MATADALAN HUSI BÍBLIA: “Kontinua . . . fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe.”—Koloso 3:13.

Neʼe katak sá? Bíblia dehan sala mak hanesan tusan, no fó perdua katak la hanoin fali ba tusan neʼe. (Mateus 18:21-35) Tuir disionáriu Bíblia nian ida, liafuan “fó perdua” iha lia-gregu katak “haluha tiha kona-ba osan neʼebé ema ida debe no la husu tan ema neʼe atu selu fali”. Hanesan neʼe mós, se ita hakarak fó perdua ba ema neʼebé halo sala hasoru ita, neʼe katak ita la hein ba ema neʼe atu halo uluk buat ruma ba ita mak foin ita fó perdua. Fó perdua mós laʼós katak ita apoia ka simu deʼit ema neʼe nia hahalok neʼebé la diʼak. Ita bele sente laran-kanek duni se ema halo buat neʼebé la diʼak ba ita. Maibé, fó perdua, neʼe katak ita la rai hirus tan iha laran.

Bíblia nia matadalan neʼe, diʼak ba tempu modernu ka lae? Nuʼudar ema sala-naʼin, ita hotu halo sala beibeik. (Roma 3:23) Tan neʼe diʼak se ita prontu atu fó perdua ba ema seluk, tanba ita mós presiza ema fó perdua ita. No mós, ema neʼebé sempre fó perdua bele moris kontente. Tanbasá?

Se ita rai odi iha laran no la fó perdua ema seluk, neʼe haterus ita-nia an, tanba sentimentu hanesan neʼe halo ita moris la kontente, la hakmatek no hakanek ita-nia laran. Liután neʼe, se ita hanoin demais ba ema nia sala, neʼe bele estraga ita-nia saúde. Iha jornál ida (Journal of the American College of Cardiology), Doutór Yoichi Chida no profesór psikolojia nian ida naran Andrew Steptoe dehan: “Rezultadu husi ami-nia estudu hatudu katak ema neʼebé nervozu aat no sempre rai odi iha laran bele kona moras-fuan.”

Maibé hanoin toʼok, se ita prontu atu fó perdua, ita bele moris kontente tanba ita bele hametin unidade no dame ho ita-nia kolega sira no ita-nia família. Liuliu buat furak mak, se ita halo nuneʼe, ita banati-tuir Maromak neʼebé sempre fó perdua ho laran ba ema neʼebé hakribi sira-nia sala. Maromak hakarak ita mós halo nuneʼe.—Marcos 11:25; Éfeso 4:32; 5:1.