Domingu lokraik ida, Kenneth ho Filomena, neʼebé hela iha rai-Kurasau, bá vizita feen-laʼen ida atu estuda Bíblia ho sira.

Kenneth konta: “Bainhira ami toʼo, uma neʼe taka metin no karreta mós la iha. Maibé haʼu sente haʼu tenkesér telefone uma-naʼin.”

Uma-naʼin simu telefone no esplika katak ninia laʼen bá tiha serbisu. Bainhira nia hatene katak Kenneth no Filomena iha uma oin, nia loke odamatan no konvida sira atu tama.

Kenneth no Filomena haree katak feto neʼe foin tanis. No bainhira Kenneth halo orasaun atu komesa estuda Bíblia, feto neʼe tanis fali. Tan neʼe, ho laran-diʼak, sira husu tansá mak nia tanis.

Feto neʼe esplika katak nia iha moras depresaun no hanoin atu oho an, no ohin nia hakerek hela karta ba ninia laʼen bainhira Kenneth telefone. Tuirmai, Kenneth no Filomena fahe liafuan husi Bíblia atu ajuda nia sente kmaan. Sira-nia vizita salva duni feto neʼe nia moris.

Kenneth hatete: “Ami fó-agradese ba Jeová tanba ami bele ajuda feto neʼe, no mós Nia book ami atu telefone feto neʼe. Karik Nia uza anju ida ka Ninia espíritu santu hodi halo nuneʼe.” *

Kenneth no Filomena fiar katak Maromak nia espíritu santu ka anju ida mak book sira atu telefone feto neʼe. Maibé hanoin hanesan neʼe loos ka lae?

Ita la hatene ho loloos. Maibé Bíblia fó sai katak Maromak uza anju sira hodi ajuda ema atu hakbesik ba Nia. Porezemplu, Bíblia hatete katak Maromak nia anju ida book Filipe atu ajuda ema-boot ida husi rai-Etiópia, neʼebé hakarak komprende Maromak nia liafuan.—Apóstolu 8:26-31.

Relijiaun barak hanorin kona-ba anju ka kriatura espíritu sira neʼebé halo tuir Maromak nia hakarak, ka proteje ema husi asidente ka dezastre ruma. Ema barak fiar katak anju sira iha duni no bele ajuda ema. Maibé iha mós ema barak neʼebé la fiar ba anju sira.

Entaun, anju sira iha duni ka lae? Se sira iha duni, sira mai husi neʼebé? Saida mak Bíblia hanorin kona-ba anju sira? Sira bele ajuda ita ka lae? Mai ita buka-hatene hamutuk.