Moris família no relasaun ho ema seluk
Ema balu sente susar atu mantein relasaun diʼak ho família no ema seluk. Haree toʼok Bíblia nia prinsípiu sira neʼebé bele ajuda Ita haburas relasaun neʼebé diʼak.
LABELE HANOIN AN DEʼIT
BÍBLIA NIA PRINSÍPIU: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
NEʼE KATAK SÁ: Ita bele iha relasaun diʼak ho ema seluk se Ita sai toman atu fó duké simu. Se Ita mak hanoin an deʼit, neʼe bele estraga Ita-nia relasaun diʼak ho ema seluk. Porezemplu, ema neʼebé hanoin an deʼit, susar atu laran-metin ba ninia kaben. No ema mós lakohi ransu ho Ita se Ita koʼalia hodi la hanoin ema seluk, ka koʼalia ho foti an kona-ba buat neʼebé Ita iha ka hatene. Hanesan livru ida hatete: “Ema neʼebé hanoin an deʼit no haree ema seluk la importante sei hetan problema barak.”—The Road to Character.
SAIDA MAK ITA BELE HALO:
-
Ajuda ema seluk: Belun neʼebé diʼak tau fiar ba malu no sempre prontu atu ajuda malu. Matenek-naʼin balu dehan katak, hodi ajuda ema seluk bele aumenta Ita-nia fiar an no hamenus posibilidade atu kona moras depresaun.
-
Hanoin ema nia sentimentu. Neʼe katak Ita mós sente ema seluk nia laran-kanek. Se Ita hanoin ema seluk, neʼe ajuda Ita atu la koʼalia liafuan kroʼat neʼebé hakanek ema nia laran.
Kuandu Ita hanoin ema, Ita mós sei hatudu toleránsia ba sira no neʼe bele ajuda Ita atu la diskrimina no habelun ho ema husi kultura no fatin oioin.
-
Gasta tempu ho ema seluk. Uza tempu atu ransu sei ajuda Ita atu koñese ema seluk diʼak liután. Atu sai belun diʼak ho ema ida, Ita presiza hatudu interese no koʼalia kona-ba buat neʼebé nia gosta no importante ba nia. Tan neʼe, sai rona-naʼin neʼebé diʼak. Matenek-naʼin balu dehan katak, “koʼalia ho ema kona-ba buat neʼebé importante bele halo ita kontente liután”.
HILI BELUN HO MATENEK
BÍBLIA NIA PRINSÍPIU: “Ransu hamutuk ho ema aat sei estraga morál diʼak.”—1 Korinto 15:33, nota-rodapé.
NEʼE KATAK SÁ: Ema neʼebé ita ransu beibeik bele lori influénsia neʼebé diʼak ka la diʼak mai ita. Matenek-naʼin neʼebé estuda kona-ba ema nia hahalok dehan katak belun ida bele lori influénsia neʼebé boot ba ita-nia moris. Porezemplu, se Ita ransu beibeik ho fumadór, ka ema neʼebé gosta halo violénsia, karik ida-neʼe bele book Ita atu komesa fuma ka halo violénsia.
SAIDA MAK ITA BELE HALO: Habelun ho ema neʼebé iha hahalok diʼak neʼebé Ita hakarak haburas. Porezemplu, habelun ho ema neʼebé laran-maus, hatudu respeitu no laran-luak.
PRINSÍPIU SELUK HUSI BÍBLIA
Haree vídeo sira husi Bíblia neʼebé ajuda kaben-naʼin, joven no labarik sira atu halaʼo moris família neʼebé diʼak liután
LA KOʼALIA LIAFUAN NEʼEBÉ HAKANEK EMA SELUK.
“Liafuan neʼebé koʼalia sai hodi la hanoin uluk mak hanesan sona ho surik.”—PROVÉRBIOS 12:18.
HATUDU LARAN-LUAK.
“Ema laran-luak sei moris diʼak.”—PROVÉRBIOS 11:25.
HALO BA EMA SELUK HANESAN ITA HAKARAK EMA SELUK HALO BA ITA.
“Buat hotu neʼebé imi hakarak ema halo ba imi, imi mós tenke halo ba sira.”—MATEUS 7:12.
