Maromak la fihir ema no hakarak fó bensaun ba ema hotu.

Maromak promete ba profeta Abraão katak “família hotu iha rai sei hetan duni bensaun liuhusi ó”.—Génesis 12:3.

Saida mak ita aprende? Maromak hadomi tebes ita no hakarak fó bensaun ba família hotu neʼebé halo tuir nia, neʼe inklui mane, feto no labarik.

Maromak mak laran-sadiʼa no fó bensaun ba ema neʼebé hakaʼas an atu aprende kona-ba nia.

Maromak neʼebé Aas Liu Hotu fó ba profeta Moisés kbiit atu halo milagre sira neʼebé boot. Maibé Moisés nafatin husu iha ninia orasaun: “Halo haʼu hatene Ita-nia dalan sira, atu nuneʼe haʼu bele hatene Ita no Ita nafatin simu haʼu.” (Éxodo 33:13) Maromak kontente ho buat neʼebé Moisés husu hodi fó bensaun ba nia atu bele iha matenek no komprende kona-ba Maromak nia hahalok sira. Porezemplu, Moisés aprende katak Kriadór mak “laran-sadiʼa no laran-diʼak”.—Éxodo 34:6, 7.

Saida mak ita aprende? Maromak hakarak fó bensaun mai ita hotu se ita hakaʼas an atu buka-hatene liután kona-ba nia. Nia fó-hatene liuhusi Eskritura Sagrada oinsá atu adora nia no katak nia hakarak tebes atu ajuda no haraik bensaun mai ita.

Ita bele hetan Maromak nia bensaun neʼebé ba nafatin se ita aprende kona-ba Jesus no saida mak nia hanorin no halo ona.

Maromak nia Liafuan hakerek buat barak kona-ba Jesus nia moris no buat neʼebé nia hanorin. Maromak fó ba Jesus kbiit atu halo milagre sira neʼebé boot, hanesan kura ema matan-delek, ema monok, no ema ain-kudeʼik. Jesus mós bele halo ema mate moris fali. Jesus halo buat neʼebé lakleur tan Maromak sei halo ba ema hotu. Nia esplika oinsá mak ita ida-idak bele simu bensaun sira-neʼe: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.”—João 17:3.

Jesus hatudu domin no laran-diʼak. Mane no feto, joven no idade, simu ninia konvite: “Aprende husi haʼu, tanba haʼu laran-maus no haraik an, no imi sei sente kmaan.” (Mateus 11:29) La hanesan ho ema iha Jesus nia tempu neʼebé la hatudu respeitu ba feto, Jesus trata feto ho laran-diʼak, dignidade, no respeitu.

Saida mak ita aprende? Jesus hatudu domin boot ba ema, no nia hatudu ezemplu diʼak mai ita kona-ba oinsá ita tenke trata ema seluk.

Eskritura Sagrada hanorin katak “iha Maromak loos ida deʼit”, no Jesus Kristu mak ida-neʼebé Maromak uza atu hatoʼo ninia mensajen. (1 Korinto 8:6) Jesus hatete ho klaru katak Maromak boot liu fali nia no Maromak mak haruka nia mai iha mundu.—João 11:41, 42; 14:28. *