Testemuña ba Jeová la envolve an iha funu tan razaun sira tuirmai neʼe:

1.   Halo tuir Maromak. Bíblia dehan katak Maromak nia atan sira sei “tuku sira-nia surik sai xarrua” no sei “la aprende tan funu”.—Isaias 2:4.

2.   Halo tuir Jesus. Jesus hatete ba apóstolu Pedro: “Hatama fali ó-nia surik ba ninia fatin, tanba ema hotu neʼebé kaer surik sei mate ho surik.” (Mateus 26:52) Jesus hatudu katak ninia dixípulu sira labele envolve an iha funu.

    Jesus nia dixípulu sira halo tuir ninia mandamentu atu la sai “parte husi mundu neʼe”, hodi mantein neutrál kona-ba buat polítiku nian. (João 17:16) Sira mós la protesta atividade militár nian ka hanetik ema neʼebé hakarak tuir serbisu militár.

3.   Hadomi ema seluk. Jesus haruka ninia dixípulu atu “hadomi malu”. (João 13:34, 35) Tan neʼe mak sira iha unidade nuʼudar maluk fiar-naʼin iha mundu tomak, no sira nunka hakarak atu halo funu hasoru sira-nia maluk.—1 João 3:10-12.

4.   Banati-tuir ema Kristaun iha apóstolu sira-nia tempu. Livru Encyclopedia of Religion and War fó sai katak “Jesus nia dixípulu sira lakohi hola parte iha funu no tama militár” tanba sira hatene katak neʼe “la tuir Jesus nia hanorin kona-ba hatudu domin ba malu no hadomi inimigu”. Matenek-naʼin ida iha rai-Alemaña naran Peter Meinhold mós esplika kona-ba ema Kristaun iha apóstolu sira-nia tempu hodi dehan: “Se ema ida sai soldadu, neʼe katak nia laʼós ema Kristaun.”

 Testemuña ba Jeová hakaʼas an atu hatudu hahalok diʼak iha komunidade nia leet no lakohi estraga unidade no dame iha fatin neʼebé sira hela bá. Ami respeitu autoridade sira hodi halo tuir mandamentu husi Bíblia:

•   “Hakruʼuk ba autoridade sira.”—Roma 13:1.

•   “Fó ba César buat neʼebé César nian, no fó ba Maromak buat neʼebé Maromak nian.”—Mateus 22:21.

 Tan neʼe, ami halo tuir lei, selu impostu, no apoia governu nia hakaʼas an atu halo komunidade halaʼo moris neʼebé hakmatek no dame.