Misy fomba maro azo ametrahagne o fagnonteneagne iohoe, ohatse zao ‘Inogne ty anto’e namorognagne antika?’ Ndra tihoe ‘Fa nagninogne raho ro nisy?’ Aseho ty Baiboly fa niforognegne mba hifandrambe aman’Andrianagnahare tikagne. Dineho ty hevetse lahibey boake amy Baiboly ao retoa:

•   Andrianagnahare ty namorogne antika. Hoe ty Baiboly : “Ireke [Andrianagnahare] ty namboatse antika sady aze tika.”​—Salamo 100:3; Apokalypsy 4:11.

•   Misy anto’e katao ty Andrianagnahare namorogne ze kila raha agnisa izay tika.​—Isaia 45:18.

•   Fa agnate tikagne ao ty fagniriagne te hahafantatse ty miomba an’Andrianagnahare. Teantika ho fantatse ka tie inogne ty anto’e ivelomantika. (Matio 5:3) Tean’Andrianagnahare hahay ty vale izay tika.​—Salamo 145:16.

•   Hahafantatse an’Andrianagnahare tika naho mikezake hinamagne ama’e. Mihevetse ty ndaty ila’e fa sarotse tihoe hinamagne aman’Andrianagnahare. Faie mandrisike antika ty Baiboly tie: “Magnarinea an’Andrianagnahare, le hagnarine anareo reke.”​—Jakoba 4:8; 2:23.

•   Tsy maintsy miaigne mifagnarake amy ty safirin’Andrianagnahare miomba antikagne tika naho te hanjare ragne’e. Rehafe ty Baiboly amy Mpitoriteny 12:13 ao ze safiri’e zay. Izao ty rehafe’e ao: ‘Matahora an’Andrianagnahare, le oriho ty lili’e. Fa izay ty anto’e namorognagne antika.’​—Fandikan-dreha ty Vaovao Soa (angilé).

•   Amy ty hoavy vaho tena ho tanterake ty safirin’Andrianagnahare tamy reke namorogne o ndatio. Hofoagna’e o fijaleagneo sady homea’e havelogne nainai’e ze ragne’e ndra o ndaty manompo azeo.​—Salamo 37:10, 11.