Talily Soa Nisorate i Lioka 12:1-59
-
Ty Lalivay o Fariseò (1-3)
-
Andrianagnahare ro atahoro fa tsy ndaty (4-7)
-
Tafaharo amy i Kristy ze magneke aze (8-12)
-
Fagnoharagne miomba i lahilahy mpagnarivo gegey (13-21)
-
Ko minekoneko sasa (22-34)
-
Agnondry tsy ampe (32)
-
-
Miambena lognandro (35-40)
-
Mpanompo azo atokisagne naho mpanompo tsy azo atokisagne (41-48)
-
Tsy filongoagne fa fisaratsarahagne (49-53)
-
Ilaegne ty mandineke ty raha miseho (54-56)
-
Fandaminagne olagne (57-59)
12 Nisy ndaty tsiefa nivory tamy izay, hafarà iareo nifandialia tomboke. Le hoe reke tamy i mpiana’e rey: “Mitaoa nareo amy ty lalivay* o Fariseo mpanao soa miatrekeo!
2 Fa tsy misy raha soa haja tsy habaribary zao, le tsy misy raha sekiré lelia’e tsy hofantatse zao.
3 Ze raha rehafegne ama’areo mitokagne areke, le ambarao’areo ndaty maro. Ze raha bisibisihegne ama’areo, le koiho’areo ambone tafotragno ey.
4 O ry ragnetse, izao ty raha rehafeko ama’areo: Ko matahotse ze ndaty mamono anareo faie tsy mahavita raha ambone izay.
5 Fa hatoroko anareo ty toko’e hatahora’areo: I mahavita mamono naho managne fahefagne hanorake anareo amy i Gehena agney, ro atahoro’areo. Ahereko indraike, igne ro atahoro’areo.
6 Tsy ariary roe* vao ty vily ty foly dime? Faie ndra ty raike amy iareo aza tsy halignon’Agnahare.
7 Hai’areo, ndra o volo’areò aza hai’e ty isa’e. Ko matahotse fa sarobily ambone o folio iaby nareo.
8 “Rehafeko ama’areo, fa ze magneke ahy agnatreha o ndatio eo, le heke i Ana o ndatỳ ka agnatreha o anjelin’Agnahareo eo.
9 Fa ze tsy magneke ahy agnatreha o ndatio eo, le tsy hekeko ka agnatreha o anjelin’Agnahareo eo.
10 Ze mirehake raha raty miomba i Ana o ndatỳ, le havela ty fahota’e. Fa ze manivetive i fagnahy masigney, le tsy havela ty fahota’e.
11 Naho ente iareo agnatreha o ndaty marò eo* ndra amo o mpitondrao agne ndra amo o manam-pahefagneo agne nareo, le ko minekoneko amy ty fomba hiarova’areo ty tegna’areo ndra ty raha horehafe’areo.
12 Ty anto’e, i fagnahy masigney ro hanoro anareo ze raha toko’e horehafe’areo amy ze fotoagne zay.”
13 Le nisy ndaty raike tamy i vahoakey eo nanao hoe izao tama’e: “O Mpagnanatse, rehafo i rahalahikoy mba hizara i lova’aỳ amako.”
14 Le hoe ty Jesosy tama’e: “Ia ty nanendre ahy ho mpitsara ndra ho mpizara ty lova’areo?”
15 Hoe ka reke tamy i vahoakey: “Miambena avao nareo sady mitaoa amy ze raha va’e hahavy anareo hotea mena. Satria ndra tie mpagnarivo bey aza ty ndaty raike, le tsy miankigne amy i fanagna’ey ty fiai’e.”
16 Naho fa boake nirehake izay reke, le nirehake fagnoharagne tamy iareo. Hoe reke: “Nisy lahilahy raike mpagnarivo zay tena namokatse ty tane’e.
17 Le hoe reke t’agneretsere’e agne: ‘Fa tsy tandre ty raha nivokareko retoa ty tragno famoriako vokatse toy. Ino koahe ty toko’e hataoko?’
18 Le hoe reke: ‘Izao ty hataoko: Horavako ty tragnoko famoriako vokatse toy, le hamboatse bey ambone’e raho. Le ao ty hamoriako ty fanagnako iaby naho ze raha vokareko.’
19 Hoe ka reke: “Maro ty fanagnagne navoriko retoa, le tsy ho lany agnate ty taogne maro reo. Afake ty hitobotoboke avao areke raho, hihinagne, hinogne divay naho hanao ze raha hahafalefale ahy.”’
20 Faie hoe ty Andrianagnahare tama’e: ‘O ty gege tia, hisy hamono rehe tie androany halegne. Ho an’ia iaby areke o raha navori’o reo?’
21 Izay areke ty hanjò ze ndaty mamory raha sarobily ho aze faie tsy mba manan-karena agnatrehan’Andrianagnahare eo.”
22 Hoe reke tamy i mpiana’e rey naho fa niavy eo: “Izay ty anto’e irehafako ama’areo tie, ko minekoneko sasa amy ty fiai’areo nareo, le hanao tihoe, ino ty raha hohane’ay, ndra minekoneko amy ty vata’areo ka, le hanao tihoe, ino ty hisikina’ay.
23 Ty anto’e, ty aigne ro sarobily ambone o hanegneo, le ty vatagne ambone o akanjò.
24 Mba dineho’areo moa o koàkeo: Tsy mitongy ndra mandrofotse ndra mamory an-driha iareo, faie mean’Andrianagnahare hanegne. Tsy mihoatse o vorogneo vao ty hasarobili’areo?
25 Ia ama’areo ty mitombo minitra raike ty andro iaigna’e naho minekoneko?
26 Naho ty raha kedekede hoe izay areke tsy vita’areo, nagnino nareo ro minekoneko amy ty raha hafa?
27 Dineho’areo ka ty fitiry o folerao.* Tsy mba miasa mafe ndra manjaitse akanjo iareo. Faie volagneko ama’areo, fa ndra i Solomona mbe tamy ty voninahi’ey aza, tsy niakanjo fanjaka mitovy amy ty raike amy i folera rey.
28 I raha mitiry an-teteke ey rey aza ampisikinen’Agnahare akanjo fanjaka hoe rey, ie amy izao androany avao ty iveloma’e, fa naho fa hamaray hatorake agnate afo ao, tsy somandrake nareo ry kele finoagne!
29 Ko minekoneko sasa miomba ty raha hohane’areo naho ty raha hinome’areo areke, sady ko minekoneko bey loatse sasa.
30 Ty anto’e, o ndaty tsy mahafantatse an’Andrianagnahareo ro mipay mafe o raha rehoe. Fa hay i Rae’areoy tie mipay o raha rehoe nareo.
31 Fa inareo, anò voalohan-draha amy ty fiaigna’areo avao i Fanjakagney, le homeagne anareo iaby ka o raha rehoe.
32 “Ko matahotse nareo ry agnondry tsy ampe satria zoto i Rae’areoy ty hagnomey anareo i Fanjakagney.
33 Avaroto ty fanagna’areo, le magnomea raha mba ho fiferegnesagne ty hafa. Mamoria vola faie ko atao amy ty raha mete voroke, fa an-dagnitse agne ro amorio harena satria tsy misy mpangalatse ndra biby kedekede hihinagne aze ty agne.
34 Ty anto’e, ze raha tena sarobily ama’o ro andrea ty fo’o.
35 “Miakanjoa naho mivognona, le velomo avao ka i jiro’areoy.
36 Toko’e hanahake o lahilahy mandigne ty hiheregna ty tompo’e nandeha namonje engavaò nareo. Naho fa avy i tompo iareoy sady mampinkonkogne, le avy le sokafe iareo.
37 Sambatse o mpanompo rehoe satria zoe i tompo iareoy miambegne avao! Volagneko ama’areo,* fa hagnisy tabilié i tompo iareoy, le hampitobohe’e iareo mba hihinagne, le mandeha mbamy iareo mbeo reke mba hikarakara iareo.
38 Sambatse o mpanompo rehoe satria zoe i tompo’ey miambegne ty hiavia’e avao iareo ndra tamy i lera fiambenagne faharoey* zay ndra tamy i lera fiambenagne fahateloy!*
39 Faie tadidio’areo zao: Naho nihay o tompon-tragnò tie amy fire ty hiavia o mpangalatseo, le ho nambena’e avao i tragno’ey sady tsy ho nenga’e ho namaky i tragno’ey ka i mpangalatsey.
40 Miambena lognandro areke nareo satria va’e amy ty lera tsy eretserete’areo ty hiavia i Ana o ndatỳ.”
41 Le hoe ty Petera: “O Tompo, izahay avao vao ty irehafa’o ze fagnoharagne zay, sa o ndatio iaby?”
42 Le hoe ty Tompo tama’e: “Ia maregne moa i mpanompo azo atokisagne naho mahimbagne, tinendre i tompo’e hikarakara ty mpanompo’e iaby naho hagnomey iareo hanegne ampe soa amy ty fotoagne ipalià iareo azey?
43 Sambatse ze mpanompo zay naho zoe i tompo’ey manao ty asa’e naho fa avy reke.
44 Volagneko ama’areo, fa hotendre’e hiandraikitse ty fanagna’e iaby reke.
45 Faie naho mieretseretse o mpanompo iohoe tie: ‘Ho tara ty fiavy i tompokoy’, le manomboke mijera ty mpanompolahy naho ty mpanompovave i tompo’ey reke, mifanehake ty fihinagne naho ty finon-toake avao ka reke sady mamo.
46 Ho avy amy ty andro tsy ampoize’e naho amy ty lera tsy nieretserete’e areke i tompo’ey, le hagnasaze aze mafe sady haharo’e amo o ndaty tsy azo atokisagneo reke.
47 Hahazo jera maro o mpanompo iohoe satria nihai’e ty zoton’arofo i tompo’ey faie tsy niomagne reke ndra tsy nanao ze raha nampanoe’e aze.
48 Fa hahazo jera tsy ampe avao ze mpanompo tsy nahay ty zoton’arofo i tompo’ey sady nanao raha raty noho ty tsy fahafantara’e. Ze nimeagne maro, le hitakeagne maro. Ze nagnankinagne raha maro, le mihoatse i raha nankinegne ama’ey ty hotakegne ama’e.
49 “Handrehetse afo ty niaviako an-tane etoy. Le naho fa mirehetse i afoy, mbe ino ka ty raha irieko ankoatse izay?
50 Misy badisa hanoagne ahy zay, le minekoneko raho amparake ty hivita’e.
51 Mihevetse vao nareo tie hampisy filongoagne ty niaviako an-tane etoy? Aha’a, tsy izay. Rehafeko ama’areo, fa tsy niavy mba hinday filongoagne raho fa hinday fisaratsarahagne.
52 Manomboke amy izao, le hizarazara o keleiagneo. Naho misy ndaty dime ohatse ty ao, le ty telo hanohetse ty roe, le ty roe hanohetse ty telo.
53 Hisaratsarake iareo. Ty rae hanohetse ty ana-dahi’e, le ty ana-dahy hanohetse ty rae’e. Ty rene hanohetse ty anak’ampela’e, le ty anak’ampela hanohetse ty rene’e. Ty rafozagne ampela hanohetse ty vinanto’e ampela, le ty vinanto ampela hanohetse ty rafoza’e ampela.”
54 Hoe ka ty Jesosy tamy i vahoakey: “Naho mahatrea rahogne ahandrefagne agne nareo, le hoe nareo, ‘hisy tiobey,’ le miseho vata’e zay.
55 Ie ka misy tioke ty boake atimo agne, le hoe nareo, ‘hafana o andrò,’ le miseho vata’e zay.
56 Ry mpanao soa miatreke, hai’areo ty mamantatse ty raha miseho amy ty tane toy naho amy i lagnitsey ey, faie tsy hai’areo ty mamantatse ty raha miseho amy ze o fotoagne zao.
57 Nagnino areke ro tsy dinehe’areo ty raha toko’e hatao’areo?
58 Naho mandeha amo o fitsaragneo ey ohatse rehe naho ty ndaty mitory azo, le mifagnaraha ama’e rehe amy inareo mbe an-dalagne eỳ, amy izay reke tsy hanolotse azo amo o zizio eo, le o zizio ka hanolotse azo amo o mpagnatanterake lilim-pitsaragneo, le o mpagnatanterake lilim-pitsaragneo hampigadra azo am-pirizò agne.
59 Rehafeko ama’o, fa tsy hovotsotse boake ao rehe naho tsy vita’o loa iaby ze vola* toko’e haloa’o.”
Fagnamarehagne ambane peje
^ Ndra: “karibonaty.”
^ Abt: “Asariona roe.” Karama ty ndaty raike niasa tagnate ty lera’e raike naho 30 minitra tie taloha.
^ Ndra va’e: “amo o sinagogao agne.”
^ Ndra: “folera lisy.”
^ Abt: “Volagneko ama’areo to vata’e.”
^ Manomboke amy 9 halegne eo ho eo hatrake vakimira halegne o lera iohoe.
^ Manomboke vakimira halegne hatrake amy 3 maraindraigne o lera iohoe.
^ Abt: “kadrana.” Karama o ndaty taloha tagnate ty 10 minitra teo ho eo ty kadrana raike.
