Naho fa boake namorogne i lahilahy naho i ampela voaloha’ey ty Andrianagnahare, le nampifanambalie’e iareo. Ireke ty namorogne o fanambaliagneo mba ho fehe mampiharo ty lahilahy naho ty ampela sady ho foto o keleiagneo.​—Genesisy 1:27, 28; 2:18.

 Tean’Andrianagnahare ho sambatse ty mpivaly. (Ohabolana 5:18) Magnomey toro lalagne miomba o fanambaliagneo amy Baiboly ao reke mba hagnampe ty mpivaly ho sambatse.

Ahatreavagne izay ty amy ty lahatsoratse retoagne ato:

•  Ino ty fitsipin’Andrianagnahare miomba o fanambaliagneo?

•  Akore ty fiheveran’Andrianagnahare ty fandehanagne lefa naho ty fisarahagne?

•  Mila misoratse ara-dalàna vao o mpivalio vaho izay ankasitrahan’Andrianagnahare?

•  Ino ty andraikitse rehafe ty Baiboly toko’e hatao ty lahilahy naho ty ampela manambaly?

•  Mbe mitake ty mpivaly amy hinane zao hiterake vao ty Andrianagnahare?

•  Akore ty agnampea ty Baiboly o mpivalio?

•  Andinin-teny amy Baiboly ao miomba o fanambaliagneo

 Tam-boaloha’e tagne ty Andrianagnahare namorogne o fanambaliagneo mba hampiharo ty lahilahy naho ty ampela. (Genesisy 2:24) Tsy ankasitrahan’Andrianagnahare ty fanagnagne valy maro, ty lahilahy sambe lahilahy mifampila ndra ty ampela sambe ampela mifampila ndra ty ndaty tsy mpivaly ara-dalàna faie miharo tragno. (1 Tesalonianina 4:3) Nampianatse ze mpanonjohy ty lia’e ty Jesosy mba hagnorike i fitsipin’Andrianagnahare miomba i fanambaliagne tam-boaloha’e tagney.​—Marka 10:6-8.

 Nataon’Andrianagnahare haharetse nainai’e o fanambaliagneo. Naho fa mifanambaly ty lahilahy raike naho ty ampela raike, le mampitamà iareo fa tsy hivalike amy vali’e sady hiharo avao amparake ty iaigna’e iareo. Mitamà ty Andrianagnahare fa hagnatanterake o rehake nanoe iareo iohoe iareo.​—Marka 10:9.

 Va’e hisy fotoagne o mpivalio, tsy maintsy hisarake. Agnisa izay ohatse tihoe, mila mandeha lavitse ty raike mba hikarakara raharaha amo o keleiagneo eo. Faie tsy mandrisike ty Baiboly tie toko’e handeha lefa ty raike amy iareo noho ze olagne amo o keleiagneo zay. Mandrisike ty mpivaly ty Baiboly mba hiharo avao ndra tie misy ty raha hoe izay.​—1 Korintianina 7:10.

 Fagnitsakitsaham-baly avao ty enga ty Baiboly ahafaha ty mpivaly misarake. (Matio 19:9) Faie naho manapa-kevetse handeha lefa ndra hisarake ty raike amy ty mpivaly faie tsy noho o anto’e iohoe, le tsy toko’e hiarake ama o ndaty hafa ndra hanambaly ndaty hafa ty raike amy iareo hoe ty Soratse Masigne.​—Matio 5:32; 1 Korintianina 7:11.

 Tean’Andrianagnahare hankatò ty lalàna omeo o fanjakagneo miomba o fanambaliagneo o Kristianao. (Titosy 3:1) Naho fa misoratse ara-dalàna ty mpivaly raike, le izay ty ampisehoa’e fa magnaja o manam-pahefàgneo naho ty fitsipin’Andrianagnahare reke satria natao’e haharetse o fanambaliagneo. a

•   Andraikitse iharoa iareo. Toko’e hifankatea naho hifagnaja ty mpivaly. (Efesianina 5:33) Toko’e hanao ty andidi’e amy i vali’e avao ty raike amy iareo sady tsy toko’e hila ndaty hafa. (1 Korintianina 7:3; Hebreo 13:4) Naho managne anake iareo, le andraiky iareo ty mamelogne naho mikarakara ty ana iareo.​—Ohabolana 6:20.

   Tsy rehafe ty Baiboly amy ty pitsopitso’e ty fomba toko’e hatao ty mpivaly naho fa miara-miasa vaho ty fanoagne tolon-draha an-tragno ao. Afake miarake manapa-kevetse iareo tie ino ty raha mete amy i keleia iareoy.

•   Ty andraiky ty lahilahy. Mirehake ty Baiboly fa ‘ty lahilahy ty loha ty vali’e.’ (Efesianina 5:23) Loha’e reke amy ty heve’e tihoe, ireke ro hitarike i keleia’ey naho handrambe fanapahan-kevetse amy ze raha hahasoa ty valy aman’ana’e.

   Toko’e hikezake reke mba hanao ze hahazoa ty keleia’e ze raha paliae’e ara-batagne naho ara-pihetseham-po vaho ara-pagnahy. (1 Timoty 5:8) Aseho’e tie sarobily ama’e ty vali’e naho miarake miasa iareo sady fantare’e soa ty heve’e naho ty fihetseham-po’e naho fa mandrambe fanapahan-kevetse reke. (Ohabolana 31:11, 28) Mirehake ty Baiboly fa toko’e hatao ty lahilahy aman-katea o andraiki’e iohoe.​—Kolosianina 3:19.

•   Ty andraiky ty ampela. Mirehake ty Baiboly fa toko’e ‘tena hagnaja ty vali’e ty ampela.’ (Efesianina 5:33) Fale ty Jehovah naho fa magnaja ty vali’e o ampelao.

   Anjara’e ty magnampe i vali’e, naho ty magnampe aze handrambe fanapahan-kevetse soa sady manohagne aze. (Genesisy 2:18) Mirehake ampela manao ty anjara asa’e amo o fanambaliagneo eo ty Baiboly.​—Ohabolana 31:10.

 Aha’a. Nililian’Andrianagnahare hanagn’anake ty mpanompo’e ila’e tie taloha. (Genesisy 1:28; 9:1) Faie fa tsy voafehe o lily iohoe o Kristianao. Tsy mba nandily i mpiana’e rey hanagn’anake ty Jesosy. Tsy nirehake ka i mpiana’e voaloha’e rey tie tsy maintsy managn’anake o mpivalio. Afake manapa-kevetse o mpivalio tie hiterake sa tsy hiterake.

 Misy toro lalagne magnampe ty mpivaly ty amy Baiboly ao mba hahavy ty fanambalia iareo ho soa fanombohagne. Magnampe ty mpivaly hisoroke olagne ndra handrese raha sarotse ka ty toro lala ty Baiboly.

 Afake magnampe ty mpivaly ty toro lala ty Baiboly mba...

•   haneho hatea vata’e.​—1 Korintianina 13:4-7; Kolosianina 3:14.

•   hipay ze hahasoa ty hafa.​—1 Korintianina 10:24.

•   hitsanogne soa.​—Jakoba 1:19.

•   hifagnomey voninahitse.​—Romanina 12:10.

•   hamela heloke tanterake.​—1 Petera 4:8.

•   tsy hivalike.​—Marka 10:9.

•   hanam-paharetagne.​—Efesianina 4:2, 3.

•   hiara-miasa hoe ekipa raike.​—Mpitoriteny 4:9.

•   hitagne mafe i voadỳ lognandro.​—Tononkiran’i Solomona 8:7.