MATAN-MORIS BÁ NAFATIN!

Sientista sira fó sai katak mundu nia rohan besik loos ona—Saida mak Bíblia dehan?

LOKE

Iha 24 Janeiru 2023, sientista sira muda fali Doomsday Clock a besik liután ba meianoite hodi fó sai katak mundu nia rohan besik loos ona.

“Doomsday Clock reprezenta perigu ba ita ema nia moris. Iha loron-tersa, sientista sira muda relójiu neʼe nia daun besik liután ba meianoite tanba akontesimentu hanesan funu Ukránia, perigu husi bomba nukleár, no krize kona-ba mundu nia klima.”—AFP International Text Wire.
“Iha loron-tersa, sientista sira muda Doomsday Clock ba segundu 90 antes meianoite—ita ema nia moris besik loos ona ba armagedon.”—ABC News.
“Grupu sientista internasionál fó avizu katak agora mak tempu neʼebé perigu liu ba ita ema nia moris.”—The Guardian.

Ema no planeta mundu sei lakon mohu ka lae? Ita presiza taʼuk kona-ba ita-nia futuru ka lae? Saida mak Bíblia dehan?

Ita-nia futuru sei sai oinsá

Tuir Bíblia, “mundu iha ba nafatin” no ema “sei moris ba nafatin iha rai”. (Eclesiastes 1:4; Salmo 37:29) Tan neʼe, ema sei la estraga mundu toʼo halakon kriatura moris hotu.

Maibé, Bíblia fó sai duni kona-ba mundu nia rohan. Porezemplu, Bíblia dehan katak “mundu neʼe . . . sei lakon tiha”.—1 João 2:17.

Kuandu Bíblia temi kona-ba mundu nia rohan, neʼe katak sá? Haree informasaun “Mundu neʼe sei lakon mohu ka lae? Saida mak ‘Apokalipse’?”
Saida mak Bíblia dehan kona-ba tempu neʼebé mundu nia rohan sei toʼo mai? Haree informasaun “Bainhira mak mundu nia rohan sei toʼo mai?”

Mantein hanoin pozitivu

Bíblia bele ajuda ita atu mantein hanoin pozitivu maski mundu neʼe nakonu ho problema. Oinsá?

Bíblia fó sai matadalan oioin neʼebé ita bele aplika kedas iha ita-nia moris. (2 Timóteo 3:16, 17) Porezemplu, lee informasaun “Oinsá atu kontrola Ita-nia neon atu la hanoin barak demais” no buka-hatene oinsá mak Ita bele mantein hanoin pozitivu maski hasoru susar oioin.
Bíblia fó sai esperansa kapás kona-ba futuru. (Roma 15:4) Bíblia mós esplika ho loloos kona-ba saida mak akontese agora daudaun no iha futuru, no neʼe ajuda ita atu kalma nafatin no prepara an maski mundu nia situasaun troka.

Atu hetan ajuda liután husi Bíblia, ami konvida Ita atu koko ami-nia kursu Bíblia gratuitu.

a “Doomsday Clock atu fó avizu ba públiku kona-ba oinsá mak ita ema besik ona atu halakon ita-nia mundu liuhusi teknolojia neʼebé perigu tebes. Neʼe mak relójiu simbóliku atu fó-hanoin ita kona-ba perigu sira neʼebé ita presiza rezolve atu labele lakon mohu.”—Bulletin of the Atomic Scientists.