Ema barak siʼik kona-ba mundu nia rohan, maibé sempre sala. Porezemplu, Ita sente oinsá kona-ba loron 21 fulan-Dezembru tinan 2012? Tuir ema Maya antigu sira-nia kalendáriu, data neʼe mak mundu nia rohan no sei lori mudansa boot iha mundu neʼe. Oinsá Ita-nia hanoin kona-ba data neʼe? Ida-neʼe depende deʼit ba buat neʼebé Ita hein atu mosu. Se uluk Ita taʼuk kona-ba loron neʼe, karik agora Ita sente kmaan tanba buat ida la akontese. Karik Ita sai hirus uitoan tanba buat neʼebé Ita hein la mosu. Ka, karik Ita la iha interese ona kona-ba neʼe.

Oinsá ho buat neʼebé Bíblia koʼalia kona-ba mundu nia rohan? (Mateus 24:3) Ema balu taʼuk katak ahi sei han mohu mundu neʼe. Ema seluk hein namanas atu haree saida mak sei akontese ba mundu neʼe. Ema barak la hatudu interese tan kona-ba mundu nia rohan tanba sira hein kleur ona. Maibé saida mak lia-loos kona-ba mundu nia rohan?

Karik Ita sei hakfodak atu hatene saida mak loloos Bíblia hanorin kona-ba mundu nia rohan. Tuir loloos, Bíblia fó razaun tanbasá mak diʼak ba ita atu hein mundu nia rohan. No Bíblia mós esplika katak karik ema balu sente mundu nia rohan kleur tebes atu mai, nuneʼe sira baruk ona atu hein. Diʼak atu Ita haree Bíblia nia resposta ba pergunta balu neʼebé baibain ema husu kona-ba mundu nia rohan.

 BÍBLIA NIA RESPOSTA: “[Maromak] halo tiha rai iha fatin neʼebé metin; neʼebé sei la nakdoko toʼo tempu neʼebé la bele sura, ka ba nafatin.”—SALMO (MAZMUR) 104:5.

La iha buat ida neʼebé bele halakon rai neʼe, inklui mós ho ahi. Bíblia hanorin katak planeta mundu mak ema nia hela-fatin ba nafatin. Salmo 37:29 hatete: “Ema loos rasik sei simu rai, no sira sei moris ba nafatin iha neʼebá.”—Salmo 115:16; Isaías (Yesaya) 45:18.

Depois Maromak kria tiha mundu neʼe, nia hatete katak “neʼe diʼak tebes”, no nia sente hanesan neʼe nafatin. (Gênesis [Kejadian] 1:31) Maromak sei nunka halakon mundu neʼe. Tuir loloos, Maromak promete atu “halo aat sira hotu neʼebé halo aat raiklaran neʼe”, no sei proteje rai neʼe ba nafatin.—Apokalipse 11:18.

Maibé oinsá ho buat neʼebé Bíblia hatete iha 2 Pedro 3:7? Eskritura neʼe hatete: “Lalehan no rai ohin neʼe nian marka tiha ba ahi.” Ida-neʼe hatudu katak ahi sei han mohu duni rai neʼe ka lae? Tuir loloos, dala ruma Bíblia uza liafuan “lalehan”, “rai”, no “ahi” atu reprezenta buat ruma. Porezemplu, iha Gênesis 11:1 hatete: “Rai tomak nafatin iha lian ida deʼit.” Iha eskritura neʼe, liafuan “rai” reprezenta ema hotu iha mundu.

Iha versíkulu sira antes no depois 2 Pedro 3:7, mós hatudu katak liafuan lalehan, rai, no ahi neʼebé temi iha versíkulu sira-neʼe mak atu reprezenta buat ruma. Porezemplu, versíkulu 5 no 6 koʼalia buat neʼebé hanesan ho Rai-Nabeen iha Noé nia tempu. Maski Maromak halakon mundu tuan iha tempu neʼebá, maibé nia la halakon ita-nia planeta mundu. Entaun, “rai” neʼebé lakon iha Noé nia tempu mak reprezenta ema aat sira, no “lalehan” mak reprezenta ukun-naʼin sira. (Gênesis 6:11) Hanesan neʼe mós, iha 2 Pedro 3:7 fó-hatene nanis katak ema aat sira no ema nia governu neʼebé halo korrupsaun sei lakon ba nafatin.

BÍBLIA NIA RESPOSTA: “Mundu neʼe no domin ba nia sei liu daudaun; maibé ema neʼebé halo tuir Maromak nia hakarak sei moris ba nafatin.”—1 JOAO 2:17.

Iha eskritura neʼe, “mundu” neʼebé atu liu, mak laʼós ita-nia planeta mundu nian, maibé ema hotu neʼebé la halo tuir Maromak nia hakarak. Hanesan doutór sei halo operasaun atu hasai kankru hodi salva pasiente nia moris, Maromak mós sei hasai  ema aat hotu hodi ema diʼak sira bele moris haksolok iha mundu neʼe. (Salmo 37:9) Tan neʼe, “mundu nia rohan” mak buat neʼebé diʼak.

Dalan neʼebé Bíblia balu tradús liafuan “mundu nia rohan” mós hatudu katak laʼós ita-nia planeta mundu mak sei lakon. Porezemplu, iha Mateus 24:3, Bíblia Terjemahan Dunia Baru tradús ida-neʼe nuʼudar “sistema mundu neʼe nia rohan”, no mós Bíblia tradusaun New International Version (NIV) tradús ida-neʼe nuʼudar “otas neʼe nia rohan”. Tanba planeta mundu no ema diʼak sira sei la lakon iha mundu nia rohan, klaru katak sistema foun ka otas foun sei mai, loos ka lae? Tuir loloos, Bíblia koʼalia kona-ba “sistema mundu neʼe nian neʼebé atu mai”.—Lucas 18:30, Terjemahan Dunia Baru.

Jesus bolu mundu nia sistema neʼebé atu mai nuʼudar tempu neʼebé atu “halo fali buat hotu foun”. Iha tempu neʼe, Jesus sei halaʼo Maromak nia hakarak uluk nian ba ema. (Mateus 19:28, NIV) Nuneʼe, iha tempu neʼebá, ita hotu sei haksolok ho buat tuirmai neʼe:

• Moris diʼak no seguru iha rai neʼebé hanesan jardín furak.—Isaías 35:1; Miquéias (Mikha) 4:4.

• Serbisu neʼebé sei halo ema kontente.—Isaías 65:21-23.

• Moras hotu sei la iha tan.—Isaías 33:24.

• Ema sei la sai ferik-katuas tan.—Jó (Ayub) 33:25.

• Mate sira sei moris hiʼas fali.—Joao 5:28, 29.

Se ita “halo tuir Maromak nia hakarak”, ita sei la taʼuk kona-ba mundu nia rohan. Tuir loloos, ita bele hein namanas ba loron neʼe.

BÍBLIA NIA RESPOSTA: “Wainhira imi haree buat hirak-neʼe mosu, imi sei hatene katak Maromak nia reinu besik ona.”—LUCAS 21:31.

Iha livru ida (The Last Days Are Here Again) profesór Richard Kyle hakerek katak kuandu iha mudansa boot ka situasaun iha komunidade nia leet sai runguranga, neʼe halo ema barak hanoin kona-ba bainhira mak mundu neʼe nia rohan sei mai. Liuliu kuandu susar tebes atu esplika tanbasá mak situasaun hanesan neʼe mosu.

Maibé, profeta sira neʼebé hakerek kona-ba mundu nia rohan, la esplika deʼit kona-ba tanbasá mak buat aat sira akontese iha mundu neʼe. Tuir loloos, Maromak mak haleno sira atu hakerek kona-ba buat hirak-neʼe hodi hatudu ho klaru katak mundu nia  rohan besik ona. Hanoin toʼok kona-ba buat tuirmai neʼe neʼebé Bíblia fó-hatene nanis. Tuir Ita-nia hanoin, buat hirak-neʼe akontese duni iha ita-nia tempu ka lae?

• Funu, hamlaha, rai-nakdoko no moras aat oioin.—Mateus 24:7; Lucas 21:11.

• Krime aumenta ba beibeik.—Mateus 24:12.

• Ema halo aat ba mundu neʼe.—Apokalipse 11:18.

• Ema hadomi sira-nia an rasik, hadomi osan no buka ksolok deʼit, no sira la hadomi Maromak.—2 Timoteo 3:2, 4.

• Domin iha família laran sai menus.—2 Timoteo 3:2, 3.

• La hatudu interese kona-ba sinál sira neʼebé hatudu katak ita moris iha loron ikus sira.—Mateus 24:37-39.

• Ema haklaken liafuan diʼak kona-ba Maromak nia Reinu, ka ukun, iha mundu tomak.—Mateus 24:14.

Hanesan Jesus hatete, hodi “haree buat neʼe hotu”, ita bele hatene katak mundu nia rohan besik ona. (Mateus 24:33) Testemuña ba Jeová fiar duni ida-neʼe no sira haklaken kona-ba sira-nia fiar iha rai hamutuk 236.

BÍBLIA NIA RESPOSTA: “Wainhira ema dehan ‘Loron sira-neʼe hakmatek no iha dame’ mak tekiteki buat aat sira mosu, hanesan feto neʼebé atu tuur ahi; no ema ida la bele halai husi nia.”—1 TESALONIKA 5:3.

Bíblia kompara mundu nia rohan hanesan feto neʼebé atu tuur ahi. Kuandu feto atu tuur ahi, nia moras mosu derrepente deʼit no nia la bele hapara ida-neʼe. Loron ikus sira mak hanesan ho feto neʼebé isin-rua. Feto neʼebé isin-rua hatene ho klaru sinál sira neʼebé hatudu katak nia besik ona atu tuur ahi. Karik doutór bele siʼik loron neʼebé nia sei partus, maibé maski bebé sei demora, inan hatene duni katak lakleur tan ninia bebé sei moris. Hanesan neʼe mós ho mundu nia rohan. Maski mundu nia rohan la akontese tuir tempu neʼebé ema siʼik, maibé neʼe la dehan katak mundu nia rohan sei la mai. Ita la bele nega sinál sira neʼebé hatudu katak ita moris iha “loron ikus sira”.—2 Timoteo 3:1.

Maibé karik Ita sei husu: ‘Se sinál sira hatudu ho klaru katak mundu nia rohan besik ona, tanbasá mak ema barak la rekoñese ida-neʼe?’ Tuir loloos, Bíblia hatudu katak, kuandu mundu nia rohan besik atu mai, ema barak sei la simu realidade kona-ba neʼe. Sira la fiar katak situasaun iha mundu neʼe sai aat ba beibeik, no la fiar katak sira moris iha loron ikus sira. Tuir  loloos, sira goza no hatún fali ema neʼebé fiar kona-ba neʼe, hodi dehan: “Hori tempu neʼebé ita-nia beiʼala sira mate ona, buat hotu hanesan deʼit wainhira mundu neʼe hahú.” (2 Pedro 3:3, 4) Neʼe katak, maski sinál sira hatudu ona ho klaru katak mundu nia rohan atu mai, maibé ema barak sei nega nafatin ida-neʼe.—Mateus 24:38, 39.

Informasaun neʼe koʼalia kona-ba buat balu deʼit husi Bíblia neʼebé hatudu katak mundu nia rohan besik ona atu mai. a Ita hakarak atu aprende liután? Se nuneʼe, Ita bele kontakta Testemuña ba Jeová no estuda Bíblia ho sira. Ita bele estuda Bíblia iha Ita-nia uma rasik ka iha fatin seluk neʼebé diʼak ba Ita, inklui mós liuhusi telefone. Ita lalika selu buat ida atu estuda ho sira no buat diʼak neʼebé Ita sei aprende, iha folin-boot duni ba Ita-nia moris.