DURANTE kampaña haklaken nian neʼebé makaʼas loos iha fulan-Agostu no Setembru tinan 1929, Estudante Bíblia naʼin-10.000 liu haklaken iha fatin oioin iha Estadus Unidus. Sira fahe livru maizumenus 250.000 ba ema. Iha tempu neʼebá, pioneiru sira aumenta lalais toʼo maizumenus naʼin-1.000. Husi tinan 1927 toʼo tinan 1929 pioneiru sira aumenta ba dala tolu. Ita-nia Serbisu Kristaun hatete kona-ba tempu neʼebá, hodi dehan katak ema neʼebé serbisu nuʼudar pioneiru mak barak tebes.

Iha tinan 1929 iha krize ekonomia nian neʼebé aat tebes. Ida-neʼe halo situasaun ekonomia nian iha mundu tomak sai susar. Banku rihun ba rihun sai bangkrut, toʼos-naʼin sira la bele halo ona serbisu no fábrika boot sira mós taka hotu. Ema rihun ba rihun lakon serbisu. Durante tinan 1933, loroloron ema naʼin-1.000 iha Estadus Unidus lakon sira-nia uma, tanba osan neʼebé sira empresta hodi sosa, sira la bele selu ona.

Oinsá mak pioneiru sira tahan hasoru susar sira-neʼe? Pioneiru balu uza sira-nia karreta nuʼudar mós uma. Pioneiru sira bele halaʼo nafatin serbisu haklaken tanba se sira iha uma-karreta neʼe, sira la presiza aluga uma. a No mós, durante tempu neʼebé halaʼo reuniaun boot, sira bele toba deʼit iha sira-nia uma-karreta duké selu otél. Iha tinan 1934, Ita-nia Serbisu Kristaun hatudu oinsá atu halo uma-karreta neʼebé iha fogaun, kama neʼebé bele falun, torneira ida no oinsá atu taka uma-karreta nia laran hodi ladún malirin.

Haklaken-naʼin sira iha rai barak komesa atu halo sira-nia uma-karreta. Irmaun Victor Blackwell hatete: “Hanesan Noé neʼebé la iha esperiénsia kona-ba harii ró, haʼu mós la iha esperiénsia kona-ba halo uma-karreta.” Maski nuneʼe, Victor konsege halo.

Irmaun Avery no irmán Lovenia Bristow mós iha uma-karreta. Avery hatete: “Haʼu hanesan lenuk tanba haʼu-nia uma sempre hamutuk ho haʼu.” Irmaun no irmán Bristow sempre haklaken hamutuk ho Harvey no Anne Conrow, sira uza uma-karreta neʼebé didin taka ho surat tahan. Kuandu sira lori sira-nia karreta, surat tahan neʼe sempre monu. Avery hatete: “Toʼo agora ema seidauk haree karreta ida neʼebé hanesan neʼe.” Maibé Avery hatutan tan katak irmaun no irmán Conrow hamutuk ho sira-nia oan-mane naʼin-rua mak “família neʼebé kontente liu”. Harvey Conrow hatete: “Ami nunka kuran buat ida. Ami fiar nafatin ba Jeová hodi tau matan ba ami nuʼudar ami serbí nia.” Ikusmai família Conrow tuir Eskola Gilead no hetan knaar atu bá rai-Perú hodi serbí nuʼudar misionáriu.

Irmaun Giusto no irmán Vincenza Battainos mós halo serbisu pioneiru hamutuk nuʼudar família. Kuandu sira foin hatene katak sira atu iha oan, sira halo uma-karreta ida. Sira dehan katak uma-karreta neʼe “hanesan otél kapás” se kompara ho tenda sira neʼebé uluk sira uza atu hela. Hamutuk ho sira-nia oan-feto, sira halaʼo nafatin knaar neʼebé sira gosta tebes, neʼe mak atu haklaken ba ema Itália neʼebé hela iha Estadus Unidus.

 Ema barak gosta atu rona liafuan diʼak. Maibé ema neʼebé kiak ka la iha serbisu la iha osan atu fó nuʼudar kontribuisaun atu hola ita-nia livru sira. Tan neʼe, duké fó osan, sira fó sasán oioin. Pioneiru naʼin-rua dehan katak uluk sira hetan sasán oioin 64 neʼebé sira hetan husi ema neʼebé hakarak lee ita-nia livru sira. Sasán neʼe haree hanesan sasán iha loja ida.

Irmaun Fred Anderson hasoru toʼos-naʼin ida neʼebé hakarak atu hola ita-nia livru sira. Tanba nia la iha osan atu hola, toʼos-naʼin neʼe fó ókulu neʼebé uluk ninia inan nian hodi nia bele hetan livru sira. Kuandu Fred vizita toʼos-naʼin seluk, mane neʼe hakarak lee ita-nia livru sira maibé nia hatete: “Haʼu la iha ókulu hodi bele lee.” Maibé kuandu nia uza ninia viziñu nia ókulu sira, nia bele lee moos no nia kontente atu fó osan nuʼudar kontribuisaun atu hetan livru sira no ókulu.

Irmaun Herbert Abbott sempre lori raga iha ninia karreta atu rai manu sira. Kuandu nia troka livru sira atu hetan manu tolu ka haat, nia lori manu ba merkadu no faʼan hodi nia bele selu atu enxe bensin iha ninia karreta. Nia hatete: “Dala ruma osan besik hotu, maibé ami la husik ida-neʼe hanetik ami. Se ami iha bensin iha karreta, ami bele haklaken nafatin hodi tau fiar ba Jeová.”

Hodi tau fiar ba Jeová no hakaʼas an nafatin, Jeová nia povu iha tempu neʼebá tahan hasoru susar oioin. Iha loron ida, kuandu anin no udan boot, Maxwell no Emmy Lewis foin sai husi sira-nia uma-karreta no ai-hun ida monu no fahe sira-nia karreta ba rua. Irmaun Maxwell hatete: “Ami la haree ida-neʼe nuʼudar problema ida maibé hanesan asidente deʼit, no ami nunka hanoin atu para ami-nia serbisu haklaken. Tanba iha serbisu barak atu halo, ami hakarak hakaʼas an.” Maxwell no Emmy hadiʼa fali sira-nia uma-karreta ho maluk kristaun sira-nia ajuda.

Ohin loron ita mós hasoru susar oioin, maibé Testemuña ba Jeová rihun ba rihun hatudu hahalok neʼebé hanesan ita-nia maluk sira iha tempu uluk. Hanesan pioneiru sira-neʼe, ita mós hakaʼas an atu halaʼo nafatin serbisu haklaken toʼo tempu neʼebé Jeová hatete serbisu neʼe hotu ona.