Durante tinan sanulu liu, ita uza karrosa hodi haklaken no neʼe dada ema barak nia atensaun. Iha mundu tomak, ema bele haree no rekoñese karrosa sira-neʼe. Karrosa sira-neʼe halo iha dalan neʼebé espesiál no fasil atu uza. Karik Ita konkorda ho irmán Asenata husi rai-Polónia neʼebé dehan: “Karrosa sira haree simples, maibé mós haree kapás. Fasil atu uza no mós lori.”

 Ita rasik hanoin ona kona-ba oinsá ema halo karrosa sira-neʼe ka lae?

 Iha tinan 2001, Grupu Administradór fó lisensa ba irmaun-irmán sira iha rai-Fransa atu komesa koko dalan oioin atu haklaken iha fatin públiku, inklui uza karrosa. Sira koko uza modelu oioin. Porezemplu, sira uza mala no karrosa sira atu hatudu no tau livru sira. Ikusmai, sukursál iha rai-Fransa hili modelu ida neʼebé haklaken-naʼin sira uza ona ba tinan barak.

 Irmaun sira iha rai-Fransa kontente tebes ho rezultadu neʼebé sira hetan liuhusi haklaken iha fatin públiku. Tan neʼe iha tinan 2011, Grupu Administradór mós fó lisensa ba irmaun-irmán sira iha Sidade Novaiorke, Estadus Unidus atu koko programa foun hodi haklaken ho karrosa no meza sira. Pioneiru sira neʼebé hola parte iha programa neʼe, nota katak karrosa sira iha benefísiu barak, inklui fasil atu lori. Pioneiru sira mós fó sujestaun kona-ba oinsá atu halo karrosa sira sai diʼak liután. Foufoun karrosa sira mak todan tebes tanba halo husi ai, tan neʼe susar atu lori tun-saʼe eskada. Entaun, sira halo fali karrosa neʼebé kmaan, maibé laʼós kmaan liu atu anin labele halo monu. Modelu foun neʼe mós uza roda neʼebé boot uitoan atu karrosa la nakdoko, no fasil atu dudu iha dalan neʼebé aat. Karrosa foun neʼe mós iha kaixa kiʼik atu bele rai publikasaun estra.

 Programa foun neʼe hetan susesu! Tan neʼe iha tinan 2012, Grupu Administradór aprova katak irmaun-irmán sira iha mundu tomak bele haklaken uza karrosa. Liután neʼe, irmaun sira mós hetan kompañia ida neʼebé bele prodús karrosa barak hodi uza materiál neʼebé la todan no mós bele dura ba tempu kleur.

 Durante tinan barak, irmaun-irmán sira hadiʼa buat kiʼik-kiʼik kona-ba karrosa nia modelu. Porezemplu, iha tinan 2015, sira aumenta karrosa nia kapa udan. Irmán Dina neʼebé hela iha rai-Jeórjia gosta tebes ida-neʼe. Nia hatete: “Karrosa iha ninia kapa rasik atu proteje publikasaun sira.” Iha tinan 2017, sira mós halo stiker iha língua balu husi besi-asu neʼebé bele tau ba karrosa. Irmaun Tomasz neʼebé hela iha rai-Polónia, hatete: “Uluk ami uza stiker baibain neʼebé belit metin no susar atu hasai. Tan neʼe ideia atu uza stiker besi-asu mak diʼak liu.” Iha tinan 2019, iha mudansa seluk tan kona-ba materiál sira no mós ba dalan neʼebé kompañia halo karrosa sira atu bele dura ba tempu kleur.

 Iha kompañia ida deʼit mak prodús karrosa sira-neʼe, no haruka ba kongregasaun hotu iha mundu tomak. Karrosa ida nia presu mak dolar 43 no neʼe la inklui transporte no buat seluk. Toʼo agora, ita gasta ona osan dolar millaun 16 liu ba karrosa sira, no karrosa 420.000 liu mak haruka ona ba kongregasaun iha mundu tomak.

 Atu uza didiʼak osan kontribuisaun, ita hameno kedas karrosa barak husi kompañia neʼebé prodús karrosa sira. Duké kongregasaun hameno karrosa foun kuandu parte ruma aat, kongregasaun sira bele hameno deʼit karrosa nia parte oioin atu bele hadiʼa karrosa.

 Haklaken-naʼin sira kontente tebes haklaken ho karrosa. Irmán Martina, husi rai-Gana, hatete: “Baibain kuandu ita haklaken, ita mak hakbesik ba ema. Maibé buat neʼebé haʼu gosta husi haklaken ho karrosa mak ema mai hakbesik ita. Maski ema neʼebé laʼo liu deʼit mós bele hatene lia-loos.”

 Iha Áfrika, mane ida hakbesik ba karrosa no foti publikasaun oioin neʼebé iha ninia língua rasik. Semana ida liutiha nia mai fali no hatete: “Haʼu lee hotu livru sira. Informasaun iha laran mak importante tebes. Haʼu sei fahe ida-neʼe ba haʼu-nia família iha haʼu-nia knua.” Mane neʼe nia knua mak dook maizumenus kilómetru 500. Fulan rua liutiha, nia fila fali no dehan: “Ema neʼebé hela iha haʼu-nia knua lee hotu livru sira-neʼe, no sira kontente tebes ho informasaun neʼebé sira lee. Sira hakarak sai Testemuña ba Jeová. Maibé sira iha pergunta balu. Porezemplu, sira hatene katak atu hetan batizmu, sira presiza tama ba bee laran. Maibé la iha mota neʼebé besik ami-nia knua. Entaun, ami tenke mai iha neʼe atu hetan batizmu ka?” Haklaken-naʼin sira ajuda mane neʼe atu kontaktu pioneiru ida neʼebé koʼalia ninia língua atu sira bele kontaktu malu. Husi tempu neʼebá, sira komesa estuda Bíblia.

 Ita kontente tebes tanba ita bele uza karrosa atu haklaken “iha mundu tomak nuʼudar sasin ba nasaun hotu”. (Mt 24:14) Oinsá ita-nia organizasaun bele selu karrosa sira-neʼe? Neʼe mak liuhusi kontribuisaun ba serbisu iha mundu tomak, ema barak halo ida-neʼe liuhusi website donate.pr2711.com. Obrigadu barak ba imi-nia laran-diʼak.