Aloha ty hitiligna o tandratò, le mila mangalake hafanagne boake amy i masoandroy reke mba hafana i ozatse magnampe aze hitiligney. Faie afake mitiligne aloha ty tandrato hafa o tandrato fotio naho fa mandrahogne o andrò. Ino ty mahavy izay?

 Dineho zao: Maro ty karaza tandrato mampikombogne ndra mamelatse i ela’ey naho fa mitsirikandro, aloha ty hitiligna’e. Faie nitrea tamy ty fikarohagne natao tie sokafe o tandrato fotio kedekede i ela’ey, le manjare magnomey V ty pozi’e. Amy izay reke mahazo hafanagne tena maro. Le avy le mandeha amy ty ozatse amy i tratra’ey ao ty hery boake amy i masoandroy. Afake mitiligne reke naho fa mafana i ozatse rey.

 Tea ty mpikaroke amy ty Oniverisite i Exeter an’Angletera agne hotrea tie hahavita panneaux solaires fara izay ty soa vao iareo naho mangalake tahake ty pozy ty ela o tandrato fotio. Nalae iareo tahake i ela’ey, le nitrea iareo fa nanjare mamoake hery fa ho 50 isan-jato fagnampe’e i panneaux solaires rey.

 Trea o mpikaroke reo ka tie mora magneregne hazavagne ty ela o tandrato fotio. Nalae iareo tahake zay, ankoatse i ela’e hoe V ty pozi’ey, le nahavita panneaux solaires tena maivagne naho mamoake hery maro iareo. Izay ty nahavy i Profesora Richard ffrench-Constant, agnisa ty mpikaroke hirehake tie tena za-draharaha amy ty famoriagne hery boake amy i masoandroy o karaza tandrato iohoe.

 Akore ty heve’o? Vokatse ty evolisiona vao ty fahaia o tandrato fotio mamory hery, sa nisy namorogne?