Tsy maintsy malio soa o biby kedekedeo naho te hitiligne vaho te hanganike amy ty raha sady naho te hamantatse ty magnodidigne aze. Naho maloto ohatse, ty tsifa o vitikeo, le ho sahiragne reke naho fa hipay lalagne vaho hifampirehake sady hamantatse fofogne. Izay ty mahavy i Alexander Hackmann, manam-pahaiagne miomba o bibio, hirehake tihoe: “Tsy ombia hahatrea biby kedekede maloto zao rehe.” Hoe ka reke: “Fa hay iareo ty miaro tegna amo o lotò.”

 Dineho zao: Nandineke karazam-bitike raike (Camponotus rufifemur) ty Hackmann naho ty mpiara-miasa ama’e. Nidinehe iareo ty fomba agnaliova o biby kedekede iohoe ty tsifa’e. Nitrea iareo tie misy volovolo sambe hafa ty amy ty tombo o vitike iohoe. Atao’e ambane ty tombo’e raike ao ty tsifa’e raike naho fa liove’e. Ze volovolo bey ty magnafake ze loto bey. Misy volovolo mitovy amo o fiogo kedekedeo ka ty amy i tombo’ey eo. Mitovy amy ty habey i volo amy i tsifa’ey eoy ty elagnelagne ty nife i fiogoy, le tavela eo i loto fara’e kedekede rey naho fa mandalo eo i tsifa’ey. Misy volovolo mitovy amo o borosio ka ty amy i tombo’ey eo sady magnafake ze loto fara izay ty kidikidy, le afake agne iaby ndra tie loto kidikidy noho o loham-pinjaitseo aza.

 Henteo ty fomba fagnaliova ty vitike raike ty tsifa’e

 Nitrea i Hackmann naho i ekipa’e rey fa azo ampiasaegne amo o orinasao i fomba fagnaliova o vitikeo i tsifa’eỳ. Mila fitaoagne bey ohatse ty fampiasagne o piesy elektronike fara izay ty kidikidikeo, le soa naho misy fomba hitanagne aze halio avao agnate i fagnamboaragne azey. Va’e tsy hiasa soa i piesỳ naho maloto ndra tie kedekede avao aza.

 Akore ty heve’o? Vokatse ty evolisiona vao ty fahaia o vitikeo magnalio i tsifa’ey, sa nisy namorogne?