Tanbasá mak Abraão hatete hanesan neʼe?

Ema balu dehan katak Abraão mak bosok-teen no taʼuk-teen, maibé neʼe la loos. Sara mak Abraão nia alin duni. No Abraão iha razaun neʼebé loos  atu sente taʼuk. Abraão no Sara hatene katak buat neʼebé importante liu mak Maromak nia hakarak atu iha bei-oan espesiál no nasaun neʼebé mai husi Abraão. Tan neʼe Abraão la bele mate antes nia iha oan. Matenek-naʼin sira kona-ba istória antigu mós rekoñese katak, iha tempu neʼebá ulun-naʼin Ejitu sira iha toman atu hadau ema nia feen no oho laʼen sira. Tan neʼe, Abraão halo desizaun ho matenek, no Sara mós ho haraik-an halo tuir ninia desizaun neʼe.

Lakleur, buat neʼebé halo Abraão sente taʼuk akontese duni. Liurai Ejitu nia ema-boot sira haree katak Sara mak feto neʼebé bonita tebes maski ferik ona. Sira fó-hatene ba liurai Ejitu kona-ba Sara, no liurai haruka sira atu lori Sara ba ninia palásiu! Ita bele fiar katak Abraão sai laran-susar tebes no Sara mós sente taʼuk. Maibé liurai bolu Sara nuʼudar ninia bainaka, laʼós nuʼudar atan ka inimigu ida. Karik liurai Ejitu hakarak hatudu ninia rikusoin ba Sara atu halo nia laran-monu, no tuirmai husu lisensa ba Sara nia “maun” Abraão atu bele kaben ho Sara.—Gênesis (Kejadian) 12:14-16.

Imajina toʼok, Sara hamriik iha liurai Ejitu nia palásiu no hateke ba rai-Ejitu liuhusi janela ka varanda. Nia sente oinsá kona-ba moris iha uma neʼebé diʼak no han hahán oioin neʼebé gostu tebes? Nia hakarak atu iha moris neʼebé diʼak hanesan uluk ka lae? Se Sara hanoin atu soe Abraão no kaben fali ho liurai Ejitu, Diabu Satanás sei sente kontente tebes! Maibé Sara nunka hanoin hanesan neʼe. Nia laran-metin ba ninia laʼen, ba arranju kaben nian, no mós ba Maromak. Neʼe mak ezemplu diʼak ba kaben-naʼin hotu neʼebé moris ohin loron! Ita mós bele halo tuir Sara nia ezemplu hodi hatudu laran-metin ba Ita-nia família no belun sira ka lae?

Jeová proteje Sara hodi hamosu susar boot oioin ba liurai Ejitu no ninia umakain. Bainhira liurai Ejitu hatene katak Sara mak Abraão nia feen, nia haruka Sara atu fila fali ba Abraão no husu sira atu sai husi rai-Ejitu. (Gênesis [Kejadian] 12:17-20) Abraão sente kontente tebetebes bainhira hasoru fali Sara! Abraão hafolin Sara nia bonita no hatete ona ba Sara: “Ó mak feto neʼebé bonita.” Maibé, Abraão hafolin liután Sara nia hahalok diʼak, no Jeová mós hafolin ida-neʼe. (1 Pedro 3:1-5) Tuir loloos, ita mós bele haburas hahalok diʼak hanesan Sara. Mai ita buka uluk Maromak nia hakarak duké buka rikusoin, hakaʼas an atu fahe ita-nia fiar ba ema seluk, no kaer metin nafatin Maromak nia prinsípiu kona-ba morál maski hasoru tentasaun oioin. Se ita halo buat hirak-neʼe, ita sei banati-tuir Sara nia fiar.