Indraike avao ty Baiboly ro mirehake miomba ty tombon-kalama ndra tatoazy. Hoe ty Levitikosy 19:28: “Ko isiagne tombon-kalama ty vata’areo.” Nimein’Andrianagnahare ty firene o Israelio o lily iohoe, satria tea’e hiambake amo o firenena nagnodidigne iareò iareo. Ty anto’e, nisorate i ndaty rey tamy ty vata iareo egne ty agnara ty andrianagnahare iareo ndra ty raha mampiambake aze. (Deoteronomia 14:2) Maregne fa tsy liliagne hagnorike o Lalàna nimeigne o Israelioy ty Kristiana. Faie mila dinehegne soa ty lesogne tea i lily rey hampianaregne.

Mete amy ty Kristiana vao ty manao tombon-kalama ndra tatoazy?

 Afake magnampe azo hisaintsaigne ty miomba izay ty andinin-teny tsiampeampe retoagne:

•   Toko’e ‘hihamigne amy ty fomba mendreke ty ampela.’ (1 Timoty 2:9) Mihatse amy ty lahilahy ka io. Toko’e hihevetse ty fihetseham-po ty hafa tika, le tsy manao ze hahavy iareo hifantoke amantikagne loatse.

•   Manao tombon-kalama ndra tatoazy ty ndaty ila’e satria te hampiseho tie managne ty maha ie aze ndra fa mahaleo tegna. Ty hafa indraike te hampiseho fa afake manao ze raha tea’e hatao amy ty vata’e reke. Faie hoe ty Baiboly: ‘Atoloro’areo ty vata’areo mba ho sorogne velogne naho masigne sady mahafale an’Andrianagnahare. Manao fanompoagne masigne nareo amy izay sady mampiasa soa ty sai’areo.’ (Romanina 12:1) Ampiasao ty ‘sai’o’ le dineho ty anto’e mahavy azo te hanao tombon-kalama. Lamody vao i rahay sa mampiseho tie agnisa ty antoko o ndaty raike rehe? Naho izay ty anto’e, le tsiarovo fa va’e hiova hevetse rehe naho fa afara agne ie amy izao i tombon-kalamay fa amy i vata’oy ey. Dineho soa areke tie nagnino rehe ro te hanao tombon-kalama satria hagnampe azo handrambe fanapahan-kevetse soa zay.​—Ohabolana 4:7.

•   “Mandamigne mialoha ty raha hatao’e ty mazoto, le tomombagne ty raha atao’e, fa hahantra ze memeke.” (Ohabolana 21:5) Memeke avao mateteke o ndatio naho fa hanapan-kevetse hanao tombon-kalama. Faie va’e hisy voka’e maharetse amy ty fifandrambesa’o amy ty hafa naho amy ty asa’o ze raha zay. Lafo naho manaintaigne ka ty magnafake o tatoazio. Magnaporofo izay ty fikarohagne natao naho ty hamaro ty ndaty mandeha amo o mpagnafake tatoazio agne.