Magnomey tari-dalagne tena fanjaka ho antikagne ty Baiboly naho fa handrambe fanapahan-kevetse tika. Magnampe antikagne “hanagne fahendreagne naho hanjare hahira-tsaigne” io. (Ohabolana 4:5) Misy fotoagne rehafe’e mazava ty raha toko’e hatao mba hahavy antika handrambe fanapahan-kevetse soa. Faie misy fotoagne ty toro lalagne agnate’e ao ro magnampe antika hahay handrambe fanapahan-kevetse soa.

Amy ty lahatsoratse toy

•  Soso-kevetse hagnampe azo handrambe fanapahan-kevetse soa

•  Toko’e hagnova i fanapahan-kevekoy vao raho?

•  Akore naho raty ty fanapahan-kevetse nirambeseko sady fa tsy azoko ovagne?

•   Ko memeke naho fa handrambe fanapahan-kevetse lahibey. Hoe ty Baiboly: “Mieretseretse soa heike ty ndaty mahimbagne aloha ty hanao raha.” (Ohabolana 14:15) Naho memeke handrambe fanapahan-kevetse rehe, le va’e hisy fagnazavagne tena ilae’o mifandrambe amy i fanapahan-keve’oy faie tsy ho voamare’o. Manokagna fotoagne areke mba handineha’o soa ty safidy hatao’o.​—1 Tesalonianina 5:21.

•   Ko entem-po avao naho fa hanapa-kevetse. Mampitao antikagne ty Baiboly tie tsy toko’e hatoky ty fontikagne tika. (Ohabolana 28:26; Jeremia 17:9) Ohatse, va’e tsy handrambe fanapahan-kevetse soa tikagne naho fa boseke, mivali-doha, kivy, meke ndra naho fa rokake.​—Ohabolana 24:10; 29:22.

•   Mivavaha mba hahazo fahendreagne. (Jakoba 1:5) Tena mahafale i Jehovah ty mamale ty vavake hoe izay. Rae midare ty ana’e reke, le tea’e naho tsisy olagne manjò iareo. “I Jehovah ro magnomey fahendreagne, boake amy ty falie’e o fahalalagneo naho o fahaiagne mandinekeo.” a (Ohabolana 2:6) Amy ty alala ty Saontsi’e, ndra ty Baiboly ty agnomea’e ze fahendreagne zay voaloha’e.​—2 Timoty 3:16, 17.

•   Manoa fikarohagne. Mba hahafaha’o handrambe fanapahan-kevetse soa, le mila managne fagnazavagne azo ianteheragne rehe. Izao ty rehafe ty Baiboly: “Mitsanogne ty ndaty hendre, le mitombo ty raha fanta’e.” (Ohabolana 1:5) Aia ty ahatreavagne fagnazavagne afake magnampe sady azo ianteheragne?

   Voaloha’e, fantaro tie ino ty raha rehafe ty Baiboly mahakasike i raha paliave’oy. Mahafantatse ze raha tena mahasoa antikagne i Mpamorogne antikagney. Azo ianteheragne areke ze raha voasoratse agnate i Saontsi’ey ao. (Salamo 25:12) Amy ty fanapahan-kevetse ila’e, le mirehake mazava miomba ty raha tsy maintsy ataontikagne ty Baiboly. Va’e hoe lalàna ndra lily ty fomba agnambara’e aze amantikagne. (Isaia 48:17, 18) Faie amy ty ankapobei’e, le tsy farita ty Baiboly amy ty pitsopitso’e ty raha toko’e hataontikagne. Magnomey toro lalagne antikagne reke amy irey, le irey ty magnampe antika hahafantatse tie inogne ty raha toko’e hatao ndra tsy toko’e hatao. Naho te hahatrea andinin-teny afake magnampe azo rehe, le manoa fikarohagne amy i lahatsoratse ndra fitaovagne ara-baiboly rey, ohatse manahake ty amy ty tragnom-porarotse toy ato. Sady tsy andoavam-bola rey. b

   Amy ty fanapahan-kevetse ila’e, le ilae’o ty mandineke fagnazavagne hafa azo atokisagne. Naho misy raha ho vilie’o ohatse, lohotsie naho sarotse, le toko’e handineke ty miomba i rahay heike naho ty mpamokatse aze rehe, tie akore naho simba i rahay, ndra tea’o haheregne. Tsy maintsy atao’o azo antoke ka tie tena mifagnarake amy i raha ilae’oy ty raha vilie’o.

   Hoe ty Baiboly: “Tsy tanterake ze raha iriegne hatao naho tsy mangalake hevetse ama o ndaty.” (Ohabolana 15:22) Mifampirehafa amy ty ndaty azo atokisagne heike areke, aloha ty handrambe fanapahan-kevetse. Ohatse, hendre rehe naho magnontane dokotera heike naho fa handrambe fanapahan-kevetse miomba ty fitsaboagne tea’o horihegne. (Matio 9:12) Azo’o atao ka ty mirehake amy ty ndaty fa nizoen-draha mitovy amy i manjò azo hinaneo. Faie ko haligno fa irehe ro hanapa-kevetse sady hibabe ze ho voka ty fanapahan-keve’o fa tsy i ndaty ipaliava’o fagnampeagney.​—Galatianina 6:4, 5.

•   Dineho soa ze kila raha tafilitse ama’e. Va’e hanao lisita ty safidy anagna’o mifagnarake amy ty fagnazavagne nikarohe’o rehe, le handineke ty maha soa ndra ty maha raty ty safidy tsikiraidraike. Soa naho mba dinehe’o ka ty va’e ho voka i fanapahan-keve’oy. (Deoteronomia 32:29) Ohatse, ino ty va’e ho voka i fanapahan-keve’oy ama’o, amy ty keleia’o, ndra amy ty hafa? (Ohabolana 22:3; Romanina 14:19) Naho mikezake misaintsaigne o fagnonteneagne rehoe, sady mandineke ty toro lala ty Baiboly rehe, le handrambe fanapahan-kevetse soa sady aman-kilala.

•   Mandrambesa fanapahan-kevetse. Kindraike tika misalasala satria misy raha tsy azontikagne antoke hafarà’e tsy mandrambe fanapahan-kevetse. Faie tsy handrambe soa ndra hiafara amy ty raha tsy nieretseretentikagne aze i rahay naho izay ty ataontikagne. Tsy fahendreagne areke ty tsy fandrambesagne fanapahan-kevetse fa hagegeagne sady mitovy amy ty mandrambe fanapahan-kevetse raty avao zay. Nampiasa ohatse miomba o ndaty mpamboleo ty Baiboly mba hagnampeagne antikagne hahatakatse izay. Hoe reke: “Ze mandineke o tiokeo le tsy hitongy, sady ze magnente o rahogneo le tsy hijinja.”​—Mpitoriteny 11:4.

 Ko haligno fa tsy ombia tsy hisy tsiko’e ty fanapahan-kevetse raike ndra tie soa aza. Tsy maintsy misy raha hafa afoentikagne naho fa mifily ty raike tika. Va’e hiseho ka ty raha tsy nampoizegne. (Mpitoriteny 9:11) Dineho soa areke ze fagnazavagne anagna’o, sady filiano ze trea’o fa hahatomombagne ty raha atao’o.

 Tsy ze kila fanapahan-kevetse iaby ro tsy azo ovagne. Va’e hiova ty raha miseho amy ty fiaigna’o, ndra va’e nanjare nivoamare’o fa nisy voka’e tsy arake ty nieretsereta’o aze i fanapahan-keve’o voaloha’ey. Naho izay areke, le soa naho dinehe’o indraike i fanapahan-keve’oy, sady soa naho miova hevetse amy izay hifagnarake amy ze raha nieretserete’o ty ho voka’e.

 Faie misy fanapahan-kevetse ila’e tsy toko’e hovagne. (Salamo 15:4) Ohatse naho fa mpivaly zao ty ndaty roe, le mitamà ty Jehovah fa hitagne i voady i fanambalia iareoy iareo. c (Malakia 2:16; Matio 19:6) Naho fa misy olagne areke amo o fanambaliagneo eo, le toko’e hikezake iareo hamaha irey fa tsy ndra hisarake.

 Misy fotoagne tikagne iaby mandrambe fanapahan-kevetse tsy mete. (Jakoba 3:2) Va’e hanegnegne ndra hagnamelo-tegna tikagne naho fa miseho ty raha hoe izay. (Salamo 69:5) Mahasoa ty fahatsapagne hoe izay naho mandrisike antikagne tsy handrambe fanapahan-kevetse raty amy ty magnarake. (Ohabolana 14:9) Faie manoro hevetse antikagne mba tsy hagnamelo tegna losotse ty Baiboly satria va’e hanimba ty saintikagne ndra ty fihetseham-pontikagne zay. (2 Korintianina 2:7) d Rehafe ty Baiboly fa “mamindra fo naho miferenaigne ty Jehovah.” (Salamo 103:8-13) Mikezaha areke handrambe lesogne boake amy ty hadisoagne tsy mete natao’o, sady manoa ty raha va’e hagnasoa i rahay.