Kristu—Maromak nia kbiit
“Kristu . . . Maromak nia kbiit.”—1 KORINTO 1:24.
1. Tanbasá mak apóstolu Paulo hatete katak Kristu mak Maromak nia kbiit?
LIUHUSI Jesus, Jeová hatudu ninia kbiit neʼebé úniku tebes. Bainhira iha rai, Jesus halo milagre barak neʼebé ita bele lee husi Bíblia. No milagre sira-neʼe ajuda ita tau fiar liután ba Jeová. (Mateus 9:35; Lucas 9:11) Kbiit hotu neʼebé Jesus iha hodi halo milagre sira mai duni husi Jeová, tan neʼe mak apóstolu Paulo hatete katak Kristu mak Maromak nia kbiit. (1 Korinto 1:24) Maibé iha dalan saida mak Jesus nia milagre sira kona ita-nia moris?
2. Ita aprende saida husi Jesus nia milagre sira?
2 Apóstolu Pedro dehan katak Jesus halo milagre ka “buat furak oioin”. (Apóstolu 2:22) Milagre sira-neʼe atu hatudu katak iha Jesus nia Ukun ba Tinan Rihun Ida nia laran, nia sei halo milagre boot liután iha mundu foun. Milagre sira neʼebé Jesus halo mós atu ajuda ita komprende kona-ba Jesus no ninia Aman nia hahalok sira. Iha lisaun neʼe ita sei haree kona-ba milagre tolu neʼebé Jesus halo no oinsá mak milagre sira-neʼe kona ita ohin loron no iha futuru.
MILAGRE NEʼEBÉ HANORIN ITA KONA-BA LARAN-LUAK
3. (a) Saida mak book Jesus hodi halo ninia milagre primeiru? (b) Oinsá mak buat neʼebé Jesus halo iha Kaná hatudu katak nia laran-luak?
3 Milagre primeiru neʼebé Jesus halo mak iha festa kazamentu ida iha Kaná, rai-Galileia. La hatene tanbasá, tua la toʼo ba bainaka sira neʼebé bá atu tuir kazamentu neʼe. Situasaun neʼe bele halo festa-naʼin moe tebes, tanba neʼe la hatudu laran-luak ba bainaka sira. Jesus nia inan, Maria mós bá tuir festa neʼe. Nia fó-hatene Jesus kona-ba problema ho tua neʼe. Nia halo hanesan neʼe karik tanba nia hatene katak Jesus iha forsa atu halo buat ruma. Tanba ba tinan barak ona nia hatene katak profesia barak mak koʼalia kona-ba ninia oan-mane neʼe. No nia hatene katak ninia oan neʼe sei hanaran “Oan-Mane husi Ida neʼebé Aas Liu Hotu”. (Lucas 1:30-32; 2:52) Tuirmai, Jesus halo milagre ida hodi halo bee maizumenus litru 380 nakfila sai tua diʼak. (Lee João 2:3, 6-11.) Husi neʼe ita bele haree katak Maria no Jesus hakarak duni atu ajuda festa-naʼin. Maibé Jesus halo milagre neʼe laʼós tanba neʼe mak ninia responsabilidade. Jesus hakarak ajuda tanba nia hanoin ema, no atu halo tuir ninia Aman nia laran-luak.
4, 5. (a) Jesus nia milagre primeiru hanorin ita kona-ba saida? (b) Milagre neʼebé Jesus halo iha Kaná hanorin ita saida kona-ba futuru?
4 Jesus nia milagre hodi halo bee sai tua ba ema barak hanorin ita saida? Neʼe hanorin ita katak Jeová no Jesus laran-luak tebes. Sira hakarak halo milagre ba ema tanba sira hanoin tebes ema nia sentimentu. Milagre neʼe mós hatudu katak iha mundu foun, Jeová sei uza ninia kbiit atu halo ai-han ba ema hotu iha mundu tomak, tanba nia mak Maromak laran-luak nian.—Lee Isaías (Yesaya) 25:6. *
5 Hanoin toʼok bá! Lakleur tan Jeová sei fó buat hotu neʼebé ita presiza. Ema hotu sei hetan hahán diʼak no uma diʼak. Se ita hanoin kona-ba Jeová nia laran-luak atu fó buat kapás sira mai ita iha mundu foun, neʼe halo ita agradese tebes ba nia.
Bainhira ita uza tempu atu ajuda ema seluk, ita hatudu katak ita mós halo tuir Jesus nia laran-luak (Haree parágrafu 6)
6. Jesus uza ninia kbiit atu halo saida deʼit, no oinsá mak ita bele banati-tuir nia?
6 Se ita hanoin fali ba tempu neʼebé Satanás tenta Jesus atu halo fatuk nakfila ba paun, Jesus lakohi halo tuir Satanás, tanba Jesus lakohi uza ninia kbiit atu halo buat diʼak ba ninia an deʼit. (Mateus 4:2-4) Maibé atu ajuda ema seluk, Jesus sempre prontu. Oinsá mak ita bele banati-tuir Jesus nia ezemplu neʼe? Jesus hatete katak ita presiza iha toman atu “fó ba ema seluk”. (Lucas 6:38) Ita bele halo tuir hodi konvida ema seluk mai han iha ita-nia uma. Ita mós bele uza ita-nia tempu atu ajuda irmaun ka irmán iha reuniaun. Porezemplu, karik reuniaun hotu tiha, ita bele ajuda atu rona irmaun ida treinu ninia diskursu. Ka se irmaun-irmán sira presiza ajuda kona-ba haklaken, ita bele fó ajuda ba sira ka lae? Se ita mak halo buat sira-neʼe hodi fó ajuda ba ita-nia irmaun-irmán sira, ita hatudu katak ita halo tuir duni Jesus nia laran-luak.
“SIRA HOTU HAN TOʼO BOSU”
7. Se Satanás nia mundu aat neʼe mak hamriik nafatin, problema saida mak sei nunka bele rezolve?
7 Kiak mak problema kleur ona iha mundu neʼe. Uluk Jeová hatete ba ema Izraél sira katak, iha sira-nia rai sempre iha ema kiak. (Deuteronômio [Ulangan] 15:11) Tinan atus hirak liutiha, Jesus mós hatete: “Ema kiak sira nafatin hamutuk ho imi.” (Mateus 26:11) Jesus koʼalia hanesan neʼe tanba ema kiak sei nunka lakon husi mundu neʼe ka lae? Lae. Jesus atu hatete deʼit katak se Satanás nia mundu aat neʼe mak sei hamriik nafatin, problema kiak mós sei nunka lakon. Tan neʼe mak bainhira ita komprende kona-ba tanbasá mak Jesus halo milagre sira, neʼe bele halo ita sente kmaan katak iha mundu foun, kiak sei lakon ba nafatin. Ema hotu sei iha hahán no sei la menus buat ida!
8, 9. (a) Tanbasá mak Jesus halo milagre atu fó-han ema rihun ba rihun? (b) Tanbasá mak Jesus nia milagre neʼe book tebes Ita-nia laran?
8 Bainhira koʼalia kona-ba Jeová, ema neʼebé hakerek Salmo dehan: “Ita loke Ita-nia liman no halo kontente buat hotu neʼebé moris nia hakarak.” (Salmo [Mazmur] 145:16) Ita bele haree Jeová nia hahalok neʼe liuhusi Jesus. Bainhira iha rai, Jesus haleno ninia Aman nia hahalok neʼe hodi loke ninia liman ba ema hotu. Jesus halo hanesan neʼe laʼós atu hatudu katak nia iha forsa makaʼas, maibé tanba nia hanoin tebes ema nia moris. Ezemplu ida mak ita bele lee husi Mateus 14:14-21. (Lee.) Iha ema-lubun boot ida mak laʼo tuir Jesus husi sidade oioin. Toʼo tiha kalan, Jesus nia dixípulu sira sente laran-susar tebes tanba ema sira-neʼe kole no hamlaha ona. Tan neʼe sira mai koʼalia ho Jesus kona-ba situasaun neʼe no atu husu Jesus haruka ema sira-neʼe bá hola hahán rasik. (Mateus 14:13) Tuirmai Jesus halo saida?
9 Nia uza paun lima no ikan rua hodi fó-han ba mane naʼin-5.000 no fó-han mós ba feto ho labarik hotu! Jesus nia milagre neʼe book tebes ita hotu nia laran, loos ka lae? Tanba Jesus hakarak uza ninia forsa atu tau matan, laʼós ba ema ida deʼit, maibé ba família tomak. No hahán neʼebé Jesus fó ba sira, laʼós atu ajuda sira aguenta deʼit, maibé halo sira “han toʼo bosu” hodi sira bele iha forsa atu fila fali ba uma. (Lucas 9:10-17) Toʼo ikus, han la hotu no iha resin hamutuk bote 12 nakonu!
10. Lakleur tan saida mak atu akontese ba problema kona-ba kiak?
10 Ohin loron tanba kaan no korrupsaun mak halo ema rihun ba rihun hamlaha ka sai kiak. Iha rai balu, ita-nia irmaun-irmán sira mós iha hahán natoon atu bele aguenta moris deʼit. Maibé, lakleur tan ema hotu neʼebé halo tuir Jeová sei haree mundu ida neʼebé la iha tan korrupsaun no kiak. Jeová, Maromak neʼebé Forsa Boot Liu Hotu sei uza ninia kbiit hodi fó ba ema ida-idak nia presiza toʼo sira la menus tan buat ida iha sira-nia moris. Nia promete katak terus besik ona atu lakon ba nafatin!—Lee Salmo (Mazmur) 72:16. *
11. Tanbasá mak ita fiar katak lakleur tan Jesus atu uza ninia forsa ba mundu tomak, no neʼe sei book ita atu halo saida?
11 Durante Jesus moris iha rai, nia halo milagre ba tinan tolu ho balu deʼit no fatin uitoan deʼit mak haree ona ninia milagre sira. (Mateus 15:24) Maibé iha tinan rihun ida nia laran, ema hotu iha mundu tomak sei haree Liurai Jesus nia milagre sira neʼebé nia atu halo. (Salmo [Mazmur] 72:8) Liuhusi Jesus nia milagre, ita bele haree duni katak nia hakarak uza ninia forsa atu halo diʼak ba ema hotu. Oinsá ho ita? Maski ita la iha kbiit atu halo milagre hanesan Jesus, maibé ita bele uza ita-nia forsa tomak atu koʼalia ba ema kona-ba buat furak sira neʼebé Bíblia promete ona. No neʼe mak ita-nia responsabilidade nuʼudar Testemuña ba Jeová. (Roma 1:14, 15) Bainhira ita hanoin didiʼak ba buat furak sira neʼebé Jesus besik ona atu halo, ita-nia laran mós sai haksolok atu fó-hatene ema seluk, loos ka lae?—Salmo (Mazmur) 45:1; 49:3.
JEOVÁ NO JESUS KONTROLA MUNDU NIA NATUREZA HOTU
12. Tanbasá mak ita fiar katak Jesus komprende kona-ba mundu nia ambiente?
12 Iha tempu neʼebé Maromak kria mundu ho buat hotu iha mundu neʼe, Jesus mós iha “ninia sorin nuʼudar badain” ida. (Provérbios [Amsal] 8:22, 30, 31; Koloso 1:15-17) Tan neʼe mak Jesus komprende kona-ba rai nia ambiente. Nia hatene oinsá mak atu uza didiʼak mundu neʼe no nia mós iha kbiit atu kontrola mundu nia natureza hanesan anin no udan.
Tanbasá mak dalan neʼebé Jesus uza ninia kbiit hodi halo milagre sira book tebes ita-nia laran? (Haree parágrafu 13, 14)
13, 14. Fó toʼok ezemplu ida neʼebé hatudu katak Jesus iha forsa atu kontrola mundu nia natureza sira.
13 Jesus iha duni Maromak nia kbiit hodi kontrola mundu nia natureza. Ezemplu ida mak Jesus uza ninia forsa hodi hapara anin-fuik ida. (Lee Marcos 4:37-39.) Ema matenek ida kona-ba Bíblia dehan katak liafuan iha lia-gregu neʼebé tradús nuʼudar “anin komesa huu makaʼas tebes”, neʼe koʼalia kona-ba anin-fuik ida neʼebé siʼak tebes. Neʼe akontese iha tempu neʼebé kalohan metan taka rai, anin huu la para, rai-tarutu makaʼas, no udan fakar hanesan bee. Bainhira anin-fuik neʼe liutiha, ita bele haree sasán sira estraga hotu.
14 Hanoin toʼok buat neʼebé akontese daudauk iha tempu neʼebá: Laloran tasi boot tebetebes, baku ró bá-mai no tasi-been balu baku tama toʼo ró laran. Maski anin-fuik huu makaʼas no ró nakdoko bá-mai, Jesus toba diʼak hela tanba nia sente isin-kole tebes. Maibé ninia dixípulu sira taʼuk tebes. Tan neʼe sira bá fanu Jesus hodi hatete ba nia: “Ita besik ona atu mate!” (Mateus 8:25) Jesus hadeer mai no manda anin no tasi: “Hakmatek bá!” no anin neʼe para kedas. (Marcos 4:39) Ho Jesus nia orden ida deʼit, anin no tasi hakmatek kedas iha tempu neʼebá. Ida-neʼe hatudu duni katak Jesus iha forsa atu kontrola mundu nia natureza sira!
15. Oinsá mak Jeová hatudu katak nia iha kbiit atu kontrola mundu nia natureza hotu?
15 Tanba Kristu nia kbiit mai husi Jeová, entaun ita mós bele fiar katak Maromak Jeová neʼebé Forsa Boot Liu Hotu iha kbiit atu kontrola mundu nia natureza hotu. Porezemplu, antes atu halo Rai-Nabeen, Jeová dehan: “Hela deʼit loron hitu haʼu sei halo udan tau ba rai ba loron haatnulu no kalan haatnulu.” (Gênesis [Kejadian] 7:4) No ezemplu ida tan mak iha Êxodo (Keluaran) 14:21 neʼebé hatete: “Jeová uza anin boot husi leste hodi halo tasi okos sai fali rai maran.” No Jonas (Yunus) 1:4 mós hatete: “Jeová halo anin-boot huu iha tasi, no anin-boot iha tasi sai siʼak tebes toʼo atu halo ró neʼe besik atu naksobu.” Hodi hatene katak iha mundu foun Jeová bele kontrola mundu nia natureza hotu, neʼe halo ita sente hakmatek.
16. Tanbasá mak atu hatene katak Jeová no Jesus iha kbiit atu kontrola mundu nia natureza hotu lori kmaan ba ita-nia moris?
16 Bainhira ita hanoin kona-ba Jeová no Jesus nia kbiit, neʼe halo ita la taʼuk tan buat ida. Iha tinan 1.000 nia laran, ema hotu iha mundu neʼe sei moris ho seguru, tanba dezastre naturais sei la akontese tan. Tan neʼe ita la taʼuk tan ba anin-fuik, tsunami, foho rabenta, ka rai-nakdoko. Atu hatene katak dezastre naturais sei la oho tan ema ka halo ema sai aleijadu, neʼe halo ita sente kmaan tebes, tanba “Maromak nia tenda hamutuk ho ema”! (Apokalipse 21:3, 4) Ita bele fiar duni katak iha Jesus nia Ukun ba Tinan Rihun Ida, Jeová sei fó kbiit ba nia atu kontrola mundu nia natureza hotu.
HALO TUIR JEOVÁ NO JESUS OHIN LORON
17. Iha dalan saida mak ita bele halo tuir Jeová no Jesus ohin loron?
17 Ita ema la iha kbiit atu hapara dezastre naturais sira. Só Jeová no Jesus deʼit mak iha kbiit atu halo nuneʼe. Maibé ita bele halo buat ida. Neʼe mak halo tuir Provérbios (Amsal) 3:27. (Lee. *) Kuandu ita-nia irmaun-irmán sira hetan susar ruma, ita bele ajuda hodi tau matan ba sira-nia presiza loroloron nian, no fó kmaan ba sira. (Provérbios [Amsal] 17:17) Porezemplu, irmán faluk ida neʼebé anin-fuik estraga tiha ninia uma, koʼalia hanesan neʼe: “Haʼu agradese tebes tanba Jeová nia organizasaun fó ajuda haʼu, laʼós ba presiza loroloron nian deʼit, maibé mós fó kmaan mai haʼu iha dalan espirituál.” Irmán klosan ida mós hasoru situasaun hanesan neʼe, anin-fuik estraga hotu ninia uma. Ikusmai irmaun-irmán sira ajuda nia hodi hadiʼa fali ninia uma, no nia dehan: “Haʼu la hatene atu koʼalia saida! Haʼu sente liafuan deʼit latoʼo atu koʼalia sai haʼu-nia agradese ba ajuda neʼebé haʼu hetan . . . Obrigadu Jeová!” Ita agradese duni tanba iha irmaun-irmán sira neʼebé hanoin tebes ema seluk nia presiza. Maibé, agradese boot liután neʼebé ita iha mak Jeová no Jesus Kristu hanoin tebes ita ida-idak.
18. Tanbasá mak dalan neʼebé Jesus halo milagre book tebes Ita-nia laran?
18 Durante Jesus halaʼo ninia knaar sira iha rai, nia hatudu duni katak nia mak “Maromak nia kbiit”. Maibé Jesus nunka uza ninia kbiit neʼe atu dada atensaun ba ninia an ka halo buat diʼak ba ninia an deʼit. Ita bele haree katak Jesus nia milagre hotu neʼebé nia halo hatudu sai ninia domin ba ema hotu. Iha lisaun tuirmai ita sei koʼalia liután kona-ba neʼe.
^ par. 4 Isaías 25:6: “Iha foho neʼe Jeová, ukun-naʼin ba tropa lalehan nian sei halo festa ida ba ema hotu atu fó hahán gostu, festa ida ho tua diʼak, hahán furak neʼebé nakonu ho ruin nia bokur, no tua diʼak neʼebé tais moos tiha ona.”
^ par. 10 Salmo 72:16: “Sei iha hahán barak iha rai; iha foho-tutun, sei iha barak liután. Ninia ai-fuan sei buras hanesan iha Líbanu nian, no iha sidade ema sei sai barak hanesan duʼut iha mundu.”
^ par. 17 Provérbios 3:27: “Keta tahan netik buat neʼebé diʼak ba sira neʼebé merese atu simu, kuandu ó iha kbiit atu halo nuneʼe.”
