FRANÇOIS, katuas kongregasaun ida neʼebé hela iha rai kiak hatete: “Durante tempu eleisaun, ema komesa halo violénsia no Testemuña ba Jeová rihun ba rihun presiza sai husi sira-nia uma. Susar atu hetan hahán no ai-moruk, no se karik hetan mós, buat sira-neʼe karun tebetebes. Banku sira taka no mákina neʼebé ema uza atu hasai sira-nia osan mós mamuk.”

Testemuña barak neʼebé la bele hela iha sira-nia uma halibur hamutuk iha Reuniaun-Fatin sira iha área oioin iha rai neʼe. Lalais deʼit, irmaun sira husi sukursál haruka osan no sasán atu ajuda Testemuña sira iha fatin sira-neʼe. Grupu rua neʼebé apoia sira-nia partidu ida-idak, dala ruma sira taka dalan. Maibé tanba sira hatene katak Testemuña sira neutrál deʼit, sira husik Testemuña sira-nia karreta bele liu.

François hatete: “Kuandu ami iha dalan atu ba Reuniaun-Fatin ida, ema komesa tiru ami-nia karreta. Maibé kilat-musan la kona ami. Ami haree soldadu ida neʼebé kaer kilat halai hasoru ba ami-nia karreta. Ami hakiduk karreta lalais no halai fila fali ba fatin sukursál. Ami agradese ba Maromak Jeová tanba ami sei moris. Loron tuirmai, irmaun-irmán naʼin-130 neʼebé hela iha Reuniaun-Fatin neʼebé ami atu bá, sira mós konsege halai ba fatin seluk neʼebé seguru. Sira balu halai ba sukursál no ami tau matan ba sira-nia presiza inklui mós sira-nia presiza espirituál nian. Ami ajuda sira toʼo krize neʼe hotu ona.”

François hatutan tan: “Irmaun-irmán sira iha rai neʼe hakerek karta barak ba sukursál hodi hatoʼo sira-nia agradese. Sira-nia fiar ba Jeová sai metin liután tanba sira-nia maluk iha rai seluk fó ajuda ba sira.”

Kuandu dezastre ida mosu, ita la hatete deʼit ba ita-nia maluk sira katak ita hein sira bele hetan ajuda. (Tiago 2:15, 16) Maibé ita hakaʼas an atu fó ba sira buat neʼebé sira presiza. Hanesan iha apóstolu sira-nia tempu, kuandu sira hatene katak hamlaha boot sei mosu, “eskolante sira hanoin katak, ema ida-ida, tuir nia kbiit, haruka tulun ba maun-alin sira neʼebé hela iha Judeia”.—Apostolu 11:28-30.

Nuʼudar Maromak Jeová nia atan sira, ita sempre prontu atu ajuda ita-nia maluk fiar-naʼin sira ho sasán neʼebé sira presiza. Maibé ema hotu mós iha presiza espirituál nian. (Mateus 5:3) Jesus haruka ita atu halo dixípulu sira hodi ita bele ajuda ema rekoñese katak sira iha presiza espirituál nian, no atu ajuda sira kumpre presiza neʼe. (Mateus 28:19, 20) Atu bele halo tuir buat neʼebé Jesus haruka, ita ida-idak fó ita-nia tempu, forsa no osan. Nuʼudar organizasaun ida, ita uza osan balu neʼebé ema fó nuʼudar kontribuisaun atu ajuda ema ho sasán, maibé liuliu ita uza osan neʼe atu bele habelar liafuan diʼak iha mundu tomak. Hodi nuneʼe, ita hatudu ita-nia domin ba Maromak no ba ema.—Mateus 22:37-39.

Kuandu ema fó kontribuisaun hodi apoia serbisu haklaken iha mundu tomak, sira bele fiar katak Jeová nia organizasaun sei uza osan neʼe iha dalan neʼebé diʼak no loos. Ita mós bele ka lae ajuda ita-nia maluk fiar-naʼin sira? Ita mós hakarak apoia serbisu haklaken ka lae? Se nuneʼe, “keta tahan netik buat neʼebé diʼak ba sira neʼebé merese atu simu, kuandu ó iha kbiit atu halo nuneʼe”.—Provérbios (Amsal) 3:27.