La fasil atu buka prezente neʼebé diʼak liu ba ema seluk. Ema neʼebé simu prezente mak hatene prezente neʼebé Ita fó iha folin ka lae. No ema ida-idak nia dalan atu haree prezente la hanesan.

Porezemplu, karik ba joven sira sasán eletróniku foun mak prezente neʼebé kapás. Maibé ema boot sira hafolin liu prezente neʼebé iha arti importante ruma, hanesan lembransa neʼebé família fó tutan husi jerasaun ba jerasaun. Iha kultura balu, prezente neʼebé ema gosta liu atu simu mak osan, tanba ema neʼebé simu bele uza osan neʼe tuir sira-nia hakarak.

Maski la fasil, maibé ema neʼebé laran-diʼak sei hakaʼas an atu buka prezente diʼak ba ema neʼebé sira hadomi. Karik susar atubele hetan prezente neʼebé diʼak, maibé hodi hanoin didiʼak pontu haat tuirmai neʼe, bele ajuda ita atu fó prezente neʼebé ema sei hafolin.

Prezente neʼebé ema hakarak. Mane ida iha Belfast, rai-Irlanda Norte, hatete katak bisikleta neʼebé nia simu bainhira nia tinan maizumenus 11 mak prezente neʼebé diʼak liu hotu. Tanbasá? Nia hatete: “Tanba haʼu gosta tebes bisikleta neʼe.” Esperiénsia neʼe hatudu katak ema sei hafolin prezente ida, se ida-neʼe mak buat neʼebé sira hakarak. Entaun hanoin toʼok kona-ba ema nia hakarak antes Ita fó prezente ruma. Koko atu buka-hatene saida mak ema neʼe hafolin, tanba ida-neʼe mós bele hatudu sai ninia hakarak. Porezemplu, baibain avó sira gosta tebes atu gasta tempu hamutuk ho família. Karik sira-nia hakarak mak atu hasoru beibeik sira-nia oan no bei-oan. Entaun, se nuneʼe prezente neʼebé sira sei hafolin mak bá feriadu hamutuk ho sira-nia oan no bei-oan.

Atubele hatene ema nia hakarak, Ita presiza sai rona-naʼin neʼebé diʼak. Bíblia anima ita: “Lalais  atu rona, neineik atu koʼalia.” (Tiago 1:19) Bainhira koʼalia ho Ita-nia kolega ka família, rona didiʼak ba sira, atu bele hatene saida mak sira gosta no la gosta. Tanba se Ita rona didiʼak, karik Ita bele fó prezente neʼebé sira sei gosta.

Prezente neʼebé ema presiza. Maski simples deʼit, ema sei hafolin prezente neʼebé Ita fó, se ida-neʼe mak buat neʼebé sira presiza duni. Se nuneʼe, oinsá Ita bele hatene saida mak ema neʼe presiza?

Karik Ita hanoin, fasil liu atu husu saida mak ema neʼe presiza ka hakarak. Maibé ema barak sente ladún kontente ho dalan hanesan neʼe, tanba sira lakohi ema neʼe hatene katak sira sei fó prezente ruma. Liután neʼe, maski ema balu koʼalia nakloke kona-ba saida mak sira gosta ka la gosta, maibé baibain sira la koʼalia sai sira-nia presiza.

Tan neʼe, koko atu haree didiʼak ema nia situasaun. Ema neʼe mak joven ka idade boot, klosan ka kaben-naʼin, ka faluk. Antes fó prezente ruma, diʼak atu hanoin uluk kona-ba ema ida-idak nia situasaun no presiza.

Atu hatene kona-ba ema seluk nia presiza, diʼak atu husu sujestaun ba ema neʼebé iha situasaun hanesan ho ema neʼebé Ita hakarak atu fó prezente. Dala ruma sira bele hatene liu buat neʼebé ema neʼe presiza. Hodi halo nuneʼe, Ita bele hili prezente ida neʼebé ema neʼe presiza duni.

Tempu neʼebé loos. Bíblia hatete: “Liafuan neʼebé koʼalia iha tempu neʼebé loloos mak furak tebetebes!” (Provérbios [Amsal] 15:23) Eskritura neʼe hatudu katak liafuan neʼebé ita koʼalia iha tempu neʼebé loos bele halo ema sente kontente. Nuneʼe mós se Ita fó prezente iha tempu neʼebé loos ka tuir ema nia presiza, neʼe bele halo ema neʼebé simu prezente sente kontente.

Baibain ita fó prezente bainhira ita-nia kolega kaben, graduasaun eskola nian ka bainhira kolega nia oan foin moris. Ema balu halo lista kona-ba loron espesiál sira iha tinan tuirmai. Hodi nuneʼe sira bele halo planu nanis kona-ba prezente saida mak diʼak ba loron espesiál ida-idak. *

Tuir loloos, ita bele fó prezente iha tempu naran deʼit, la presiza hein ba tempu espesiál ruma. Maibé, dala ruma ita mós presiza kuidadu. Porezemplu, se mane ida fó prezente ba feto ida bainhira la iha razaun, karik feto neʼe sei hanoin katak mane neʼe hakarak atu koñese nia liután. Maibé se mane neʼe la iha hanoin hanesan neʼe, ida-neʼe bele halo feto neʼe hanoin sala no sei hamosu problema. Entaun, tuirmai ita sei koʼalia kona-ba ita-nia razaun atu fó prezente.

Ita-nia razaun. Ezemplu iha leten hatudu katak dala ruma ema bele komprende sala ita-nia razaun atu fó prezente. Tan neʼe mak ita presiza hanoin didiʼak no buka-hatene ita-nia razaun atu fó prezente. Ema barak hanoin katak sira-nia razaun mak loos, maibé tuir loloos sira fó prezente tan deʼit sira-nia kostume, laʼós tanba sira hakarak. Ema seluk mós fó prezente tanba sira hakarak ema trata sira iha dalan neʼebé diʼak liu ka hakarak ema atu halo buat ruma ba sira.

Oinsá mak Ita bele hatene katak Ita fó prezente ho razaun neʼebé loos? Bíblia hatete: “Iha buat hotu neʼebé imi halo, halo neʼe ho domin.” (1 Korinto 16:14) Se Ita fó prezente tanba Ita hadomi no hanoin ema, ema sei simu ida-neʼe ho haksolok, no Ita mós sei hetan ksolok. Se Ita fó prezente ho laran, Ita sei halo Ita-nia Aman iha lalehan kontente. Apóstolu Paulo gaba ema kristaun sira iha Korinto, bainhira sira ho laran-luak no kontente apoia maluk kristaun sira-nia serbisu iha Judeia. Paulo dehan ba sira katak “Maromak hadomi ema neʼebé fó ho laran-ksolok”.—2 Korinto 9:7.

 Hodi tau atensaun didiʼak ba pontu importante sira-neʼe bele ajuda Ita atu fó prezente neʼebé halo ema kontente. Maromak mós halo tuir pontu sira-neʼe bainhira nia fó prezente neʼebé diʼak liu hotu ba ema. Ami konvida Ita atu buka-hatene kona-ba prezente neʼe iha informasaun tuirmai.