Haʼu moris iha knua kiʼik ida iha distritu Saksónia iha rai-Alemaña Repúblika Demokrátika (rai-Alemaña Leste). Haʼu-nia inan-aman hadomi haʼu no hanorin haʼu morál neʼebé diʼak. Ba ema barak iha Saksónia, relijiaun la importante tanba rai-Alemaña Leste mak rai komunista. Haʼu mós la fiar Maromak. Buat rua neʼe fó influénsia boot ba haʼu-nia moris toʼo haʼu tinan 18.

Haʼu gosta tebes komunista nia sistema tanba sira hanorin katak ema hotu mak hanesan deʼit. Haʼu mós fiar katak governu sei fahe sasán neʼebé hanesan ba ema ida-idak hodi nuneʼe la iha ema neʼebé riku ka kiak. Tan neʼe, haʼu sai okupadu ho organizasaun ida ba joven komunista sira. Bainhira haʼu tinan 14, haʼu uza tempu barak ba projetu ambiente ida. Ulun-naʼin sira iha haʼu-nia knua agradese tebes ba haʼu-nia hakaʼas-an, tan neʼe sira fó prémiu ba haʼu. Maski haʼu sei joven, haʼu koñese polítiku-naʼin boot balu. Haʼu sente katak haʼu-nia planu sira mak diʼak no haʼu sei hetan susesu.

Maibé derrepente buat hotu troka. Iha tinan 1989, Moru Berlín rahun no governu komunista sira iha Europa Leste mós troka. Haʼu hakfodak loos. Lakleur, haʼu rekoñese katak la iha justisa iha rai-Alemaña Leste. Porezemplu, ema neʼebé la apoia governu komunista hetan susar. Haʼu husu ba haʼu-nia an: ‘Oinsá ida-neʼe bele akontese? Ami komunista fiar katak ema hotu mak hanesan. Entaun, komunista nia fiar mak mehi deʼit ka?’ Haʼu sai laran-susar loos.

Entaun haʼu troka haʼu-nia planu no komesa estuda múzika no arte. Haʼu bá eskola múzika nian no hakarak kontinua bá universidade, no haʼu hakarak sai artista. Haʼu mós husik morál diʼak neʼebé haʼu aprende bainhira haʼu sei labarik. Ba haʼu, buat neʼebé importante mak goza moris, inklui mós namora ho feto balu iha tempu hanesan. Maibé múzika, arte no moris livre la halo haʼu sente kmaan. Haʼu nafatin sente taʼuk no laran-susar. Haʼu hatudu sai ida-neʼe liuhusi haʼu-nia dezeñu sira. Haʼu hanoin: ‘Saida mak sei akontese iha futuru? Tanbasá mak ita moris?’

 Bainhira haʼu hetan resposta ba pergunta sira-neʼe haʼu hakfodak. Kalan ida iha eskola, haʼu tuur no koʼalia ho estudante sira kona-ba futuru. Estudante ida neʼebé Testemuña ba Jeová, naran Marcia * hatete: “Andreas, se ó hakarak hetan resposta ba ó-nia pergunta sira kona-ba moris no futuru, koko toʼok atu estuda didiʼak Bíblia.”

Maski duvida, haʼu deside atu buka resposta husi Bíblia. Marcia hatudu husi Bíblia Daniel kapítulu 2, no buat neʼebé haʼu lee halo haʼu hakfodak. Profesia neʼe esplika kona-ba governu sira neʼebé sei ukun tuituir malu no lori impaktu boot toʼo ohin loron. Marcia mós hatudu profesia seluk kona-ba ita-nia futuru. Neineik-neineik, haʼu komesa hetan resposta ba haʼu-nia pergunta sira! Maibé, sé mak hakerek profesia sira-neʼe? No sé mak bele siʼik futuru ho loloos hanesan neʼe? Karik Maromak iha duni.

Liuhusi Marcia, haʼu hasoru Horst no Angelika, kaben-naʼin ida neʼebé ajuda haʼu aprende didiʼak Bíblia. Lakleur haʼu rekoñese katak só Testemuña ba Jeová deʼit mak sempre tau atensaun ba Maromak nia naran, Jeová. (Salmo [Mazmur] 83:18; Mateus 6:9) Haʼu aprende katak Maromak Jeová fó oportunidade ba ita ema atu moris ba nafatin iha mundu paraízu. Salmo 37:9 dehan: “Sira neʼebé tau esperansa ba Jeová sei simu rai.” Haʼu gosta esperansa neʼe tanba ema hotu neʼebé moris tuir Maromak nia matadalan bele hetan oportunidade furak neʼe.

Maski nuneʼe, haʼu sente susar atu troka haʼu-nia hahalok hodi moris tuir Bíblia. Susesu neʼebé haʼu hetan nuʼudar artista halo haʼu sai foti-an, entaun ulukliu haʼu tenke aprende atu haraik an. Susar mós ba haʼu atu husik haʼu-nia moris neʼebé la iha morál. Haʼu agradese tebes tanba Jeová hatudu pasiénsia, laran-sadiʼa no komprende ema neʼebé hakaʼas an atu moris tuir Bíblia nia hanorin!

Toʼo haʼu tinan 18, haʼu fiar ba komunizmu no la fiar ba Maromak. Liutiha neʼe, Bíblia troka haʼu-nia moris. Buat neʼebé haʼu aprende ajuda haʼu atu la hanoin demais kona-ba futuru no mós atu iha objetivu ba haʼu-nia moris. Iha tinan 1993, haʼu hetan batizmu nuʼudar Testemuña ba Jeová. Iha tinan 2000, haʼu kaben ho maluk Testemuña ida naran Tabitha. Ami hakaʼas an tebes atu uza ami-nia tempu hodi ajuda ema seluk atu hatene Bíblia nia hanorin. Ema barak neʼebé ami hasoru mak komunista no la fiar ba Maromak, hanesan haʼu uluk. Haʼu sente kontente tebes atu esplika ba sira oinsá atu koñese Jeová.

Foufoun bainhira haʼu estuda ho Testemuña ba Jeová, haʼu-nia inan-aman la kontente. Maibé ikusmai sira haree katak estuda Bíblia ho Testemuña lori rezultadu diʼak ba haʼu-nia moris. No haʼu kontente tanba agora sira mós lee Bíblia no tuir reuniaun sira husi Testemuña ba Jeová.

Tabitha no haʼu iha moris kaben nian neʼebé kontente tanba ami hakaʼas an atu halo tuir Bíblia nia matadalan kona-ba moris kaben nian. Porezemplu, Bíblia nia konsellu ajuda ami atu laran-metin ba malu.​—Ebreu 13:4.

Agora haʼu la taʼuk tan kona-ba futuru. Haʼu sente katak haʼu mak parte iha família boot ida iha mundu tomak, neʼebé iha dame no unidade. Iha família boot neʼe, ami hotu hanesan deʼit, la iha ida mak boot liu ka kiʼik liu. Neʼe mak buat ida neʼebé haʼu hakarak atu haree husi kiʼik kedas.