Ema balu hanoin katak Maromak nia Liafuan neʼebé hakerek iha tempu uluk la hanesan ho Eskritura Sagrada neʼebé agora ita iha. Maibé profeta Isaias dehan katak Maromak nia liafuan “hela ba nafatin”. (Isaias 40:8) Oinsá mak ita bele hatene katak Maromak nia liafuan sira husi uluk toʼo agora la troka?

Maromak iha kbiit atu proteje ninia Liafuan atu nuneʼe labele troka. Iha tempu uluk, ema neʼebé iha knaar atu halo kopia ba Eskritura sira, sura letra ida-idak ho kuidadu atu la iha liafuan ida neʼebé aumenta, troka, ka hasai. Maski nuneʼe, tanba ema la perfeitu, dala ruma sira halo sala kiʼik balu.

Iha kopia manuskritu antigu rihun ba rihun husi Eskritura Sagrada. Maski kopia ida iha diferensa kiʼik, ita bele kompara ho kopia sira seluk atu hatene mensajen neʼebé orijinál.—Atu hatene liután, haree informasaun “Apakah Isi Alkitab Telah Diubah?” iha jw.org.

Porezemplu hanoin toʼok kona-ba dokumentu antigu sira naran Livru Tasi Mate nian, neʼebé ema Arábia hetan iha fatuk-kuak besik Tasi Mate iha tinan 1947. Livru sira-neʼe hakerek parte balu husi Eskritura Sagrada husi tinan rihun rua liubá. Matenek-naʼin sira kompara livru sira-neʼe ho Eskritura Sagrada neʼebé ita iha ohin loron. Rezultadu mak saida?

Matenek-naʼin sira dehan katak hodi haree didiʼak ba manuskritu antigu sira-neʼe, hatudu katak Eskritura Sagrada neʼebé ita iha ohin loron mak hanesan deʼit ho testu orijinál. * Ita bele fiar katak Maromak proteje atu ninia mensajen la troka toʼo ohin loron.

Tan neʼe ita bele lee Maromak nia Liafuan ho fiar metin katak liafuan sira husi uluk toʼo agora la troka. Agora mai ita haree, saida mak ita bele aprende kona-ba Maromak liuhusi ninia profeta sira.